1 Akolintho 16:1-24
16 Na ĩũlũ wa kumya mĩvothi kwondũ wa atheu, no mwĩke kwosana na ũndũ neeaĩe ikundi sya Kalatia.
2 Mũthenya wa mbee wa kĩla kyumwa, kĩla ũmwe wenyu nĩwaĩle kwia kĩndũ ũtee kwosana na ũkwati wake, nĩ kana mĩvothi ndĩkaumw’e navika.
3 Ĩndĩ navika kũu, ngatũma aũme ala mũnyuvĩte kwĩsĩla valũa syenyu nĩ kana matwae mũthĩnzĩo wenyu Yelusaleme.
4 Ĩndĩ ethĩwa o nakwa nĩnaĩlĩte kũthi kw’o, ngathi namo.
5 Ĩndĩ ngooka kwenyu ĩtina wa kwĩsĩla Masetonia, nũndũ ngesĩla Masetonia;
6 na nĩvatonyeka ngekala nenyu kwa kavinda, kana o ngekala nenyu ĩvinda yonthe ya mbevo, nĩ kana mũmbumaasye nĩthi kũla nĩĩthĩwa nĩendete.
7 Nũndũ ndienda kũmwona oyu nĩvĩtĩte, nũndũ nĩĩkwatya kwĩkalanga nenyu ĩvinda yĩana ũna, Yeova enda.
8 Ĩndĩ nĩĩkala Eveso nginya ĩvinda ya Mboka ya Vendekosito,
9 nũndũ nĩnĩvingũĩwe mũomo mũnene kwondũ wa ũthũkũmi, ĩndĩ avĩnganĩsya nĩ aingĩ.
10 Ethĩwa Timotheo nũkũka, sisyai ndakethĩwe atonya kũkĩa e katĩ wenyu, nũndũ etethya wĩa wa Yeova o takwa.
11 Kwoou, mũndũ o na wĩva ndakamũvũthye. Mũekei athi na mũuo, nĩ kana oke kũla nĩĩ, nũndũ nyie nĩnĩmweteele o vamwe na ana-a-asa.
12 Na ĩũlũ wa mwana-a-asa waitũ Avolo, nĩnamwĩsũvie mũno oke kũla mũĩ vamwe na ana-a-asa. Ndanaĩ na kĩeleelo kya kũka ĩvinda yĩĩ, ĩndĩ akooka akwata mwanya.
13 Endeeai kũsyaĩĩsya, ũngamai mwĩ alũmu mũĩkĩĩonĩ, ĩthĩwai na ũkũmbaũ,* na mũyĩthĩwa na vinya.
14 Maũndũ onthe ala mũkwĩka mekei mwĩ na wendo.
15 Yu nĩngũmwĩsũva ana-a-asa: Nĩmwĩsĩ kana andũ ma nyũmba ya Sitevana nĩmo ũsyao wa mbee wa Akaia na kana nĩmeeyumisye kũmathũkũma atheu.
16 Endeeai kũmenyivĩsya andũ ma mũthemba ũsu na onthe ala matethasya wĩa ũsu na kũũthũkũma na kĩthito.
17 Ĩndĩ nĩngũtana nũndũ Sitevana e vaa o vamwe na Volitunato na Akaiko, nĩkwĩthĩwa nĩmeanĩĩsye kĩla mũkwĩsaa kwĩanĩsya ta kethĩwa mwĩ vaa.
18 Nũndũ nĩmanthangaaisye na mamũthangaasya. Kwoou, nengai ndaĩa andũ ma mũthemba ũsu.
19 Ikundi sya Asia nĩsyamũkethya. Akwila na Vilisika vamwe na kĩkundi kĩla kĩ nyũmba kwoo nĩmamũkethya mũno nthĩnĩ wa Mwĩaĩi.
20 Ana-a-asa onthe nĩmamũkethya. Kethany’ai na ngethi ya wendo.*
21 Nyie Vaulo nĩnamũkethya nĩandĩkĩte na kw’oko kwakwa mwene.
22 Ethĩwa mũndũ o na wĩva ndamwendete Mwĩaĩi, nĩmũumanĩe. Mwĩaĩi waitũ, ũka nĩtũũkwĩsũva!
23 Ũseo mwingĩ wa Mwĩaĩi Yesũ nĩwĩthĩwe nenyu.
24 Nĩnĩmwendete inyw’onthe ala mwĩ ngwatanĩo vamwe na Klĩsto Yesũ.
Maelesyo ma kwongeleela
^ Ndeto kwa ndeto, “endeeai kwĩthĩwa ta aũme.”
^ Ndeto kwa ndeto, “kũmumunyana kũtheu.”
