Ngai nĩwanengie andũ mũthĩnzĩo wa mwanya mũno, naw’o nĩ ũtonyi wa kũneenaa nake na kũmũtavya maũndũ ala me ngoonĩ syoo kwĩsĩla mboya. Mwathani Ndaviti avoyie atĩĩ: “We ũla wĩw’aa mboya, mĩĩ yonthe ĩkooka kwaku.” (Savuli 65:2) Ĩndĩ tũtonya kũvoya ata nĩ kana Ngai atwĩw’e na aitũathima?

Yĩla ũũmũvoya Ngai, nũkwataa mwanya wa ‘kũmũtulũĩla ngoo yaku,’ kana kũmũtavya vyũ ũndũ ũkwĩw’a. (Savuli 62:8) Ngai Mwene Vinya W’onthe nĩwendete kwĩthukĩĩsya mboya sya mũndũ ũla ũkũmũvoya kuma ngoonĩ.

O na kau Ngai e masyĩtwa maingĩ ma ũnene, e ĩsyĩtwa yake mwene. We aisye: “Ninyie Yeova, nĩyo syĩtwa yakwa.” (Isaia 42:8) Ĩsyĩtwa yĩu Yeova, yonekaa mavinda ta 7,000 Maandĩkonĩ Matheu. Athani aingĩ nĩmamwĩtaa Ngai na ĩsyĩtwa yake. Kwa ngelekany’o, mwathani Amosi aisye ũũ ĩũlũ wa Ngai: “Nĩwe ũla wakaa nyũmba syake matunĩ, na kũlũlũmĩlya mwambĩlĩlyo wa ũtũo wake nthĩ . . . Yeova nĩyo syĩtwa yake.” (Amosi 9:6) O ta ũu, o naitũ nĩtwaĩlĩte kũtũmĩa ĩsyĩtwa ya Ngai, Yeova, yĩla tũũvoya.

Ngai nũeleawa mosũanĩo maitũ na ũndũ tũkwĩw’a o na ethĩwa twĩvoya na kĩthyomo kĩva. Ndeto yake ĩtũĩkĩĩthĩtye atĩĩ: “Ngai nde kyende, ĩndĩ mbaĩnĩ syonthe mũndũ ũla ũmũkĩaa na wĩkaa ũla waĩle nĩwĩtĩkĩlawa nĩwe.”—Meko ma Atũmwa 10:34, 35.

O vamwe na ũu, nĩ kenda tũathimwe nĩ Ngai, ve maũndũ angĩ twaĩlĩte kwĩka eka o kũvoya. Ilungunĩ ila iatĩĩe, nĩtũũneenea kĩu.