Ngai athie mwathani Avalaamu kana “mbaĩ syonthe sya nthĩ” ĩkaathimwa kwĩsĩla ũsyao wake. (Mwambĩlĩlyo 22:18) Nũũ watw’ĩkie ũsyao ũsu?

Vakuvĩ myaka 2,000 mĩvĩtu, Ngai nĩwanengie Yesũ, ũla waĩ ũsyao wa Avalaamu, ũtonyi wa kwĩka syama nene. Syama isu Yesũ weekie syoonanisye kana ũndũ ũla Ngai wathĩte Avalaamu ũkeanĩa kwĩsĩla vala ve Yesũ.—Akalatia 3:14.

Syama ila Yesũ weekie syoonanisye kana nĩwe wanyuvĩtwe nĩ Ngai aathime andũ. O na nĩsyoonanisye ũndũ Ngai ũkamũtũmĩa kũathima mĩvĩa yonthe ya andũ tene na tene. Kwaekai twone nguma imwe sya kwendeesya sya Yesũ kwa kũsisya syama ila weekie.

Tei—Yesũ nĩwavoasya awau.

Ĩvinda yĩmwe, mũndũ ũmwe wawaĩte mangũ nĩwakũlilye Yesũ amũvosye. Yesũ nĩwamũkiitie, na amwĩa: “Nĩngwenda!” Na vau kwa vau, mũndũ ũsu avoa.—Maliko 1:40-42.

Ũlau—Yesũ nĩwaĩthasya ala maĩ na nzaa.

Yesũ ndendaa andũ maũmĩw’e nĩ nzaa. Na ũu nĩ w’o nũndũ ve mavinda kauta weekie syama na aĩthya andũ ngili mbingĩ kwa kwingĩvya mĩkate mĩnini na makũyũ manini. (Mathayo 14:17-21; 15:32-38) Andũ asu maĩe mavũna vyũ, na matialya lĩu mwingĩ mũno.

Ĩnee—Yesũ nĩwathayũũkisye akw’ũ.

“Tei” nĩwatumie Yesũ athayũũkya mwana wa kĩveti ndiwa kĩla kĩtaĩ na mwana ũngĩ, kana mũndũ wa kũkĩsũvĩa.—Luka 7:12-15.