Meko ma Atũmwa 10:1-48
10 Na kwaĩ mũndũ ũmwe wa Kaisalea weetawa Kolinelio, mũnene wa asikalĩ* nthĩnĩ wa kĩkosi kĩla kyeetawa Italia.*
2 Aĩ mũndũ wamũkĩaa Ngai na nĩwamũthaithaa vamwe na andũ onthe ma mũsyĩ wake, o na nĩwaumasya mĩthĩnzĩo mingĩ ya tei kwondũ wa andũ, na kĩla ĩvinda nĩwamũvoyaa Ngai na kĩthing’ĩĩsyo.
3 Na ta saa kenda sya mũthenya,* nĩwoonie nesa woninĩ mũlaĩka wa Ngai ooka vala ũĩ na amwĩta: “Kolinelio!”
4 Kolinelio amũketeea atelemete, na amũkũlya: “Nĩ kyaũ Mwĩaĩi?” Nake amwĩa: “Mboya syaku nĩsyĩw’ĩkĩte na mĩthĩnzĩo yaku ya tei nĩyonekete nĩ Ngai.
5 Kwoou tũma andũ Yova makamwĩte mũndũ wĩtawa Simoni, ũla kwa ĩsyĩtwa yĩngĩ wĩtawa Vetelo.
6 Mũndũ ũsu athoketw’e nĩ Simoni, mũseũvya wa ithuma, ũla nyũmba yake yĩ ũtee wa ũkanga.”
7 Mũlaĩka ũla waneenaa nake amina kũthi oou, Kolinelio nĩweetie athũkũmi make elĩ na mũsikalĩ ũmwe wamũkĩĩte Ngai katĩ wa ala mamũthũkũmaa,
8 na amaelesya maũndũ onthe na amatũma Yova.
9 Na ũnĩ wake, o maendeee na kyalo kyoo, me vakuvĩ kũvika ndũanĩ ĩsu, Vetelo nĩwambatie nyũmba ĩũlũ ta saa sita* nĩ kana avoye.
10 Ĩndĩ eew’a nzaa mũno na enda kũya kĩndũ. Na lĩu o ũendeee kũuwa, Vetelo nĩwoonie woni
11 na oona ĩtu yĩvingũkĩte na kĩndũ kĩilye suka mũnene wa katane kĩtheeetw’e nthĩ, kĩkwetwe mĩthya yakyo ĩna;
12 na nthĩnĩ wakyo vaĩ mĩthemba yonthe ya nyamũ ila syĩ maaũ ana na tũsamũ tũla tũtambũkaa* twa nthĩ na nyũnyi sya yayaya.
13 Na ĩndĩ eew’a wasya ũimwĩa: “Ũkĩla Vetelo, na ũithĩnza ũye!”
14 Ĩndĩ Vetelo asya: “Aiee, Mwĩaĩi, nĩkwĩthĩwa ndyaaya kĩndũ o na kĩmwe kĩvuku na kĩte kĩtheu.”
15 Na wasya ũsu waneena nake ĩngĩ ya kelĩ, ũkyasya: “Eka kũsyĩta mbuku syĩndũ ila Ngai ũtheetye.”
16 Na wasya ũsu nĩweew’ĩkie ya katatũ, na o mĩtũkĩ kĩndũ kĩu kyambatw’a ĩtunĩ.
17 Na Vetelo aendeee kũsaanĩw’a nĩ kĩla kyoonanaw’a nĩ woni ũsu, ala aũme matũmĩtwe nĩ Kolinelio makũlya vala nyũmba ya Simoni yaĩ na maũngama mũvĩanĩ.
18 Na meetana na makũlya kana Simoni ũla weetawa Vetelo athoketw’e vau.
19 Na Vetelo aendeee kũsũanĩa ĩũlũ wa ũla woni, veva mũtheu wamwĩa: “Sisya! Ve andũ atatũ meũkũmantha.
20 Kwoou ũkĩla ũtheee, na ũiendany’a namo, na ndũkethĩwe na nzika nongi, nĩkwĩthĩwa ninyie namatũma.”
21 Na ĩndĩ Vetelo atheea vala andũ asu maĩ, na amea: “Ninyie mũndũ ũla mũũmantha. Nĩkĩ mwooka vaa?”
22 Namo masũngĩa: “Kolinelio, mũnene wa asikalĩ, mũndũ mũlũngalu na ũmũkĩaa Ngai na ũwetawa nesa nĩ mbaĩ yonthe ya Ayuti, nĩwĩaĩwe nĩ Ngai kwĩsĩla mũlaĩka mũtheu aũtũmane wũke nyũmba kwake nĩ kana ew’e ũndũ ũkwasya.”
23 Na kwoou amathokya methĩwe aeni make.
Na ũnĩ wake ookĩla na athi namo, na ana-a-asa amwe kuma Yova maendany’a nake.
24 Mũthenya ũla waatĩĩe nĩwavikie Kaisalea. Na Kolinelio nĩwameteele na nĩwoombanĩtye andũ make ma mũsyĩ na anyanyae make ala anene.
25 Yĩla Vetelo wavikie, Kolinelio nĩwamũthaũie na amũtulĩlya ndu* na amũkumanĩa.
26 Ĩndĩ Vetelo amũkĩlya, na amwĩa: “Ũkĩla; nyie nĩ mũndũ o taku.”
