•   “Miwa mung hta ‘sawng dik htum’ kahtet nsa lai mat ai majaw, hkraw hkun htum ginhtawng ta ngu, masat hkrum ai gaw masum lang rai sai lam, shiga lu ai.”​—The Guardian shi laika, September 7, 2022.

•   “Ahprika a ginra nkau mi hta grai sawng ai jan gri lam byin ai gaw, manga ning daram rai wa nga ai.”​—UN Shiga, August 26, 2022.

•   “Urawpa a htam masum hta na htam lahkawng daram gaw, jan gri ai shoihpa hte hkrum nga ai. Shaning 500 laman, sawng dik htum mai byin ai.”​—BBC Shiga, August 23, 2022.

 Jan gri ai shoihpa gaw matut nga taw nna, grau sawng wa na masa nga ai ngu hpaji du law law maram da ai. Htawm hpang a matu grau kaja ai myit mada lam nga ai kun? Chyum Laika hta hpa tsun ai kun?

 Anhte a aten hte seng nna Chyum Laika hta ndai hku tau hkrau tsun ai:

•   “Shara kaga kaga hta e . . . hku hku wa ai mung, byin na ra ai.”​—Luka 21:11.

 Jan gri ai a majaw malu masha taw wa ai. Malu masha taw ai majaw masha ni jamjau let asak si sum nga ai. Ndai lam ni gaw Chyum Laika hta myihtoi da ai hte maren hpring tsup nga ai re.​—Shingran 6:6, 8.

 Jan gri lam grau sawng wa ai madung lam hpe Chyum Laika hta ndai hku tsun da ai:

•   “Shinggyim masha gaw . . . tinang lagaw lahkam hpe hkang lu ai n rai.”​—Yeremia 10:23.

 Tsun mayu ai gaw, masha ni a “lagaw lahkam hpe hkang lu” ai atsam (sh) masha shada hpe awng dang hkra uphkang lu ai atsam, masha ni hta n nga ai. Uphkang ai ni a shut ai dawdan ai lam ni a majaw, jan gri ai, hka taw ai lam ni byin wa ai.

•   Shinggyim masha a galaw ai lam ni a majaw, mungkan ting kahtet lum wa ai, jan gri nna hka taw ai lam ni byin wa ai re ngu, hpungtang hpaji du law malawng myit hkrum ma ai.

•   Law hpa ai myit hte, byin wa na masa ni hpe n myit ai sha, tara ni jahkrat ai majaw, hpun kawa ni krin wa ai, nbung ni n san seng wa ai, shingra nhprang sut rai ni hpe shut ai hku akyu jashawn wa ai. Dai majaw, hka lu la ai madung shara ni hten za wa ai.

 Raitim, Chyum Laika hta myit mada lam jaw da ai.

 Karai Kasang gaw, ndai zawn hka taw ai manghkang ni hpe hparan ya na ngu, Chyum Laika hta ga sadi jaw da ai. Gara hku nna kun?

1.  1. Karai Kasang gaw, “lamu ga jahten shabyak kau ai ni hpe bai jahten shabyak kau na” re. (Shingran 11:18) Lawhpa myit, nhkru ai myit ni a majaw, hka taw ai lam byin shangun ai ni, shingra maka hpe jahten ai ni hpe yeng seng kau na re.​—2 Timohti 3:1, 2.

2.  2. “Kahtet kabrim ai zaibru jang hta hka lawng, hkraw hkun ai ga hta hka hpawk, hpaw na ra ai.” (Esaia 35:1, 6, 7) Jan gri ai a majaw hten za nga ai ndai mungkan ga hpe, hka law htam ai hte tsit tsawm ai sun byin hkra Karai Kasang galaw ya na re.

3.  3. “Aga hpe nang kawan yu nna, madit ya nga ndai; Nang dai hpe law law jasau wu ai; . . . nai mam hpe nang shatut ya mu ai.” (Shakawn 65:9) Karai Kasang a shaman chyeju a majaw, mungkan ga hta yawng a matu, n-gun lu ai malu masha ni, san seng ai hka ni law htam nga na re.