HKRISTAN ni galoi mung kahtap hpyi hpyi re ai akyu hpyi ga langai nga ai. Dai gaw, Madu a akyu hpyi ga (sh) Anhte a Wa ngu ai Yesu a akyu hpyi ga langai re. Raitim, dai akyu hpyi ga a lachyum hpe masha law malawng n chye na ma ai. Masha wan law law gaw dai akyu hpyi ga hpe lani mi hta kalang (sh) lani mi hta jahkring hkring hpyi ma ai. Raitim, Yesu gaw dai hku n hpyi shangun ai. Gara hku chye lu ai kun?

Dai akyu hpyi ga hpe Yesu garai n sharin ya shi yang, ‘nanhte akyu hpyi yang, ga bai kahtap htap hkum rai nga myit’ ngu nna tsun wa ai. (Mahte 6:7) Lama na Yesu gaw, shi sharin ya ai akyu hpyi ga hpe kahtap nna hpyi na matu sharin ya wa ai nga yang htap htuk na kun? Htap htuk na n re. De a malai, akyu hpyi ai shaloi hpa lam ni shalawm nna hpyi ging ai, gara lam ni hpe madung hpyi ra ai nga nna Yesu sharin ya nga ai re. Yesu gara hku sharin ya wa ai hpe dinglik yu ga. Madu a akyu hpyi ga hpe Mahte 6:9-13 hta madun da ai.

Yesu gaw shi a sape ni hpe Wa Yehowa hpang de madung nna akyu hpyi ging ai ngu tsun nga ai re. Raitim, Karai a mying ningsang gaw hpa majaw dai daram ahkyak nna chyoi pra na matu ra ai hpe nang chye ai kun?

Masha labau nnan hpang ai kaw nna, Karai Kasang a chyoi pra ai mying ningsang gaw jahpoi hkrum nga ai. Karai Kasang a hpyen Satan gaw Yehowa hpe masu ai wa, hpan da lam ni hpe uphkang na ahkang n nga ai tingkyeng myit rawng ai wa ngu nna tsun wa ai. (Ningpawt 3:1-6) Masha law law mung Satan maga lawm nna, Karai Kasang gaw grai gumshem ai wa, matai htang chye ai wa re ngu sharin ya nna, Karai Kasang hpe Hpan Madu hku nna n hkap la ma ai. Nkau mi gaw Yehowa ngu ai Karai Kasang a mying ningsang hpe, ga gale Chyum Laika ni kaw na shapraw kau nnna, akyu n jashawn na matu ninghkap ai hku nna n hkungga ai lam madun ma ai.

Karai Kasang gaw n tara ai lam yawng mayawng hpe, tara ai hku jeyang ya na ngu nna Chyum Laika hta tsun da ai. (Ezekela 39:7) Dai lam hku nna anhte a ra kadawn lam ni hpe jahpring shatsup ya na sha n-ga, manghkang ni hpe mung hparan ya na re. Gara hku galaw ya na kun? Yesu a akyu hpyi ga hta lawm ai ga ni gaw mahtai jaw mat na re.

Dai ni aten hta amying hkam Hkristan law law gaw, Karai a Mungdan hte seng nna amyu myu sharin ya ma ai. Karai Kasang lata da ai Hkye La Madu Meshia gaw, ndai mungkan ga hpe garam lajang nna galai shai ya na Karai a Mungdan hpe uphkang na re ngu nna, shaning law law kaw na Karai a myihtoi ni tau hkrau tsun wa ai. Karai a Mungdan lam hpe Yesu a ga madat ai ni chye da ma ai. (Esaia 9:6, 7; Daniela 2:44, 45) Karai a Mungdan gaw Satan a masu magaw lam ni hpe madun dan nna, shi hte shi a nhkru n kaja lam yawng hpe jahten kau ya ai hku nna, Karai a mying ningsang hpe chyoi pra shangun na re. Majan, machyi makaw lam, hku hku ai lam sha n-ga, si hkrung si htan hpe mung yeng seng kau ya na re. (Shakawn 46:9; 72:12-16; Esaia 25:8; 33:24) Karai a Mungdan du wa u ga ngu nang akyu hpyi yang, lahta hta tsun wa ai ga sadi ni hpring tsup wa u ga ngu nna akyu hpyi nga ai re.

