DAW 22

Kabu Gara Shiga Hpe Gara Hku Hkaw Tsun Lu Na Kun?

HPAW

Chyum Laika tengman lam hpe nang chye wa ai shaloi, ‘ndai lam hpe masha yawng chye ging ai’ ngu nang myit na re. Teng ai, dai lam hpe masha yawng chye ra ai. Raitim, nang chye wa ai lam hte seng nna, kaga ni hpe tsun dan na matu hkrit ai ngu nang hkamsha nga na re. Hkrit ai myit hpe gara hku tawt lai lu ai lam hte Chyum Laika kabu gara shiga hpe kabu gara let hkaw tsun hpang lu na lam hpe hkaja yu ga.

1. Tinang chye ai masha ni hpe nang chye da ai lam ni gara hku tsun dan lu na kun?

Yesu a sape ni ndai hku tsun ai: “An chyawm gaw, mu la, na la sai lam ni hpe n tsun ai, n nga lu ga ai.” (Kasa 4:20) Shanhte gaw tengman lam hpe grai manu shadan ai majaw, dang lu ai daram masha law law hpe tsun dan mayu ai. Nang mung dai zawn hkamsha ai kun? Rai yang, nang chye wa ai lam ni hpe na a manang, nta masha ni hpe hkungga let tsun dan na matu ahkaw ahkang tam u.—Kolose 4:6 hpe hti u.

Galaw hpang mai ai lam nkau

Nta masha ni hte jahta hkat nga ai shaloi, “ndai bat grai myit lawm hpa lam langai hpe ngai chye wa ai” ngu tsun nna, Chyum Laika lam langai hpe shachyen ya u.
Myit tsang nga ai (sh) machyi nga ai manang langai hpe n-gun lu shangun ai Chyum daw hte n-gun jaw u.
Ndai bat hta gara hku rai? ngu nna san ai na a bungli manang ni hpe nawku zuphpawng hta (sh) nang Chyum Laika hkaja ai kaw na chye wa ai lam ni hpe tsun dan u.
Na a manang hpe jw.org website hte shachyen ya u.
Nang Chyum Laika hkaja ai lamang hta hkan dung na matu kaga ni hpe saw shaga u (sh) Chyum Laika hkaja mayu yang, jw.org hta hpyi shawn mai ai hpe madun dan u.

2. Nawku hpung hte rau hkaw tsun ai gaw hpa majaw akyu nga ai bandung rai kun?

Yesu a sape ni gaw, kabu gara shiga hpe shanhte chye ai masha hpe sha n-ga, kaga ni hpe mung hkaw tsun dan ai. Yesu gaw, hkaw tsun na matu, ‘mare hte shara shagu de, marai lahkawng hkawng ginrun nna, shi a shawng de tau hkrau shangun dat ai.’ (Luka 10:1) Dai zawn, atsawm hpawng de da ai hkaw tsun bungli a majaw, kabu gara shiga hpe masha law law na la lu na matu ahkaw ahkang lu wa ai. Rau hkaw tsun ai majaw mung, sape ni hpe grai nan kabu gara shangun ai. (Luka 10:17) Nang mung nawku hpung hte rau hkaw tsun na matu bandung jahkrat lu na kun?

Kahtap Hkaja

Hkrit ai myit hpe gara hku tawt lai lu ai lam hte kabu gara shiga hkaw tsun ai kaw na ngwi pyaw lam gara hku lu la mai ai hpe hkaja yu ga.

3. Yehowa nang hte rau rai na

Hkaw tsun mayu ai masha nkau gaw, kaga ni gara hku shadu na, gara hku byin wa na, ngu ai hte seng nna myit tsang chye ai.

Nang chye wa ai lam ni hte seng nna kaga ni hpe tsun dan na matu myit tsang ai kun? Rai yang, hpa majaw dai hku htai ai?

VIDEO hpe hpaw, dai hpang ndai ga san hpe bawngban u.

VIDEO: Nden Marai Nga Na Matu Yehowa Kaw Ngai Akyu Hpyi (4:05)

Dai ramma Sakse Hkam ni gaw, hkrit ai myit hpe gara hku tawt lai wa ai kun?

Esaia 41:10 hpe hti nna, ndai ga san hpe bawngban u:

Hkaw tsun na matu hkrit nga yang, akyu hpyi ai gaw nang hpe gara hku karum ya na kun?

Nang chye ai kun?

Yehowa Sakse law law gaw, kabu gara shiga hpe galoi mung hkaw tsun lu na n re ngu myit ga ai. Ga shadawn, Seragi gaw tinang hkum tinang kam ai myit n nga ai majaw, kaga ni hte ga shaga na matu yak ai. Raitim, hpang de shi Chyum Laika hkaja wa ai. Shi ndai hku tsun ai: “Hkrit ai myit nga tim, ngai chye wa ai lam ni hte seng nna kaga ni hpe ngai tsun dan hpang wa ai. Akyu hku nna gaw Chyum Laika hte seng nna kaga ni hpe tsun dan ai majaw, tinang hkum tinang kam ai myit grau nga wa ai. Ngai na makam masham nnan mung grau ngangkang wa ai.”

4. Hkungga lara di u

Kabu gara shiga hkaw tsun ai shaloi, gara lam tsun na ngu ai sha n-ga, gara hku tsun na ngu ai hpe mung myit da u. 2 Timohti 2:24 hte 1 Petru 3:15 hpe hti nna, ndai ga san ni hpe bawngban u:

Kaga ni hpe Chyum Laika hte seng ai lam tsun dan ai shaloi, dai Chyum daw ni hpe gara hku tatut hkan sa lu na kun?
Nta masha (sh) manang nkau mi gaw nang tsun ai hpe myit hkrum na n re? Nang gara hku galaw lu na kun? Gara hku n galaw ging ai kun?
Shadut ai hku tsun na malai, hpaji rawng ai ga san ni hpe lang ai gaw hpa majaw grau kaja ai kun?

5. Kabu gara shiga hkaw tsun ai gaw ngwi pyaw lam lu shangun

Yehowa gaw Yesu hpe kabu gara shiga hkaw tsun ai bungli jaw wa ai. Dai bungli hpe Yesu gara hku mu mada wa ai kun? Yawhan 4:34 hpe hti nna, ndai ga san ni hpe bawngban u:

Kaja ai malu masha hpe sha ai gaw, anhte asak hkrung na matu, madi shadaw ya nna ngwi pyaw lam mung lu shangun ai. Karai a myit ra ai lam re ai, kabu gara shiga hkaw tsun ai lam hte lusha sha ai hpe Yesu hpa majaw shingdaw wa ai kun?
Kabu gara shiga hkaw tsun ai kaw na gara ngwi pyaw lam hpe lu la na ngu nang shadu ai kun?

Galaw Mai Ai Lam

Bat lapran zuphpawng laman, ga shaga hpang mai ai lam hpe tam yu u.
Bat lapran zuphpawng hta, jawng ma galaw mayu ai lam hte seng nna tinang hpe Chyum Laika sharin ya ai wa hpe tsun u. Chye wa ai lam ni hte seng nna kaga ni hpe tsun dan lu hkra jawng ma lit gaw nang hpe grau nna karum ya lu na re.
Law malawng san chye ai ga san ni hte ninghkap ai lam ni hpe gara hku bai htang na ngu ai hte seng nna shaman lu na matu, ndai laika buk hta lawm ai, “Nkau Mi Tsun Ai” (sh) “Nkau Mi San Chye Ai” ngu ai daw hpe akyu jashawn u.

Nkau Mi San Chye Ai: “Ndai laman hta gara hku?”