2 Athesalonika 2:1-17
2 Ĩndĩ, ana-a-asa, ĩũlũ wa kwĩthĩwa vo kwa Mwĩaĩi waitũ Yesũ Klĩsto na ĩũlũ wa kũmbanw’a kwitũ vala ũĩ, twĩmũkũlya
2 mũikathingithw’e na mĩtũkĩ kuma kĩsũanĩonĩ kyenyu, o na mũikatelemw’e nĩ ndeto mbeveee kana ndeto ineenetwe kana valũa ũkwoneka ta wumĩte kũla tũĩ, mũyĩwa kana mũthenya wa Yeova nĩ mũviku.
3 Mũndũ o na wĩva ndakamwasye kwa nzĩa o na yĩva, nũndũ mũthenya ũsu ndũkoka ũkaĩi wa mũĩkĩĩo ũtambĩte kũka na ũla mũtũli wa mĩao akavuanw’a, ũla nĩwe mwana wa wanangĩko.
4 Nĩ mũvĩnganĩsya na nĩwĩnenevasya kũvĩtũka ila syĩtawa ngai kana syĩndũ ila ithaithawa, na nũndũ wa ũu nĩwĩkalaa nthĩ ĩkalũnĩ ya Ngai na kwĩyonany’a ũtheinĩ kana we nĩ ngai.
5 Inyw’ĩ no mũũlilikana kana yĩla naĩ vamwe nenyu nĩnamũtavasya maũndũ asu?
6 Na yu inyw’ĩ nĩmwĩsĩ ũla wĩthĩĩtwe aisiĩĩa mũtũli ũsu wa mĩao, nĩ kana evuanw’a ĩvinda yake yĩla yaĩlĩte yavika.
7 Nĩ w’o kana kĩmbithĩ kĩu kya ũtũli wa mĩao nĩkĩendeee kũtethya wĩa, na kĩendeea nginya yĩla ũla ũendeee kwĩthĩwa e kĩsiĩĩi wĩvetwa.
8 Nĩvo ĩndĩ ũla mũtũli wa mĩao wĩvuanw’a, ũla Mwĩaĩi Yesũ ũkamũveta kwĩsĩla veva wa kanyw’a wake na kũmwananga ĩvinda yĩla kwĩthĩwa vo kwake kũkonanw’a.
9 Ĩndĩ kwĩthĩwa vo kwa ũla mũtũli wa mĩao kumanĩte na ũthũkũmi wa Satani o vamwe na syama syonthe na mawonany’o ma ũvũngũ na maũndũ ma ũsengy’o
10 na ũkengani w’onthe kwa ala mekwanangwa, na yĩu nĩyo ĩtuvi yoo nĩkwĩthĩwa mayaaĩtĩkĩla na kwenda ũla w’o nĩ kana matangĩĩwe.
11 Nĩkyo kĩtumi Ngai ũekaa makengwe na ũmanyĩsyo wa ũvũngũ nĩ kana maĩkĩĩe ndeto sya ũvũngũ,
12 nĩ kana onthe masilĩlwe nũndũ mayaaũĩkĩĩa ũla w’o ĩndĩ matanĩie maũndũ mate malũngalu.
13 Ĩndĩ, mavinda onthe twĩw’aa twaĩlĩte kũmũtũngĩa Ngai mũvea nũndũ wenyu, ana-a-asa endwa ma Yeova, nĩkwĩthĩwa kuma mwambĩlĩlyonĩ Ngai nĩwamũnyuvie mwĩkwata ũtangĩĩo kwa kũmũthesya na veva wake na kwĩsĩla mũĩkĩĩo wenyu nthĩnĩ wa ũla w’o.
14 Nake nĩwamwĩtie kwĩsĩla ũvoo mũseo ũla tũtavanasya, nĩ kana mũkwate ũtheu mũtisu wa Mwĩaĩi waitũ Yesũ Klĩsto.
15 Kwoou, ana-a-asa, ũngamai mwĩ alũmu na mũilũmya vyũ syĩthĩo ila mwamanyĩiw’e, mwĩthĩwe mwamanyĩiw’e kwĩsĩla ũneeni kana valũa kuma kwitũ.
16 O na ĩngĩ, ekai Mwĩaĩi waitũ Yesũ Klĩsto mwene na Ngai Ĩthe waitũ, ũla watwendie na atũnenga ũkiakisyo wa tene na tene, o vamwe na wĩkwatyo wa w’o kwĩsĩla ũseo mwingĩ,
17 akiakisye ngoo syenyu na aituma mwĩthĩwa mwĩ alũmu kwondũ wa meko onthe maseo o vamwe na kĩla ũneeni mũseo.
