Mũmbi witũ nĩ mũĩ kwĩ ithyĩ. Nĩ Ĩthe wĩ wendo, kwoou nũtũthĩnĩkĩaa. Ĩngĩ, kĩyaĩ kĩeleelo kyake twĩtongoesye. (Yelemia 10:23) Kwoou, o tondũ syana nini syĩthĩawa na vata wa kũtongoew’a nĩ asyai, ithyonthe twĩ na vata wa kũtongoew’a nĩ Ngai. (Isaia 48:17, 18) Myolooto ya Mbivilia nĩtũnengae ũtongoi, ũla nĩ mũthĩnzĩo kuma kwa Ngai.​—Soma 2 Timotheo 3:16.

Mĩao na myolooto ya Yeova ĩtũmanyĩasya mwĩkalĩle ũla mũseo vyũ ũmũnthĩ na nĩtwonasya ũndũ tũtonya kũkwata moathimo ma ĩvinda yũkĩte matakathela. Nũndũ Ngai nĩwe watũmbie, nĩ ũndũ waĩle kũtũnga mũvea nũndũ wa ũtongoi wake wĩ wendo na kũatĩĩa mĩao na myolooto yake twĩ na ũtanu.​—Soma Savuli 19:7, 11; Ũvuan’yo 4:11.

Myolooto ya Mbivilia nĩ ũw’o wa mũsingi. Nayo mĩao nĩtonya kũtũmĩwa kũweta ĩmwe kwa ĩmwe ũndũ twaĩle nĩkwĩka. (Kũtũngĩlĩlwa Kwa Mĩao 22:8) No nginya tũtũmĩe ũtonyi witũ wa kũtũmĩa kĩlĩko nĩ kana tũelewe ũndũ mwolooto mũna ũũtwĩa twĩke kwosana na ũndũ mũna. (Nthimo 2:10-12) Kwa ngelekany’o, Mbivilia ĩmanyĩasya kana thayũ nĩ mũthĩnzĩo kuma kwa Ngai. Mwolooto ũsu nũtonya kũtũtongoesya ĩla twĩ mũsyĩ, wĩanĩ, kana kyalonĩ. Nũtumaa twĩsũvĩa tũikalike mũisyonĩ kana kũlikya angĩ.​—Soma Meko ma Atũmwa 17:28.

Yesũ nĩwawetie myolooto ĩlĩ ya vata mũno. Wa mbee wonanĩtye  kĩeleelo kya thayũ, nakyo nĩ kũmũmanya Ngai, kũmwenda, na kũmũthũkũma kwa ũĩkĩĩku. Mwolooto ũsu nĩwaĩle kũsũanĩĩawa ĩvinda yonthe ĩla tũũtw’a maũndũ. (Nthimo 3:6) Ala maatĩĩaa mwolooto ũsu nĩmethĩawa na ũnyanya na Ngai, ũtanu wa w’o, na thayũ ũtathela.​—Soma Mathayo 22:36-38.

Mwolooto wa kelĩ nũtonya kũtuma twĩthĩwa na mũamba mũseo na andũ ala angĩ. (1 Akolintho 13:4-7) Ũndũ ũmwe wonanasya kana nĩtũkwataa mwolooto ũsu wa kelĩ nĩ kwĩka andũ o tondũ Ngai ũmekaa.​—Soma Mathayo 7:12; 22:39, 40.

Myolooto ya Mbivilia ĩmanyĩasya ũndũ mũsyĩ ũtonya kũkwatanw’a nĩ wendo. (Akolosai 3:12-14) Ĩngĩ Ndeto ya Ngai nĩsũvĩaa mĩsyĩ kwa kũmanyĩsya mwolooto ũngĩ wa kana mũtwaano nĩ mũvango wa kwĩkala.​—Soma Mwambĩlĩlyo 2:24.

Kwa kũatĩĩa momanyĩsyo ma Mbivilia, nĩkũtonya kũtũsũvĩa maũndũnĩ ma kĩmwĩĩ na makonetye kĩlĩko. Kwa ngelekany’o, mavinda maingĩ aandĩkani nĩmendeeaw’a nĩ athũkũmi ala maatĩĩaa myolooto ya Mbivilia ya kwĩthĩwa me na kĩthito na me aĩkĩĩku. (Nthimo 10:4, 26; Aevelania 13:18) Ĩngĩ, Ndeto ya Ngai nĩtũmanyĩasya kwĩanĩawa nĩ syĩndũ ila sya lasima na kwosa ũnyanya witũ na Ngai ta w’o ũndũ wa vata kũthonoka syĩndũ sya kĩmwĩĩ.​—Soma Mathayo 6:24, 25, 33; 1 Timotheo 6:8-10.

Kũatĩĩa myolooto ya Mbivilia nĩkũtonya kũsũvĩa ũima witũ wa mwĩĩ. (Nthimo 14:30; 22:24, 25) Kwa ngelekany’o, kũatĩĩa mwĩao wa Ngai ĩũlũ wa ũnywi nĩkũtũsũvĩaa tũikakwatwe nĩ mĩisyo na mowau mathũku. (Nthimo 23:20) Yeova nũtwĩtĩkĩlĩtye kũnyw’a mbinyu, ĩndĩ kwa kĩthimo. (Savuli 104:15; 1 Akolintho 6:10) Myolooto ya Ngai ĩtũtethasya kwa kũtũmanyĩsya tũsũvĩe meko na mesilya maitũ. (Savuli 119:97-100) Ĩndĩ, Aklĩsto ma w’o mainengae myolooto ya Ngai ndaĩa atĩ nũndũ nĩmatethasya. Mekaa ũu nĩ kana mamũtaĩe Yeova.​—Soma Mathayo 5:14-16.