No kwĩthĩwa ũlilikene Gail, ũla ũwetiwe kĩlungunĩ kĩvĩtu ĩkasetinĩ yĩĩ ayasya ndesĩ kana akesa kũeka kwĩthĩwa na kyeva nũndũ wa kũkw’ĩĩwa nĩ mũũme, Rob. Ĩndĩ e na mea ma kwĩsa kwona mũũme wake nthĩnĩ wa nthĩ nzaũ ĩla Ngai ũtwathĩte. Gail aĩtye atĩĩ: “Ĩandĩko yĩla nendete mũno nĩ Ũvuan’yo 21:3, 4.” Ĩandĩko yĩu yaĩtye: “Ngai mwene akeethĩwa vamwe nao, Ngai woo: na akavyaĩa methoi onthe methonĩ moo; na kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.”

Gail aĩtye: “Ĩandĩko yĩu nĩyĩminĩte maũndũ onthe vyũ. Nĩnĩmew’ĩaa tei andũ ala makw’ĩĩiwe nĩ andũ moo na matesĩ kana ve wĩkwatyo wa kwĩsa kũmona ĩngĩ me thayũ.” Gail nĩwĩkĩte kwosana na mũĩkĩĩo wake kwa kwĩyumya ethĩwe e mũtavany’a wa ĩvinda yonthe nĩ kana atavye atũi make ĩũlũ wa watho wa Ngai ũla wonanĩtye kana “kĩkw’ũ kĩikethĩwa vo ĩngĩ.”

No kwĩthĩwa ũisũanĩa kana nĩ vinya mũno ndeto isu kwĩanĩa. Ĩndĩ kwasũanĩa ngelekany’o ya mũndũũme weetawa Yovu, ũla waĩ mũwau mũno vyũ. (Yovu 2:7) O na kau Yovu akũlasya keka nũkw’a, aĩ na mũĩkĩĩo kana Ngai e na ũtonyi wa kũthayũũkya ala makwie mekale vaa nthĩ. Aisye atĩĩ: “A! Kethĩwa ũkambitha nthĩnĩ wa Seoli . . . Naku wĩthĩwa wĩtana, nakwa ngakwĩtĩka: Ũkeethĩwa na mea ma wĩa wa moko maku.” (Yovu 14:13, 15) Yovu ndaĩ na nzika kana Ngai wake aĩ na mea na wendi wa kũmũthayũũkya.

O mĩtũkĩ, nthĩnĩ wa nthĩ nzaũ, Ngai akathayũũkya Yovu, na andũ angĩ aingĩ ala makwie. (Luka 23:42, 43) Nthĩnĩ wa ĩvuku ya Meko ma Atũmwa 24:15, Mbivilia nĩyonanĩtye kana “kũkeethĩwa ũthayũũkyo.” Nake Yesũ aisye atĩĩ: “Mũikaseng’e kwondũ wa ũu: nũndũ saa nĩwũkĩte, yĩla onthe ala me mbũanĩ makew’a wasya wake, namo makauma.” (Yoana 5:28, 29) Yovu akeeyonea watho ũsu ũyĩanĩa. E na wĩkwatyo wa kwĩsa kwona ĩvinda yĩla ‘ũkasyoka mĩthenyanĩ ya wana wake,’ na mwĩĩ wake ũyĩthĩwa wĩ “mwololo kwĩ wa kana.” (Yovu 33:24, 25) O na ũu now’o vakethĩwa kwa andũ onthe ala mamũtũngĩaa Ngai mũvea nũndũ wa watho wake wa kũthayũũkya ala makwie nĩ kana meĩkala vaa nthĩ.

Ethĩwa nũũmĩĩte ngoonĩ mũno nũndũ wa kũkw’ĩĩwa nĩ mũndũ ũmwendete, no kwĩthĩwa maũndũ ala twaneenea matatonya kũvetanga vyũ kyeva kĩla wĩ nakyo. Ĩndĩ wasũanĩa kwa ũliku mawatho ma Ngai ala me Mbivilianĩ, ũkakwata wĩkwatyo na vinya wa kũendeea na mbee.—1 Athesalonika 4:13.

No wende kwĩmanyĩsya maũndũ maingĩ ĩũlũ wa ũndũ waĩle kwĩka ĩla wakwatwa nĩ kyeva? Kana no wĩthĩwe wĩkũlasya makũlyo makonanĩtye na ũndũ ũsu ta “Nĩkĩ Ngai wĩtĩkĩlĩtye kwĩthĩwe na mathĩna na ũthũku?” Twĩũkũlya ũlike Kĩsesenĩ kitũ kya jw.org/kam nĩ kana wone ũndũ Mbivilia ĩsũngĩĩte makũlyo asu kwa nzĩa ĩtonya kũũkiakisya.