1 Akolintho 1:1-31
1 Nyie Vaulo, ũla wanyuviwe ethĩwe mũtũmwa wa Klĩsto Yesũ kwondũ wa kwenda kwa Ngai, na Sosithene mwana-a-asa waitũ,
2 kwa kĩkundi kya Ngai kĩla kĩ Kolintho, kwenyu inyw’ĩ ala mwatheiw’e nthĩnĩ wa ngwatanĩo vamwe na Klĩsto Yesũ, ala mweetiwe mwĩthĩwe atheu, vamwe na onthe kĩla vandũ ala mawetaa ĩsyĩtwa ya Mwĩaĩi waitũ Yesũ Klĩsto, nake nĩ Mwĩaĩi woo na waitũ:
3 Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ, na kuma kwa Mwĩaĩi Yesũ Klĩsto.
4 Nĩmũtũngĩaa Ngai mũvea kĩla ĩvinda kwondũ wenyu nũndũ wa ũseo mwingĩ wa Ngai ũla mũnengetwe nthĩnĩ wa Klĩsto Yesũ;
5 nũndũ kĩla ũndũnĩ nĩmũthuĩtw’e nthĩnĩ wake, ũtonyinĩ w’onthe wa kũneena na ũmanyinĩ w’onthe,
6 o tondũ ũkũsĩ ĩũlũ wa Klĩsto wĩthĩĩtwe wĩ mũlũmu katĩ wenyu,
7 nĩ kana vaikethĩwe mũthĩnzĩo o na ũmwe mũte naw’o, o mũendeee kweteela na mea kũvuanw’a kwa Mwĩaĩi waitũ Yesũ Klĩsto.
8 Nake akatuma mwĩthĩwa alũmu kũvika mũthya nĩ kana mwĩthĩwe mũtaweteka ũthũku mũthenyanĩ wa Mwĩaĩi waitũ Yesũ Klĩsto.
9 Ngai nĩ mũĩkĩĩku, ũla wamwĩtie mwĩthĩwe na mũamba na Mwana wake, Yesũ Klĩsto Mwĩaĩi waitũ.
10 Na yu nĩmwĩsũva, ana-a-asa, ĩsyĩtwanĩ ya Mwĩaĩi waitũ Yesũ Klĩsto, nĩ kana mwĩthĩwe mũkĩneena mwĩ ngwatanĩo, na vaikethĩwe mũaanĩko katĩ wenyu, ĩndĩ mwĩthĩwe mũlũmanĩtye vyũ kĩlĩkonĩ kĩmwe na kĩsũanĩonĩ kĩmwe.
11 Nũndũ amwe ma nyũmba ya Kiloe nĩmandavĩtye ĩũlũ wenyu, ana-a-asa makwa, kana kwĩ na ngananĩo katĩ wenyu.
12 Ũndũ ũla ngwasya nĩ kana, kĩla ũmwe wenyu easya: “Nyie nĩ wa Vaulo,” “Nakwa nĩ wa Avolo,” “Nakwa nĩ wa Keva,”* “Nakwa nĩ wa Klĩsto.”
13 We Klĩsto ko mũaanĩku? We Vaulo nĩwooaĩwe mũtĩnĩ kwondũ wenyu? Kana mwavatisiwe ĩsyĩtwanĩ ya Vaulo?
14 Nĩmũtũngĩa Ngai mũvea nũndũ ndyaavatisa o na ũmwe wenyu eka o Kilisivo na Kaio,
15 nĩ kana wĩthĩe vaiĩ ũmwe wenyu ũtonya kwasya mwavatisiwe ĩsyĩtwanĩ yakwa.
16 Ĩĩ, na nĩnavatisie andũ ma nyũmba ya Sitevana. Ĩndĩ ala angĩ, ndyĩsĩ kana naavatisa o na ũmwe.
17 Nũndũ Klĩsto ndaandũma ngavatise, ĩndĩ ngatavany’e ũvoo mũseo; na ti na ũĩ wa ndeto, nĩ kana mũtĩ wa mathĩna* wa Klĩsto ndũkatw’ĩke wa mana.
