Kĩla Mbivilia Yaĩtye Ĩũlũ wa Ũla Ũseo na Ũla Ũthũku no Kĩtũtethye Mũno
Andũ milioni mbingĩ nĩmeyoneete kana myolooto ya Mbivilia nĩtethasya na no mamĩkwatye maũndũnĩ aa ana.
1. Mũtwaano
Andũ methĩawa na mawoni me kĩvathũkanyʼo ĩũlũ wa mũtwaano na kĩla matonya kwĩka maũtanĩe.
MBIVILIA YAĨTYE: “Kĩla ũmwe wenyu no nginya ende kĩveti kyake o ũndũ wĩyendete mwene; nakyo kĩveti kyaĩle kũmũnenga mũũme wakyo ndaĩa nene.”—Aeveso 5:33.
KĨLA YONANASYA: Ngai nĩwe wambĩĩisye mũvango wa mũtwaano, na kwoou nĩwĩsĩ kĩla ala me mũtwaanonĩ maĩle kwĩka methĩwe me atanu. (Maliko 10:6-9) Nĩ kana methĩwe na ũtanu wa wʼo, maĩlĩte kũsũanĩa ũndũ kĩla ũmwe ũtonya kũlũlũmĩĩlya mũtwaano woo, ĩndĩ ti ũndũ ũkũunĩka. Mũndũũme wendete kĩveti kyake nũkĩthĩnĩkĩaa na akĩkuaa nesa. Nakyo kĩveti kĩnengete mũũme ndaĩa nĩkĩmũkwataa mbau na kĩmũneenasya nesa.
ŨTAO WA MBIVILIA NŨTETHASYA: Mũndũũme wĩtawa Quang na mũka, Thi, ala mekalaa Vietnam meewʼaa ta matethĩwa na ũtanu mũtwaanonĩ woo. Quang ndakuaa mũka nesa. Aĩtye, “Ndyathĩnĩkĩaa ũndũ ũkwĩwʼa, na nĩnamwĩkĩĩthasya nthoni.” Nake Thi endaa mathasye mũtwaano woo. Aĩtye, “Ndyewʼaa nĩsa kũĩkĩĩa mũemewa ĩngĩ kana kũmũnenga ndaĩa.”
Mũthya, Quang na Thi nĩmamanyie kĩla Mbivilia ĩmanyĩasya na ũndũ matonya kũtũmĩa ĩandĩko ya Aeveso 5:33 mũtwaanonĩ woo. Quang aĩtye: “Mũsoa ũsu nĩwandetheeisye kwona vata wa kũkuaa Thi nesa, kũmwonyʼa kana nĩnĩmwendete, na kũthĩnĩkĩa mavata make ma kĩ-mwĩĩ na ma ngoonĩ. Neeka ũu, nĩnonaa nũmbendete na nũnengete ndaĩa.” Nake Thi aĩtye, “O ũndũ naatĩĩa kĩla ĩandĩko ya Aeveso 5:33 yonanĩtye na nanenga mũemewa ndaĩa, nowʼo nĩwʼaa ambendete mũnango, nĩ mũsũvĩĩku, na nĩ na mũuo.”
Nĩ kana ũkwate ũvoo mwingangĩ ĩũlũ wa mũtwaano, soma ĩkaseti ya Amkeni! ya Na. 2 2018 yĩ na kyongo, “Maũndũ 12 Matonya Kwaĩlya Mĩsyĩ” nthĩnĩ wa jw.org/kam.
2. Kũkua Angĩ Nesa
Andũ makothaa kũkua angĩ naĩ nũndũ wa ũko woo, nthĩ yoo, ũndũ mailye, ndĩni yoo, kana ala matusaa kũmanyana kĩ-mwĩĩ namo.
MBIVILIA YAĨTYE: “Nengai andũ ma mĩthemba yonthe ndaĩa.”—1 Vetelo 2:17.