27 Na aendeee kũneena nake nĩwalikile nyũmba, na eethĩa andũ aingĩ mombanĩte.
28 Na amea: “Inyw’ĩ nĩmwĩsĩ nesa kana ti ũndũ wosanĩte na mĩao kwa Mũyuti kũvulana kana kũthengeea mũndũ wa ũko ũngĩ, ĩndĩ Ngai nũmbonetye kana vai mũndũ o na ũmwe naĩle kwasya nĩ mũvuku kana ti mũtheu.
29 Kwoou yĩla ndũmaniwe nĩnũkie vate kũkananĩa. Kwondũ wa ũu, nĩenda kũmanya nĩkĩ mũndũmanie.”
30 Na ĩndĩ Kolinelio asya: “Mĩthenya ĩna mĩvĩtu saa ta isu tũĩ, nĩnavoyaa nĩ nyũmba kwakwa na kwaĩ ta saa kenda;* na ĩvindanĩ o yĩu mũndũ wĩ na ngũa ikũtisatisa nĩwaũngamie mbee wakwa,
31 na ambĩa: ‘Kolinelio, mboya yaku nĩyĩthukĩĩiw’e, na Ngai nĩwonete mĩthĩnzĩo yaku ya tei.
32 Kwoou tũmana Yova ũmwĩte Simoni ũla kwa ĩsyĩtwa yĩngĩ wĩtawa Vetelo. Mũndũ ũsu athoketw’e kwa Simoni, mũseũvya wa ithuma, ũla nyũmba yake yĩ ũtee wa ũkanga.’
33 Kwoou nĩnĩnakũtũmanie na mĩtũkĩ na nĩwĩkie nesa kũka vaa. Na yu ithyonthe twĩ mbee wa Ngai nĩ kana twĩw’e maũndũ onthe ala Yeova ũkwĩaĩe ũneene.”
34 Na Vetelo ambĩĩa kũneena, na asya: “Yu vate nzika nĩnĩmanyĩte nesa kana Ngai nde kyende,
35 ĩndĩ mbaĩnĩ syonthe mũndũ ũla ũmũkĩaa na wĩkaa ũla waĩle nĩwĩtĩkĩlawa nĩwe.
36 Nĩwatũmie ndeto yake kwa ana ma Isilaeli nĩ kana amatavye ũvoo wa mũuo kwĩsĩla Yesũ Klĩsto, ũla nĩwe Mwĩaĩi wa onthe.
37 Nĩmwĩsĩ ũndũ ũla waneeniwe Yutia yonthe kwambĩĩa Kalilii, ĩtina wa ũvatiso ũla Yoana watavanasya,
38 naw’o nĩ ĩũlũ wa Yesũ ũla waumĩte Nasaleti, ũndũ Ngai wamwĩtĩkĩisye mauta kwĩsĩla veva mũtheu na amũnenga vinya, na ũndũ waendie kĩla vandũ ayĩka maũndũ maseo na kũvosya onthe ala mavinyĩĩwe nĩ Ndevili, nũndũ Ngai aĩ vamwe nake.
39 Na twĩ ngũsĩ sya maũndũ onthe ala weekie nthĩ ya Ayuti na Yelusaleme; ĩndĩ nĩmamũaie kwa kũmũathĩĩa* mũtĩnĩ.
40 Ngai nĩwamũthayũũkisye mũthenya wa katatũ nĩ kana oneke,
41 ti oneke nĩ andũ onthe, ĩndĩ no ngũsĩ ila syanyuvĩtwe nĩ Ngai kuma tene, nasyo nithyĩ, ala twaĩe na twanyw’a vamwe nake ĩtina wa kũthayũũkw’a kwake.
42 O na ĩngĩ, nĩwatwĩaĩe tũtavany’e kwa andũ na kumya ũkũsĩ mwĩanĩu kana ũsu nĩwe wĩaĩwe nĩ Ngai ethĩwe mũsili wa ala me thayũ na ala akw’ũ.
43 Na athani onthe nĩmaumĩtye ũkũsĩ ĩũlũ wake, kana kĩla mũndũ ũmũĩkĩĩaa nũkwataa ũekeo wa naĩ kwĩsĩla ĩsyĩtwa yake.”
44 Na Vetelo aendeee kũneena maũndũ asu, veva mũtheu nĩwamatheeie onthe ala meethukĩĩsye ĩla ndeto.
45 Na etĩkĩli ala maĩ Ayuti* ala mookĩte na Vetelo maseng’a mũno, nũndũ mũthĩnzĩo wa veva mũtheu nĩwetĩkĩw’e andũ ma mbaĩ ingĩ o namo.
46 Nũndũ nĩmamewie maineena na ithyomo ngeni na maimũkumya Ngai. Nĩvo ĩndĩ Vetelo waisye:
47 “Ve mũndũ ũtonya kũmavata maivatiswa na kĩw’ũ ala makwatĩte veva mũtheu o taitũ?”
48 Ĩtina wa ũu ameaĩa mavatiswe ĩsyĩtwanĩ ya Yesũ Klĩsto. Na ĩndĩ mamwĩsũva ekale namo mĩthenya kauta.
Maelesyo ma kwongeleela
^ Mũnene wa kĩkundi kya asikalĩ 100.
^ Kĩkundi kya Lomi kya asikalĩ 600.
^ Ndeto kwa ndeto, “ta ĩsaa ya kenda.”
^ Ndeto kwa ndeto, “ta ĩsaa ya thanthatũ.”
^ Kwa ngelekany’o, nzoka na mang’ala.
^ Kana “avalũka nthĩ.”
^ Ndeto kwa ndeto, “ĩsaa ya kenda.”
^ Ndeto kwa ndeto, “kũmũsũsya.”
^ Ndeto kwa ndeto, “etĩkĩli aĩke.”
