“Madu a shana shat sha” poi, hpang jahtum shana shat, Yesu a Myit Dum Poi nga nna chye da ai Madu a shana shat sha poi hpe Chyum Laika hta madun da ai hte maren Yehowa Sakse ni tup hkrak galaw ma ai. (1 Korinhtu 11:20) Raitim, dai poi hte seng nna kaga nawku hpung nkau mi a kam sham lam hte galaw ai lam ni gaw Chyum Laika hta madung n tawn ai.

 Madu a shana shat sha poi galaw ai yaw shada lam gaw, Yesu hpe dum na matu hte anhte a matu si hkam ya wa ai hpe chyeju dum ai lam madun na matu re. (Mahte 20:28; 1 Korinhtu 11:24) Ndai poi gaw poidaw, chyeju shakawn ai, mara raw kau hkrum ai zawn re ai chyoi pra kumla (sacrament) hpe madun ai nawku htung lailen langai n re. a Anhte a mara ni raw kau hkrum ai gaw nawku htung a majaw n re ai sha, Yesu hpe kam sham ai majaw re nga nna Chyum Laika hta tsun da ai.​—Roma 3:25; 1 Yawhan 2:1, 2.

 Yesu gaw shi a sape ni hpe Madu A Shana Shat Sha Poi galaw na matu htet da tim, kade daram na yang kalang galaw ra na nga nna tup hkrak n tsun da ai. (Luka 22:19) Nawku hpung nkau mi gaw shata shagu galaw ra ai, nkau mi chyawm gaw bat shagu, shani shagu shing nrai htap htuk ai gara aten raitim b galaw ging ai nga nna tsun ma ai. Raitim, myit yu ra ai lam nkau mi hpe lawu kaw madun da ai.

 Yesu gaw Yuda ni a Shalai Wa Ai Poi galaw ai shani hta Madu A Shana Shat Sha Poi hpe galaw hpang wa nna, dai shani hta sha, shi si mat wa ai. (Mahte 26:1, 2) Dai gaw ang sha-a byin ai lam n re. Chyum Laika hta Yesu a shagu hkungga hpe Shalai wa ai hkungga hte shingdaw da ai. (1 Korinhtu 5:7, 8) Shalai Wa Ai Poi hpe laning mi hta kalang sha galaw wa ai. (Pru Mat 12:1-6; Jaw Jau 23:5) Dai zawn sha, shawng nnan na Hkristan ni c gaw Yesu si ai hpe myit dum ai Myit Dum Poi hpe, laning mi hta kalang sha galaw wa ai majaw, Yehowa Sakse ni mung dai zawn sha hkan galaw ma ai.

 Dai poi hpe Yesu galaw dan wa ai lam gaw, Myit Dum Poi hpe kade lang galaw na hpe sha n-ga, gara shani hte gara aten hta galaw ra ai hpe mung chye na shangun ai. Shata jan hpe madung tawn nna galaw da ai Chyum Laika hku hkan ai shata hti laika a A.D. 33, Nisan 14 ya shana, jan shang ngut ai hpang she dai poi hpe shi galaw wa ai. (Mahte 26:18-20, 26) Anhte ni gaw shawng nnan na Hkristan ni galaw wa ai hku hkan nna, shaning shagu dai shani hta sha Myit Dum Poi hpe galaw ga ai. d

 A.D.33, Nisan 14 ya gaw bat manga ya shani ang ai. Ladu hkrum nhtoi ang ai shani gaw laning mi hte laning mi n bung ai. Shaning shagu Nisan 14 ya nhtoi hpe masat lu na matu, ya prat na Yuda shata hti laika (Jewish calendar) hpe n lang ai sha, Yesu prat hta lang wa ai shata hti laika hpe sha anhte lang ga ai. e

 Yesu gaw Shalai Wa Ai Poi kaw nna ngam ai matsi n rawng ai muk hte tsabyi jahku hte sha, Madu A Shana Shat Sha Poi hpe nnan hpang galaw wa ai. (Mahte 26:26-28) Shi galaw wa ai hpe kasi la ai hku nna, anhte ni mung matsi hte kaga hpa mung n gayau da ai muk hte tsabyi jahku ajet hpe lang ai. Dwi ai, lu pyaw ai, manam pyaw ai ni lawm ai tsabyi jahku hpe n lang ga ai.

 Yehowa Sakse Hpung n re ai kaga hpung nkau mi gaw matsi lawm ai muk hte galaw ai. Raitim, Chyum Laika hta matsi hpe mara hte akyang hten za ai lam a masat dingsat hku nna lang da ai. (Luka 12:1; 1 Korinhtu 5:6-8; Galati 5:7-9) Dai majaw, matsi hte kaga arai ni n lawm ai muk sha, Hkristu a mara n rawng ai hkum hpe masat dingsat hku madun na matu htap htuk nga ai. (1 Petru 2:22) Chyum Laika hta n lawm ai htung langai hpe mung Church nkau mi galaw ma ai. Dai gaw, tsabyi jahku ajet shara hta dwi ai lama ma hte gayau da ai tsabyi si ntsin hpe malai lang ai lam re. Hpa majaw nga yang, tsa chyaru tsep kawp n mai lu ai ngu shanhte hkrai shanhte tara jahkrat nna, dai hpe n tawt lai mayu ai majaw re.​—1 Timohti 5:23.

