Nan dinghku n nan shang ai shaloi, manghkang ni nga wa na re. Sumru lam, hkam sha lam, nga kaba wa ai grupyin ni n bung ai majaw, manghkang ni byin wa chye ai. Dinghku shinggan na manghkang ni hte n myit mada da ai manghkang ni mung byin wa chye ai.

Manghkang ni hpe koi mayu ai myit pru wa chye tim, shakut hparan na matu, Chyum Laika hta n-gun jaw da ai. (Mahte 5:23, 24) Chyum ga matsun ni hpe tatut hkan sa na nga yang, manghkang ni hpe grai kaja hkra hparan lu na re.

CHYUM LAIKA TSUN AI LAM: “Ga tsun na aten mung . . . nga ai.” (Hpaji Ningli 3:1, 7) Aten la nna manghkang hpe bawng ban u. Manghkang hte seng ai, na hkam sha lam hte, ningmu hpe asan sha tsun dan u. “Teng man ai ga” hpe ayan tsun u. (Ehpesu 4:25) Masin pawt mayu tim, sharang da ra ai. Si mani ai hte hparan na nga yang, ga n law hkat ai sha, atsawm sha bawng ban lu na re.​—⁠Ga Shagawp 15:4; 26:20.

Manghkang langai hte seng nna, shi hte myit n hkrum ai nga yang pyi, si mani ai hte tsun u. (Kolose 4:6) Manghkang hpe lawan hparan na matu, shakut u. Langai hte langai ga n shaga ai mung hkum galaw.​—⁠Ehpesu 4:26.

NANG GALAW MAI AI LAM:

• Manghkang hpe bawng ban na matu, htap htuk ai aten hpe lata u

• Shi shaga ai shaloi htum hkra madat ya u. Ngut yang she nang tsun u

CHYUM LAIKA TSUN AI LAM: “Tsaw ra . . . myit shada da rawng nga mu; hkungga lara ai hta shada da shagrau hkat mu.” (Roma 12:10) Nang gara hku madat ai gaw, grai ahkyak ai. “Myit gyip” ai hte ningrum ningtau a ningmu hpe chye na hkra shakut u. (1 Petru 3:8; Yaku 1:19) Kaja wa n madat ai sha, madat taw ai zawn hkum galaw. Byin mai yang, galaw nga ai bungli ni hpe jahkring nna, shi tsun ai hpe atsawm madat u. Shing n rai, hpang she tsun mai n mai san u. Na a ningrum ningtau hpe, shingjawng manang hku n mu ai sha, nang hpe karum ai wa hku nna mu mada yang, “pawt sindawng” ai lam ni nga wa na n re.​—⁠Hpaji Ningli 7:9.

NANG GALAW MAI AI LAM:

• Ningrum ningtau tsun ai hpe myit n hkrum tim pyi, myit galu kaba hte matut madat ya u

• Ningrum ningtau tsun dat ai ga si hpe n re ai sha, tsun mayu ai lachyum hpe chye hkra shakut u. Shi nsam hte nsen hpe maram yu u

CHYUM LAIKA TSUN AI LAM: “Galaw shakut ai lam shagu hta amyat rai nga ai; baw law ai akyu chyawm gaw, matsan mayan hkrai rai nga ai.” (Ga Shagawp 14:23) Manghkang hparan ai hta, myit hkrum ai hte sha n ngut ai. Myit hkrum da ai hte maren galaw na ahkyak ai. Dai hku galaw na matu shakut ra tim, galaw yang akyu lu na. (Ga Shagawp 10:4) Nan lahkawng rau jawm shakut na nga yang, “kaja ai shabrai” hpe lu la na re.​—⁠Hpaji Ningli 4:9.

NANG GALAW MAI AI LAM:

• Manghkang hparan na matu, nan galaw ra ai tatut lam ni hpe daw dan u

• Daw dan da ai hte maren, awng dang lam nga ai kun ayan jep u