18 Nũndũ ũvoo ĩũlũ wa mũtĩ wa mathĩna* nĩ ũtumanu kwa ala mekwaa, ĩndĩ kwitũ ala tũũtangĩĩwa, nĩ vinya wa Ngai.
19 Nũndũ nĩkũandĩkĩtwe: “Ngatuma ũĩ wa andũ oĩ wanangĩka, na ũmanyi wa ala me na ũmanyi ngaũlea.”*
20 Aĩ va mũndũ mũĩ? Aĩ va mũandĩki?* Aĩ va mũkananĩi wa ĩvinda yĩĩ?* We Ngai ndatw’ĩkĩthĩtye ũĩ wa nthĩ ĩno ũtumanu?
21 Nũndũ, kwosana na ũĩ wa Ngai, nthĩ ndyaamũmanya Ngai kwĩsĩla ũĩ wayo, Ngai nĩwoonie nũseo kwĩsĩla ũtumanu wa kĩla kĩũtavanw’a amatangĩĩe ala mekũĩkĩĩa.
22 Nũndũ Ayuti meenda kwona kyama namo Akiliki memantha ũĩ;
23 ĩndĩ ithyĩ twĩtavany’a Klĩsto oaĩwe mũtĩnĩ, naw’o nĩ ũndũ wa kũlulutĩkya kwa Ayuti na ũtumanu kwa andũ ma mbaĩ ingĩ.
24 Ĩndĩ kwa ala meetiwe, Akiliki vamwe na Ayuti, Klĩsto nĩ vinya wa Ngai na ũĩ wa Ngai.
25 Nũndũ kĩndũ kya Ngai kĩla kyonekaa ta kĩtumanu nĩ kyũĩ kwĩ andũ, na kĩndũ kya Ngai kĩla kyonekaa ta kyonzu kĩ vinya kwĩ andũ.
26 Nũndũ nĩmũkwona ũndũ wamwĩtie inyw’ĩ ana-a-asa, kana ti aingĩ oĩ kwa nzĩa ya kĩ-mwĩĩ,* ti aingĩ me vinya, ti aingĩ masyaĩtwe ũnenenĩ,*
27 nũndũ Ngai anyuvie syĩndũ ndumanu sya nthĩ nĩ kana amekĩĩthye andũ oĩ nthoni; na Ngai anyuvie syĩndũ ite vinya sya nthĩ nĩ kana asyĩkĩĩthye nthoni syĩndũ ila syĩ vinya;
28 na Ngai anyuvie syĩndũ ite nguma sya nthĩ na syĩndũ ila ivũthaw’a, syĩndũ ila itonekaa ta kĩndũ, nĩ kana aitw’ĩkĩthye vathei syĩndũ ila syonekaa ta kĩndũ,
29 nĩ kana wĩthĩe vaiĩ ũmwe* ũtonya kwĩkathĩĩa methonĩ ma Ngai.
30 Ĩndĩ kwondũ wake mwĩ na ngwatanĩo vamwe na Klĩsto Yesũ, ũla kwitũ ũtw’ĩkĩte ũĩ kuma kwa Ngai, o vamwe na ũlũngalu na kũthew’a na kũthaw’a kwĩsĩla wovosyo,
31 nĩ kana vethĩwe o tondũ kũandĩkĩtwe: “Ũla wĩkathĩĩaa nĩekathĩĩe nthĩnĩ wa Yeova.”
Maelesyo ma kwongeleela
^ Ũla wĩtawa Vetelo.
^ Sisya Maelesyo ma Ndeto.
^ Sisya Maelesyo ma Ndeto.
^ Kana “ngaũluutĩla ũtee.”
^ Ũu nĩ kwasya, mũndũ wĩsĩ Mĩao.
^ Sisya Maelesyo ma Ndeto.
^ Kana “kwosana na ũndũ andũ monaa maũndũ.”
^ Kana “kuma mĩsyĩnĩ yĩ nguma.”
^ Ndeto kwa ndeto, “mwĩĩ.”
