Jaw ai hte shut ai hpe asan sha mu na matu grau yak wa ai kun? Ya prat na masha ni hpe yu yang, tengman ai lam, jaw ai lam hpe hkap la ai hta na, tinang a hkamsha lam, ningmu ni hpe sha, jaw ai ngu sawn la nga ai. Ga shadawn, kade n na shi ai aten hta, “jaw ai hta grau ai” ngu ai ga si grau lang wa ai. a Dai ga si gaw, mungkan ting na masha law malawng a myit jasat hpe madun dan nga ai. Tengman ai lam n nga ai ngu ai ningmu re.

 Gaja nga yang, dai ningmu gaw moi kaw na nga wa ai. Lai wa sai shaning 2,000 daram hta mung, Roma munggyi Pilat gaw, Yesu hpe “teng man ngu ai gaw hpa rai ta?” ngu nna ntsen ai myit hte san wa ai. (Yawhan 18:38) Yesu mahtai jaw ai hpe pyi n la tim, Pilat san dat ai ga san gaw grai ahkyak ai ga san re. Tengman ai lam hte seng nna, myit dik lam jaw ai mahtai hpe Chyum Laika hta mu lu ai. Jaw ai shut ai hpe ginhka yak ai ndai mungkan hta, jaw ai lam hpe mu na matu Chyum Laika karum ya na re.

Tengman ai lam nga gaw nga ai kun?

 Nga ai. Chyum Laika hta tsun ai “teng man” ngu ai ga si gaw, jaw ai shiga, ding hpring ai akyang lailen tsang madang hpe tsun ai. “Teng man ai Karai Wa Yehowa” b gaw, jet ai tengman lam a Npawt re ai ngu Chyum Laika hta tsun ai. (Shakawn 31:5) Karai Kasang kaw na tengman lam hpe Chyum Laika hta tsun da nna, dai tengman lam gaw, jaw ai shut ai hpe ginhka yak ai ndai mungkan hta, jaw ai lam hpe dan dan leng leng mu lu hkra nhtoi zawn lam madun ya lu ai.—Shakawn 43:3; Yawhan 17:17.

Tengman ai lam hpe gara hku tam lu ai kun?

 Tinang a hkamsha lam, Chyum Laika tengman lam hpe myi di chyip kam na malai, tinang a hkamsha lam hta n madung ai sha, “chye ginhka lu” ai atsam hpe akyu jashawn nna, Chyum Laika hpe sawk sagawn na matu, anhte hpe Karai Kasang saw shaga da ai. (Roma 12:2) Tinang a “myit mang mahkra” hpe akyu jashawn nna, shi a lam chye wa nna, tsawra na matu ra sharawng ai. Chyum Laika kaw na chye wa ai lam gaw, tengman ai lam re ai hpe kam hkra galaw na matu n-gun jaw da ai.—Mahte 22:37, 38; Kasa 17:11.

Masu ga hpe kadai tsun hpang wa ai kun?

 Masu ga gaw, Karai a hpyen “masu magaw ai a kawa” Nat Satan tsun hpang wa ai ngu Chyum Laika hta tsun ai. (Yawhan 8:44) Shawng nnan na shinggyim masha ni hpe Karai a lam masu tsun wa ai. (Ningpawt 3:1-6, 13, 17-19; 5:5) Dai aten kaw nna, Satan gaw masu ga ni hpe matut shabra wa ai. Karai hte seng ai tengman ai lam hpe makoi magap da ai.—Shingran 12:9.

Dai ni aten masu ga tsun ai gaw hpa majaw yu maya sha byin nga ai kun?

 “Hpang jahtum na nhtoi” ngu Chyum Laika hta tsun da ai ya aten hta, Satan gaw shawoi na hta grau nna hkalem nga ai. Masha ni gaw, kaga masha ni hpe hkalem nna, ahkaw ahkang la na matu, masu ga tsun ai gaw yu maya sha rai nga sai. (2 Timohti 3:1, 13) Dai ni aten na nawku hpung law malawng hta mung, masu ai lam gaw yu maya sha rai nga sai. Anhte a aten hte seng nna Chyum Laika hta tau hkrau tsun da ai hte maren, masha ni gaw, “tinang a myit kayut ai hku hte maren, tinang a matu mara sara shalaw la” nna, “teng man ai ga hpe na layawng kau” na matu lata ma ai.—2 Timohti 4:3, 4.

Tengman ai lam gaw hpa majaw ahkyak ai kun?

 Masha ni gaw, langai hte langai kam mai na matu tengman ai lam ra ai. Kam ai lam n nga yang, hku hkau lam raitim, uhpung raitim, ngang kang na n re. Anhte a nawku dawjau lam gaw, tengman lam hta madung na hpe Karai Kasang ra sharawng ai ngu Chyum Laika hta tsun da ai. “[Karai Kasang] hpe naw ku ai ni gaw, wenyi hta mung, teng man ai hta mung, naw ku” ra ai ngu tsun da ai. (Yawhan 4:24) Chyum Laika tengman lam gaw, nawku htung hte seng ai masu ga ni hpe ginhka lu na matu, dai kaw na lawt na matu karum ya lu ai lam hpe “Karai Kasang Hpe N Hkungga Shangun Ai Masu Ga Ni” (Myen) matut manoi sumhpa hpe hti yu u.

Karai Kasang gaw tengman lam hpe hpa majaw chye shangun mayu ai kun?

 Hkye hkrang la hkrum shangun mayu ai majaw re. Dai majaw, Karai Kasang hte seng ai tengman lam hpe sharin la ra ai. (1 Timohti 2:4) Jaw ai shut ai hte seng ai Karai a tsang madang ni hpe sharin la nna, hkan sa yang, Karai hte hku hkau lu na. (Shakawn 15:1, 2) Masha ni tengman ai lam sharin la lu hkra, karum ya na matu Karai Kasang gaw Yesu hpe mungkan ga de shangun dat ai re. Karai Kasang gaw, Yesu sharin ya ai lam ni hpe madat shangun mayu ai.—Mahte 17:5; Yawhan 18:37.

Masu ga ni hpe Karai Kasang yeng seng kau na kun?

 Yeng seng kau na. Kaga ni hpe masu nna, ahkaw ahkang la ai hpe Karai Kasang nju ndawng ai. Matut masu na matu dawdan da ai ni hpe, mungkan ga kaw na yeng seng kau na ngu ga sadi jaw da ai. (Shakawn 5:6) Karai Kasang dai hpe galaw ai shaloi, “teng man ai n-gup gaw, dinggrin a nga nga ai” ngu ai ga sadi hpe mung shadik ya na re.—Ga Shagawp 12:19.