 Myit Dum Poi hta lang ai matsi n lawm ai muk hte tsabyi jahku gaw Hkristu a hkum hte sai a matsat dingsat re. Masha nkau mi kam sham ai zawn, dai masat dingsat ni gaw Yesu a sai hte hkum shan majing hku nna, mau hpa lam hku galai shai mat ai n re. Shing nrai hkum shan, sai hte gayau mat ai n re. Dai lam hpe chye na na matu Chyum Laika hpe madung tawn nna yu yu ga.

•   Lama na, Yesu gaw shi a sape ni hpe shi a sai lu na matu htet da ai nga yang, dai gaw sai hte seng nna Karai Kasang a Tara hpe tawt lai na matu tsun ai hku byin mat na. (Ningpawt 9:4; Kasa 15:28, 29) Dai gaw gara hku mung n mai byin ai. Sai a chyoi pra ai lam hte seng nna, Karai Kasang a tara ni hpe tawt lai na matu, kaga masha ni hpe Yesu galoi mung n tsun wa ai.​—Yawhan 8:28, 29.

•   Kasa ni gaw Yesu a sai majing hpe lu na matu n mai byin ai. Hpa majaw nga yang, dai aten hta Yesu gaw asak naw hkrung nga nna shi a sai mung n hkaw shi ai majaw re.​—Mahte 26:28.

•   Yesu gaw shagu hkungga hpe “kalang mi hte ngut hkra” nawng ya wa ai. (Hebre 9:25, 26, JCLB) Lama na, Madu A Shana Shat Sha Poi aten laman hta, muk hte tsabyi jahku gaw sai hte hkum shan hku nna galai shai mat wa yang, Yesu gaw shagu hkungga hpe lang law law, hkungga nawng ya ai hku byin mat na re.

•   Yesu gaw: “Ngai hpe adum nga na matu ndai galaw mu” nga nna sha tsun wa ai. “Ngai hpe hkungga hku nna nawng na matu ndai galaw mu” nga nna n tsun wa ai.​—1 Korinhtu 11:24.

 Muk hte tsabyi jahku gaw Yesu a sai hte hkum shan ajet hku nna galai shai mat ai nga nna hkap la ai ni gaw, dai makam masham hpe Chyum daw nkau hta madung da ai ngu tsun ma ai. Ga shadawn, ga gale Chyum Laika law law hta, Yesu gaw tsabyi jahku hte seng nna “nye a asai rai nga li ai” ngu tsun ai lam ka da ai. (Mahte 26:28) Raitim, Yesu tsun ai dai ga yan hpe “dai gaw nye a sai hpe tsun mayu ai,” “dai gaw nye a sai a malai re,” “dai gaw nye a sai ngu ai lachyum re” nga nna mung ga gale da ai. f Yesu gaw shi galoi mung galaw nga ai hte maren, ga shadawn hpe akyu jashawn nna sharin achyin ya nga ai re.​—Mahte 13:34, 35.

 Yehowa Sakse Ni galaw ai Madu A Shana Shat Sha Poi hta masha kachyi mi sha, muk hte tsabyi jahku hpe lu ai, sha ai. Hpa majaw kun?

 Yesu ru jaw wa ai sai gaw, Yehowa hte moi na Israela ni tawn wa ai ga shaka shara hta malai shang wa ai “ga shaka ningnan” hpe shagrin ya ai re. (Hebre 8:10-13) Ga shaka ningnan hta lawm ai masha ni gaw, Myit Dum Poi masat dingsat re ai muk hte tsabyi jahku hpe lu ai, sha ai. Hkristan yawng n sha ai. Laksan hku nna, Karai Kasang “shaga la hkrum ai ni” sha, lu ai, sha ai. (Hebre 9:15; Luka 22:20) Shanhte ni gaw Hkristu hte arau sumsing lamu hta uphkang na ni rai nna, dai laksan ahkaw ahkang hpe marai 144,000 sha lu la na nga nna Chyum Laika hta ka da ai.​—Luka 22:28-30; Shingran 5:9, 10; 14:1, 3.

 “Sagu hpung kaji” nga nna shaga hkrum ai shanhte ni gaw Hkristu hte arau uphkang na rai nna, Yehowa Sakse law malawng gaw mungkan ga ntsa hta asak hkrung na “wunawng wuwa kaba” hta lawm na matu myit mada ga ai. (Luka 12:32; Shingran 7:9, 10) Mungkan ga hta asak hkrung na matu myit mada ai anhte ni gaw, Myit Dum Poi masat dingsat ni hpe n sha tim, arau shang lawm ai hku nna anhte a matu Yesu galaw ya wa ai shagu hkungga hpe chyeju dum ai lam madun ga ai.​—1 Yawhan 2:2.