KĨLA YONANASYA: Mbivilia ndĩmanyĩasya andũ mamene angĩ nũndũ wa ũko woo, kwĩthĩwa me aũme makomaa na aũme kana aka makomaa na aka, kana nũndũ wa kwĩthĩwa me ma nthĩ ĩngĩ. Vandũ va ũu, ĩtwĩkĩaa vinya tũnenge ndaĩa andũ ma mĩthemba yonthe o na methĩwe nĩ ma ũko wĩva, nthĩ yĩva, nĩ athwii, kana nĩ ngya. (Meko ma Atũmwa 10:34) O na ethĩwa tũikwĩtĩkĩlana na kĩla angĩ maĩkĩĩaa kana mekaa, no tũmakue nesa na tũkamanenga ndaĩa.—Mathayo 7:12.
ŨTAO WA MBIVILIA NŨTETHASYA: Mũndũũme wĩtawa Daniel amanyĩiwʼe kwonaa andũ ma Asia ta mũisyo kwa nthĩ yake. Nĩwamenete andũ onthe maumĩte Asia na nĩwamaumangaa akomana namo kũndũ kwĩ na andũ aingĩ. Aĩtye: “Neetavasya nĩkwata mbau nthĩ yakwa. O na ndyonaa maũndũ ala nasũanĩaa kana kwĩka ta mathũku.”
Mũthya, Daniel nĩwamanyie kĩla Mbivilia ĩmanyĩasya. Aĩtye: “Nalasimĩkie kũvĩndũa mosũanĩo makwa vyũ. Nĩnambĩĩie kwona andũ o ũndũ Ngai ũmonaa, na ũu nĩ kwasya, ithyonthe tũi kĩvathũkanyʼo, o na twĩthĩwe tumĩte va.” Daniel nũeleetye ũndũ wĩwʼaa oyu yĩla wakomana na andũ. Aĩtye: “O na ndikothaa kũsũanĩa maumĩte va. Nendete andũ ma mĩthemba yonthe na nĩ na anyanya maumĩte kũndũ kwĩ kĩvathũkanyʼo ĩũlũ wa nthĩ.”
Nĩ kana ũkwate ũvoo mwingangĩ, soma ĩkaseti ya Amkeni! ya Na. 3 2020 yĩ na kyongo, “Je, Inawezekana Kuushinda Ubaguzi?” nthĩnĩ wa jw.org/sw.
3. Mbesa
Andũ aingĩ masembanasya na ũthwii nĩ kana methĩwe me atanu na mayĩthĩwa na ĩvinda yũkĩte ĩseo.
MBIVILIA YAĨTYE: “Ũĩ nĩ ũsũvĩo, o tondũ mbesa nĩ ũsũvĩo; ĩndĩ ũseo mũnene wa ũmanyi nĩ, atĩ ũĩ nũsũvĩaa thayũ wa ũla wĩ nawʼo.”—Mũtavanʼya 7:12.
KĨLA YONANASYA: Mbesa nitũtethesya, ĩndĩ iyĩsa kũtuma twĩthĩwa na ũtanu wa wʼo kana twĩthĩwa na ĩvinda yũkĩte ĩseo. (Nthimo 18:11; 23:4, 5) Vandũ va ũu, kĩla kĩtonya kũtũtetheesya no kũatĩĩa ũĩ wa Ngai ũla wĩ Mbivilianĩ.—1 Timotheo 6:17-19.
ŨTAO WA MBIVILIA NŨTETHASYA: Mũndũũme wĩtawa Cardo wĩkalaa Indonesia nĩwoombanĩtye ũthwii mwingĩ. Aĩtye, “Naĩ na kyonthe kĩla andũ aingĩ mendaa kwĩthĩwa nakyo na nĩnavotie kũtembea kũndũ kwingĩ, kũũa syĩndũ sya thooa mũnene, ngalĩ iana ũna, na nyũmba mbingĩ.” Ĩndĩ ũthwii ũsu wʼonthe waĩ o wa kavinda. Cardo aĩtye: “Ve mũndũ wangengie na ambena mbesa syonthe ila neekĩĩte kĩthito kwa myaka mingĩ nĩikwate. Natũmĩĩte thayũ wakwa ndimantha ũthwii, ĩndĩ mũthya natiiwe ngwʼĩte ngoo nũndũ ndyaĩ na kĩndũ na neewʼaa nĩ vathei.”
