Ndai mabyin hpe shingran yu u: Asak 17 re ai Geoffrey gaw nta bungli ni galaw ngut sai majaw loi mi naw hkring sa la dat na ngu myit ai. Dai majaw TV hpaw dat nna lahkum hta dung dat ai.

Dai aten hta, shi Awa gaw chying hka lam kaw du wa ai. Grai myit shuk taw ai zawn re.

Nang gaw Geoffrey shara hta rai yang ga law hkat ai du hkra n byin na matu hpa galaw na kun?

Kanu kawa ni hte tsun shaga ai hpe mawdaw gawt ai hte shadawn mai ai. Mawdaw gawt ai shaloi, lam pat da ai hte hkrum yang nang kaga lam tam nna sa na re.

 GA SHADAWN:

Leah ngu ai numsha ndai hku tsun ai: “Awa hte ga shaga na matu grai yak ai. Ngai tsun ai hpe myit n lawm ai. Shi hpe tsun taw ai loi mi na jang she, aw! Awa hpe tsun taw ai i? nga nna san wa ai.”

LEAH HTA LATA NA LAM YAWM HTUM MASUM NGA AI.

1. Shi kawa hpe marawn dat ai.

“Grai ahkyak ai lam tsun taw nga ai. Naw madat ya u” ngu Leah marawn dat ai.

2. Awa hte ga n shaga sai.

Leah gaw shi hta nga ai manghkang kawa hpe tsun na matu n shakut sai.

3. Htap htuk ai aten hpe la nna tsun u.

Leah gaw hpang de she, shi a manghkang hpe kawa hte tsun shaga na (sh) laika ka nna tsun na.

Leah gara mahtang hpe galaw ging ai ngu shadu ai kun?

MYIT YU U: Leah a kawa gaw myit shuk taw nga ai majaw kasha a manghkang hpe n sadi hkrup ai. Leah gaw Nambat 1 hpe lata na nga yang, shi hpa majaw marawn ai hpe shi kawa chye na na n re. Shi tsun ai hpe shi kawa madat mayu na n re. Bai, kawa hpe n hkungga ai hku mung byin ai. (Ehpesu 6:⁠2) Nambat 1 hpe lata na nga yang kadai mung akyu n nga na gaw teng sha re.

Nambat 2 gaw galaw na matu loi dik htum raitim hpaji rawng ai gaw n re. Hpa majaw nga yang, manghkang ni hpe kaja ai hku hparan mayu yang kawa hte ga shaga ra ai. Kawa mung karum ya mayu yang shi kasha hpa byin nga ai hpe chye ra ai. N-gup pat nna nga yang gaw hpa mung akyu n nga ai.

Leah gaw Nambat 3 hpe lata ai nga yang, mayak mahkak hkrum tim asum n jaw ai wa re. Kawa hpe hpang de she tsun na matu shakut ai. Kawa hpe laika ka nna tsun na nga yang mung kalang ta myit simsa lu na re.

Laika ka nna tsun dan ai majaw shi tsun mayu ai ni hpe tup hkrak hpaw tsun dan lu ai. Kawa mung dai laika hpe lu hti ai shaloi hpa tsun mayu ai hpe atsawm chye na wa nna kasha a manghkang hpe grau chye na wa na. Dai majaw Nambat 3 gaw Leah hte shi kawa a matu akyu nga ai. Myi man hkrum tsun ai rai rai, laika ka nna tsun ai rai rai, dai hku galaw ai gaw “ngwi pyaw simsa ai hku nga lu na lam” tam u ngu ai Chyum Laika matsun hpe hkan sa ai re.​—⁠Roma 14:⁠19, JCLB.

Leah hta kaga lata na lam naw nga ai kun?

Nang myit lu ai lam nga yang lawu hta ka u. Hpa akyu nga na hpe mung ka bang u.

Nang tsun mayu ai gaw amyu mi, kanu kawa ni chye na kau ai gaw amyu mi byin chye ai hpe dum u.

GA SHADAWN:

Kanu kawa ni gaw nang myi man n tsawm taw ai lam hpe san ai. Dai shaloi nang gaw “dai lam ngai n kam tsun ai” ngu tsun ai.

Raitim, kanu kawa ni maga hku nna gaw: “Shanhte hpe n kam ai, manang ni hpe sha dai lam tsun dan mayu ai” ngu nna chye na mat ai.

Nang hta manghkang langai hkrum nga nna kanu kawa ni gaw “Hpa karum ya ra na ta?” ngu san wa ai. Nang gaw “Anu ni hpa hkum tsang. Ngai hkrai ngai chye hparan ai” ngu tsun dat ai.

• Kanu kawa ni chye na dat ai gaw:

• Grau kaja hkra tsun mai ai lam: