Megan: Ũvoo waku Shirley. Nĩnĩnatanie mũno nũndũ nũnookie ũmbanonĩ wa kũlilikana kĩkw’ũ kya Yesũ kyumwa kĩla kĩnavĩtie. * Ũnoonie ata ũmbanonĩ ũsu?

Shirley: Nĩnĩneewie mũyo kũka, ĩndĩ ndeũkũvitha ndinaaelewa nĩ maũndũ onthe ala mananeeneiwe. Nĩnĩw’ĩte andũ aingĩ mayasya nĩmalilikanaa kũsyawa kwa Yesũ mũthenya wa Kĩlisimasi na kũthayũũka kwake mũthenya wa Isita ĩndĩ ndyaaĩw’a mũndũ o na ũmwe ũkwasya nũlilikanaa kĩkw’ũ kya Yesũ.

Megan: Kwa w’o Kĩlisimasi na Isita nĩ sikũkũ syĩ nguma mũno ĩũlũ wa nthĩ. Ĩndĩ Ngũsĩ sya Yeova nĩsyonaa wĩ ũndũ wa vata kũlilikana kĩkw’ũ kya Yesũ. Ethĩwa wĩ na ndatĩka nini no nĩkwony’e nĩkĩ twĩkaa ũu.

Shirley: Nĩ sawa, vai thĩna.

Megan: Kĩla kĩtumaa Ngũsĩ sya Yeova ililikana kĩkw’ũ kya Yesũ nũndũ we mwene nĩweeyĩaĩie aatĩĩi make mekae ũu. Kwasũanĩa kĩla kyeekĩkie ũtukũ wa mũthya Yesũ atanamba kũkw’a. Nũlilikene mboka ya mwanya Yesũ waĩe vamwe na amanyĩw’a make aĩkĩĩku?

Shirley: Wĩweta Mesa ya Mwĩaĩi?

Megan: Ĩĩ. Kwa ĩsyĩtwa yĩngĩ yĩtawa Kyaũya kya Wĩoo kya Mwĩaĩi. Maiya kyaũya kĩu Yesũ nĩwameyĩaĩie ũndũ makekaa. Kwasoma ndeto syake ila syĩ ĩandĩkonĩ yĩĩ ya Luka 22:19.

Shirley: Yaĩtye atĩĩ: “Nake oosa kĩmũtũ, na amina kũtũnga mũvea, atilanga, na amanenga, akyasya, Kĩĩ nĩkyo mwĩĩ wakwa ũla wanenganiwe nũndũ wenyu: ĩkaai ũu ũndũ wa kũndilikana.”

Megan: Nĩ mũvea. Kwasisya ndeto ii sya mũthya sya ĩandĩko yĩu. Yesũ ameie: “Ĩkaai ũu ũndũ wa kũndilikana.” Na atanamba kũmatavya ndeto isu, Yesũ nĩwamatavisye nesa kĩla maaĩle kũlilikana ĩũlũ wake. Ameie kana akaumya thayũ wake kwondũ wa aatĩĩi make. Yesũ aeleisye ũndũ ũsu kwa ndeto ingĩ nthĩnĩ wa ĩandĩko ya Mathayo 20:28. Mũsoa ũsu waĩtye atĩĩ: “Mwana wa mũndũ ndaaũka kũthũkũmwa, ĩndĩ nĩ kũthũkũma, na kũnengane thayũ wake wĩthĩwe wovosyo kwondũ wa aingĩ.” Kwa ũkuvĩ, Ngũsĩ sya Yeova ililikanaa kĩkw’ũ kya Yesũ kĩla mwaka nũndũ syĩthĩawa iililikana nthembo ya wovosyo ĩla Yesũ waumisye. Kĩkw’ũ kya Yesũ no kĩtume andũ onthe ala ewi makwata thayũ.

Shirley: Nĩnĩw’ĩte andũ mayasya kana Yesũ akwie nĩ kana twĩkwata thayũ. Ĩndĩ kwa w’o, ndieleawa ũndũ ũu ũtonyeka.

Megan: Tiiwe wĩ weka ũsũanĩaa ũu. Ũvoo ĩũlũ wa nthembo ya wovosyo wĩ maũndũ maingĩ  mũno. Ĩndĩ o na ũu wĩ o vo, ũsu nĩ ũmanyĩsyo ũmwe wa kwendeesya mũno nthĩnĩ wa Ndeto ya Ngai. Ndiasya wĩ o na mwanya tũendeee?

Shirley: Ĩĩ, nĩ na ndatĩka siana ũna.

Megan: Nĩ sawa. Nĩthĩĩtwe ndyĩmanyĩsya ĩũlũ wa nthembo ya wovosyo na nĩngũtata ngũelesye kwa nzĩa yĩ laisi.

Shirley: Aaya.

Megan: Nĩ kana tũelewe wovosyo, no nginya tũkamanya kĩla kyeethĩiwe ĩla Atamu na Eva meekie naĩ me mũũndanĩ wa Eteni. Nĩ kana tũmanye ũndũ veethĩiwe, kwaeka tũsome ĩandĩko ya Alomi 6:23. No ũsome mũsoa ũsu?

Shirley: Ĩĩ. Yaĩtye atĩĩ: “Ĩtuvi ya naĩ nĩ kĩkw’ũ; ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.”

Megan: Nĩ mũvea. Kwaeka tũsũanĩe ndeto isu. Ũndũ wa mbee, kwasisya ũndũ mũsoa ũsu wambĩĩe na kwasya: “Ĩtuvi ya naĩ nĩ kĩkw’ũ.” Ũsu nĩ ũndũ wĩ laisi ũla Ngai wawetie vaaya mwambĩĩonĩ. Kwa w’o mwambĩĩonĩ vai mũndũ waĩ na naĩ. Atamu na Eva moombĩtwe mate na naĩ, na syana syoo syesaa kwĩthĩwa iilyĩ oou. Kwoou andũ mayesaa kũkw’a. Atamu na Eva o vamwe na nzyawa syoo mesaa kwĩkala tene na tene me atanu. Ĩndĩ o tondũ twĩsĩ maũndũ mayaaĩthĩwa mailyĩ ũu, kana?

Shirley: Nĩ w’o nũndũ Atamu na Eva nĩmaĩe ũsyao wa mũtĩ ũla meeaĩwe maikaye.

Megan: Ĩĩ, ĩla Atamu na Eva manyuvie kũlea kũmwĩw’a Ngai nĩmeekie naĩ. Na kwoou manyuva mo ene kwĩthĩwa me ene naĩ. Ũtwi ũsu meekie nĩwamaeteie mathĩna maingĩ vamwe na nzyawa syoo.

Shirley: Wĩenda kwasya ata?

Megan: Kwaeka ngũnenge ngelekany’o. We nĩwendete kũua kyavati?

Shirley: Ĩĩ! Nĩnendete kũkĩua.

Megan: Kwasũanĩa wĩ na kalaĩ ka kũua kyavati ke na yĩima vandũ. Yu wĩona ata? Kyavati kyonthe kĩla kĩkũuwa na kalaĩ kau kĩkeethĩawa kĩilyĩ ata? Nowĩtĩkĩlane nakwa kana kĩkeethĩawa kĩ kĩũngũu vala ve yĩima yĩu?

Shirley: Ĩĩ, ũu nĩ w’o.

Megan: O ta kalaĩ kau, ĩla Atamu na Eva manyuvie kũlea kũmwĩw’a Ngai meethĩiwe na “yĩima,” kana ĩlanga nũndũ wa naĩ ĩla meekie. Na nũndũ meekie naĩ matanamba kũsyaa, syana ila mesaa kũsyaa ĩtina wa vau syaĩ syĩthĩwe na “yĩima.” Ũu nĩ kwasya kana syonthe syaĩ isyawe syĩ na naĩ. Mbivilianĩ, ndeto “naĩ” ndyonanasya o kĩla Atamu na Eva meekie, ĩndĩ nĩyonanasya kĩla kyatũkwatie nũndũ wa naĩ ĩsu. Kwoou, o na kau ti ithyĩ tweekie naĩ ĩsu, o na tũyaĩ asyae ĩla mamĩkie, Atamu na Eva matũlikilye naĩnĩ nũndũ twĩ nzyawa syoo. Na naĩ ĩsu noyo ĩetae kĩkw’ũ. Na o tondũ tũsomie ĩandĩkonĩ ya Alomi 6:23, ĩtuvi ya naĩ nĩ kĩkw’ũ.

Shirley: Ndikwona ũu waĩle. Andũ onthe matonya kũkwatwa nĩ mathĩna ata na nĩ Atamu na Eva meekie naĩ?

Megan: Waneena w’o, ũu ndwaĩle. Ĩndĩ ve maũndũ maingĩ makonetye ũndũ ũsu. Ngai nĩwatũmĩie ũsili wake wa katĩ, na atw’a kana Atamu na Eva maĩle kũkw’a kwondũ wa naĩ syoo, ĩndĩ ũsyao woo nĩwanengiwe wĩkwatyo. Ngai nĩweekie mũvango mũseo nĩ kana atumye thĩnanĩ ũsu asyai asu maitũ matũlikilye. Mũvango ũsu nĩ nthembo ya wovosyo ĩla Yesũ waumisye. Kwasisya ĩngĩ ĩandĩko ya Alomi 6:23. Ĩtina wa mũsoa ũsu kũweta kana “ĩtuvi ya naĩ nĩ kĩkw’ũ,” ũendeee kwasya: “Ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.” Kwoou kĩkw’ũ kya Yesũ nĩkyo kĩtũvingũĩaa nzĩa ya kũvonoka kuma naĩnĩ na kĩkw’ũnĩ. *

Megan: Ve ũndũ ũngĩ ngwenda kũkwony’a mũsoanĩ ũsu.

Shirley: Ũndũ mwaũ?

Megan: Kwoona mũsoa ũsu ũndũ waĩtye: “Mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.” Ethĩwa Yesũ nĩwe wathĩnie na akw’a kwondũ witũ, nĩkĩ mũsoa ũũ ũkwasya kana nthembo ya wovosyo nĩ “mũthĩnzĩo wa Ngai”? Nĩkĩ ũte kwasya kana nĩ “mũthĩnzĩo wa Yesũ”? *

Shirley: Vau nyie ndyĩsĩ.

Megan: Ngai nĩwe woombie Atamu na Eva, na nĩwe mavĩtĩisye ĩla maleile kwĩw’a me mũũndanĩ wa Eteni. No nginya Ngai e Ĩthe woo akethĩwa aũmĩie mũno ngoonĩ ĩla syana isu syake sya mbee syaleile kũmwĩw’a. Ĩndĩ Yeova nĩwoosie ĩtambya na mĩtũkĩ. * Nĩwavangie ũmwe wa syũmbe syake sya veva oke kũũ nthĩ, ethĩwe e mũndũ ũte na naĩ, na ĩtina ayumya thayũ wake wĩthĩwe nthembo ya wovosyo. Kwoou mũvango wa nthembo ya wovosyo waĩ mũthĩnzĩo kuma kwa Ngai. O na ve o ũndũ ũngĩ ũkwonany’a kana nthembo ĩsu yaĩ mũthĩnzĩo kuma kwa Ngai. Nĩwĩthĩwa waasũanĩa ũndũ Ngai weewie ĩla Yesũ wooaiwe?

Shirley: Aiee, ndyaasũanĩa ũndũ ũsu.

Megan: Nĩona vaa wĩ na twĩndũ twa syana twa kũthaũka, no nginya ũkethĩwa wĩ na syana.

Shirley: Ĩĩ, nĩ na twana twĩlĩ, kamwana na kelĩtu.

Megan: Kwasũanĩa ta wĩ mũsyai ũndũ Ĩthe wa Yesũ wa ĩtunĩ, Yeova Ngai, ũtonya kwĩthĩwa eewie mũthenya ũla Yesũ wakwie. Kwa ndeto ingĩ, we wĩona ta weewie ata e ĩtunĩ asyaĩĩsye Mwana wake ũla wendete aikwatwa, akathekeewa, na kũkũnwa ngũmi? Na nĩ ta weewie ata ĩla Mwana wake waathĩĩiwe mũtĩnĩ, na atiwa vau akw’e o kavola kĩkw’ũ kĩ woo?

Shirley: No nginya akethĩwa eewie woo mwingĩ mũno. Ndyaasũanĩa ũndũ ũsu!

Megan: Kwa w’o tũitonya kũmanya nesa vyũ ũndũ Ngai weewie mũthenya ũsu. Ĩndĩ nĩtwĩsĩ kana no nginya ethĩwe eewie woo mũno, na ĩngĩ nĩtwĩsĩ kĩla kyatumie etĩkĩla ũndũ ũsu wĩthĩwe. Ũndũ ũsu ũeleetw’e nesa vyũ ĩandĩkonĩ yĩsĩkĩe mũno ya Yoana 3:16. No ũsome ĩandĩko yĩu?

Shirley: Ĩĩ, yaĩtye atĩĩ: “Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.”

Megan: Nĩ mũvea mũno. Kwasisya ĩngĩ ndeto isu syambĩĩe mũsoanĩ ũsu. Syaĩtye atĩĩ: “Ngai nĩwendete nthĩ.” Nĩwoona kĩla kyatumie Ngai atũma Mwana wake kũũ nthĩ nĩ kana akw’e kwondũ witũ? Nĩ wendo. Kwa w’o nthembo ya wovosyo nĩw’o ũndũ ũla mũnene vyũ wonanasya wendo wa Ngai kwitũ. Na kyu nĩkyo kĩtumi Ngũsĩ sya Yeova syũmbanaa kĩla mwaka ililikane kĩkw’ũ kya Yesũ. Maũndũ asu twaneenea nĩmakũtethya?

Shirley: Ĩĩ, nĩmandethya. Nĩ mũvea mũno nũndũ wa kũtũmĩa ĩvinda yaku kũmbony’a maũndũ asu.