Cardo nĩwambĩĩie kũatĩĩa ũtao wa Mbivilia ĩũlũ wa mbesa. Yu ndasembanasya na kũmantha malĩ, ĩndĩ atwʼĩte kwĩkala ateyũmbĩĩe syĩndũ mbingĩ sya kĩ-mwĩĩ. Aĩtye: “Yu nĩwʼaa nĩ na ũthwii wa wʼo nũndũ nĩ na ngwatanĩo nzeo na Ngai. Nĩkomaa ngalĩkwa na nĩthĩawa na ũtanu wa wʼo.”
Nĩ kana ũkwate ũvoo ũeleetye woni wa Mbivilia ĩũlũ wa mbesa, soma kĩlungu “Kyo Kĩsomo na Mbesa no Iũtethye?” ĩkasetinĩ ya Mũsyaĩĩsya ya Na. 3 2021, nthĩnĩ wa jw.org/kam.
4. Kũmanyana Kĩ-mwĩĩ
Andũ methĩawa na mawoni me kĩvathũkanyʼo ĩũlũ wa kĩla kyaĩlĩte maũndũnĩ makonetye kũmanyana kĩ-mwĩĩ.
MBIVILIA YAĨTYE: “[Ĩvathanei] na ũlaalai. Kĩla ũmwe wenyu nĩwaĩle kũmanya ũndũ ũtonya kũsiĩĩa mwĩĩ wake mwene nĩ kana ekale e mũtheu na e na ndaĩa, ate na ĩtomo, mĩmeo ĩtasiĩĩka ya kũmanyana kĩ-mwĩĩ ĩla yĩthĩawa na andũ ma mbaĩ ingĩ ala matamwĩsĩ Ngai.”—1 Athesalonika 4:3-5.
KĨLA YONANASYA: Mbivilia nĩyĩkĩĩte mĩvaka maũndũnĩ makonetye kũmanyana kĩ-mwĩĩ. Ndeto “ũlaalai” yonanasya maũndũ ta kũthi nza wa mũtwaano, kũkũna ũmalwaya, mũndũũme na mũndũ mũka kũmanyana kĩ-mwĩĩ matatwaanĩte, mũndũũme kũkoma na mũndũũme kana mũndũ mũka kũkoma na mũndũ mũka, na mũndũ kũmanyana kĩ-mwĩĩ na nyamũ. (1 Akolintho 6:9, 10) Kũmanyana kĩ-mwĩĩ nĩ mũthĩnzĩo Ngai ũnengete o aũme na aka ala matwaanĩte kwosana na mĩao.—Nthimo 5:18, 19.
ŨTAO WA MBIVILIA NŨTETHASYA: Mũndũ mũka wĩtawa Kylie wĩkalaa Australia aĩtye: “Yĩla ndaĩ mũtwae, nasũanĩaa kana namanyana kĩ-mwĩĩ na mũndũ ngewʼaa ambendete na ainthĩnĩkĩa. Ĩndĩ vayaathi ũu o na vanini. Nĩneewʼaa ndithĩnĩka na ndendetwe.”
Mũthya, Kylie nĩweemanyĩisye kĩla Mbivilia ĩwetete ĩũlũ wa kũmanyana kĩ-mwĩĩ na aatĩĩa maũndũ ala weemanyĩasya. Aĩtye: “Yu nĩnĩyoneete kana Ngai atũnengete myolooto yake nĩ kana atũsũvĩane na woo na kũũmĩa. Oyu nĩwʼaa nĩ mũsũvĩĩku na nendetwe nũndũ nĩ mũtwae na nĩnĩkaa maũndũ ala Yeova wendaa twĩke. Mwa kũatĩĩa ũtao wa Mbivilia nĩkũtumĩte nĩvathana na mathĩna maingĩ!”
Nĩ kana ũkwate ũvoo mwingangĩ, soma kĩlungu, “Mbivilia Yaĩtye Ata Ĩũlũ wa Mũndũũme na Mũndũ Mũka Kwĩkalanyʼa Vamwe Matatwaanĩte Kĩ-Mĩao?” nthĩnĩ wa jw.org/kam.
Mũmbi witũ nũtũtetheeasya kũmanya kĩla kyaĩlĩte na kĩla kĩtaĩlĩte. O na kau kũatĩĩa myolooto yake ya mwĩkalĩle kũyĩthĩawa kwĩ laisi mavinda onthe, nĩkũtũunaa. No tũĩkĩĩe vyũ kana mavinda onthe kũkatumaa twĩkala twĩ atanu.