Karai a myit sumsing lamu kaw dik nga ai hte maren, ga ntsa hta mung dik wa na ngu ai hpe Yesu a ga ni kaw na chye lu ai. Sumsing lamu hta Karai a myit n dik hkra pat shingdang n lu ai hpe sakse madun wa sai. Gara hku sakse madun wa ai kun? Karai a Kasha gaw, Satan hte shi hpang hkan ai ni hpe majan gasat nna, sumsing lamu kaw na ginding aga de jahkrat kau ai. (Shingran 12:9-12) Madu a akyu hpyi ga kaw na numbat masum ga yan gaw, numbat langai ga yan zawn sha tinang myit ra ai hku n re ai sha, Karai a myit ra ai lam hpe madung da shangun ai. Karai a myit ra ai lam gaw, hpan da hkrum ai ni a matu galoi mung kaja htum re. Hkum tsup ai Yesu Hkristu pyi shi Wa hpe ndai hku tsun wa ai: “ngai ra ai hku n rai, nang ra ai hku she rai u ga.”​—Luka 22:42.

Anhte ra kadawn ai lusha ni a matu akyu hpyi mai ai ngu nna Yesu matut tsun ai. Lani mi a ra kadawn lam ni a matu hpyi ai gaw n shut ai. Dai hku galaw ai gaw, Yehowa gaw “yawng mayawng hpe hkrung ai asak, nsoi nsa hte arai hkum sumhpa jaw ya ai wa rai nga ai” hpe myit dum shangun ai. (Kasa 17:25) Karai Kasang gaw shi a kashu kasha ni a ra kadawn lam ni hpe sharawng awng let jaw ya ai kanu kawa re ngu nna Chyum Laika hta tsun da ai. Tsawra myit hte hpring ai kanu kawa zawn sha Yehowa mung, anhte a matu akyu n nga ai lam ni hpe hpyi shawn na n re.

Karai Kasang hpe kaja wa anhte hka kap nga ai kun? Shi a mara raw ya ai lam hpe kaja wa ra ai kun? Dai ni aten hta, masha law law gaw mara ngu ai gaw hpa hpe tsun ai re ngu ai hpe atsawm n chye na ai sha n-ga, mara hpe ahpa atang sha myit ma ai. Mara ngu ai gaw sawng dik htum manghkang ni a npawt re. Dai mara a majaw sha, shinggyim masha ni si ra ai nga nna Chyum Laika hta tsun da ai. Shinggyim masha ni gaw shangai ai kaw na mara kap wa ai majaw, chyahkring hkring mara galaw hkrup ma ai. Dai majaw, shinggyim masha ni a langai sha re ai myit mada lam gaw, Karai Kasang a mara raw ya ai lam hta sha madun ai. (Roma 3:23; 5:12; 6:23) “Madu e, nang mai kaja nga nna, mara raw kau ya ndai” ngu Chyum Laika hta tsun da ai gaw myit simsa hpa re.​—Shakawn 86:5.

Karai a makawp maga lam hpe hkyak hkyak ra kadawn nga ai hpe nang chye ai kun? “N hkru ai wa” shing nrai Satan nat nga ai hpe masha law law gaw n kam ma ai. Raitim, Satan kaja wa nga ai ngu Yesu tsun wa ai sha n-ga, shi hpe “mungkan ga a Du” ngu nna pyi shaga wa ai. (Yawhna 12:31; 16:11) Satan gaw shi uphkang nga ai mungkan ga hpe jahten sharun nga ai. Dai sha n-ga, nang hpe mung jahten nga ai, Yehowa Karai Kasang hte mung hku hkau lam htenza mat hkra galaw nga ai. (1 Petru 5:8) Raitim, Yehowa gaw Satan htan grau atsam kaba ai majaw, shi hpe tsawra ai ni hpe makawp maga ya mayu ai.

Ya hkaja wa ai Yesu a akyu hpyi ga kaw na madung lam ni hpe sha, anhte akyu hpyi ra na kun? N re. Chyum Laika hta Karai Kasang hte seng nna ndai hku tsun da ai: “Karai Kasang a myit ai hku hte maren, anhte lama ma hpyi ga yang gaw, shi anhte hpe madat mara na ra ai.” (1 Yawhan 5:14) Dai majaw, Karai Kasang hpe akyu hpyi na daram na a manghkang ni gaw akyu n rawng ai ngu nna hkum shadu.​—1 Petru 5:7.

Rai yang, gara aten hte gara shara kaw akyu hpyi na kun?