Meko ma Atũmwa 20:1-38
20 Yĩla ithokoo syathelile, Vaulo nĩwatũmanie amanyĩw’a moke kũla ũĩ, na ĩtina wa kũmathangaasya na kũtaanĩsya namo, nĩwambĩĩisye kyalo kyake kya kũthi Masetonia.
2 Ĩtina wa kwĩsĩla isionĩ isu na kũtavya ala maĩ kũu maũndũ maingĩ ma kũmathangaasya, nĩwavikie Ũkiliki.
3 Nĩwekalile kũu myei ĩtatũ, ĩndĩ akilyĩ kũlika melinĩ nĩ kana athi Silia, Ayuti nĩmavangie kũmũaa, na kwoou atw’a kũsyokela Masetonia.
4 Aendanĩtye na Sovatele mwana wa Vilo kuma Velia, Alisitaliko na Sekundo kuma Thesalonika, Kaio kuma Ndelive, Tikiko na Telovimo kuma kĩsio kya Asia, na Timotheo.
5 Aũme asu maendie mbee witũ na nĩmatweteele Teloa;
6 ĩndĩ nĩtwalikile melinĩ twauma Vilivi ĩtina wa mĩthenya ya Mũkate Ũte Ĩlawa, na ĩtina wa mĩthenya ĩtano twavika Teloa vala maĩ, na twavekala mĩthenya mũonza.
7 Na mũthenya wa mbee wa kyumwa, tũmbanĩte tũye lĩu, Vaulo nĩwambĩĩie kũneena namo, nũndũ nĩwaendaa mũthenya ũla waatĩĩe; na aasavya ũneeni wake nginya ũtukũ katĩ.
8 Na kwaĩ taa mbingĩ nyũmbanĩ ya ĩũlũ vala twoombanĩe.
9 Na mwanake ũmwe weetawa Eutikusi wekalĩte ndĩlĩsyanĩ nĩwakomie too mũito Vaulo aendeee kũneena, na nũndũ wa kũemeewa nĩ too, avalũka kuma ngolovanĩ ya katatũ na akw’a.
10 Ĩndĩ Vaulo nĩwatheeie kuma ngolovanĩ, amũvalũkĩla na amũkumbatĩa, na asya atĩĩ: “Ekai kũthĩnĩka, nũndũ e thayũ.”*
11 Nĩvo ĩndĩ Vaulo wambatie na atila mũkate na ambĩĩa kũya. Na nĩwaendeeie kũneena kwa ĩvinda yĩasa nginya kwakya, na ĩndĩ athi.
12 Kwoou moosa mwanake ũsu e thayũ na meew’a makiakiw’a mũno.
13 Nĩtwalikile melinĩ na twakũsya twathi Asoso, vala twendaa kwĩsĩla tũyosa Vaulo, nũndũ atwĩĩte twĩsĩle kũu tũimwosa, nĩkwĩthĩwa we endaa kũthi kũu Asoso na maaũ.
14 Kwoou yĩla wakomanie naitũ kũu Asoso, nĩtwamwosie twathi nake nginya Mitilene.
15 Na ũnĩ wake nĩtwaumie vau na meli, na twavika Kiosi, ĩndĩ mũthenya ũla waatĩĩe nĩtwaũngamie o vanini Samo, na ũnĩ wake twavika Mileto.
16 Vaulo nĩwatw’ĩte kũvĩta ĩmwe kwa ĩmwe na meli ate kwĩsĩla Eveso nĩ kana ndakatũmĩe ĩvinda o na yĩmwe kĩsionĩ kya Asia, nũndũ nĩweekalaatĩte avike Yelusaleme mũthenya wa Mboka ya Vendekosito, ethĩwa vaĩ vatonyeka.
17 Ĩndĩ e kũu Mileto nĩwatũmanie atumĩa ma kĩkundi kya Eveso.
18 Yĩla mookie kũla ũĩ, nĩwameie atĩĩ: “Nĩmwĩsĩ nesa ũndũ nekalaa yĩla naĩ nenyu kuma mũthenya wa mbee ũla navikie kĩsionĩ kya Asia,
19 ngĩmũthũkũma Mwĩaĩi na wĩnyivyo w’onthe na methoi na matatwa ala mangwatie kumana na mĩvango ya Ayuti ya kwenda kũmbũaa,
20 na ndyaalea kũmũtavya maũndũ ala matonya kũmũtethya, o na ndyaalea kũmũmanyĩsya ũtheinĩ na nyũmba kwa nyũmba.
21 Ĩndĩ nĩnaumisye ũkũsĩ mwĩanĩu kwa Ayuti na Akiliki nĩ kana melile na maimũsyokea Ngai na maimũĩkĩĩa Mwĩaĩi Yesũ.
22 Na yu sisyai! nĩnĩendete Yelusaleme nĩtongoew’e nĩ veva mũtheu, o na kau ndyĩsĩ maũndũ ala meũngwata navika kũu,
23 ĩndĩ kuma ndũa kũthi ĩla ĩngĩ, nĩnumĩaw’a ũkũsĩ ĩngĩ na ĩngĩ nĩ veva mũtheu ũkyasya kana kyovo na mathĩna nimbeteele.
24 O na ũu wĩ o vo, ndiũtala thayũ wakwa ta kĩndũ, kĩla kya vata nĩ kũmina mũendo wakwa na ũthũkũmi ũla nakwatie kuma kwa Mwĩaĩi Yesũ, wa kumya ũkũsĩ mwĩanĩu ĩũlũ wa ũvoo mũseo wa ũseo mwingĩ wa Ngai.
25 “Na yu sisyai! nĩnĩsĩ kana vai ũmwe katĩ wenyu ala natavisye ũvoo wa Ũsumbĩ ũkona ũthyũ wakwa ĩngĩ.
26 Kwoou nĩmwĩa mũkũsĩĩe twĩ ũmũnthĩ kana, nyie nĩ mũtheu kumana na nthakame ya andũ onthe,
27 nĩkwĩthĩwa ndyaalea kũmũtavya ũtao w’onthe wa* Ngai.
28 Ĩsũvĩei inyw’ĩ ene na mũisũvĩa ĩĩthya yonthe yĩla veva mũtheu wamũnyuvie mwĩthĩwe asyaĩĩsya, mũĩthye kĩkundi kya Ngai, kĩla wathooie na nthakame ya Mwana wake mwene.
29 Nĩnĩsĩ kana ĩtina wa nathi nzũi mbai ikalika katĩ wenyu na iikeew’ĩa ĩĩthya tei,
30 na kuma katĩ wenyu aũme makookĩla na kũneena maũndũ melelũkye nĩ kana makusye amanyĩw’a mamaatĩĩe.
31 “Kwoou endeeai kũsyaĩĩsya, na mũililikana kana kwa ĩvinda ya myaka ĩtatũ, ũtukũ na mũthenya, ndyaaeka nongi kũtaa kĩla ũmwe wenyu na methoi.
32 Na yu nĩmũnengane kwa Ngai na kwa ndeto yake ĩla ĩneenete ĩũlũ wa ũseo wake mwingĩ, na ĩtonya kũmwaka na kũmũnenga ũtiĩwa katĩ wa atheu onthe.
33 Ndyaaĩw’ĩa ĩtomo vetha wa mũndũ kana thaavu kana ngũa.
34 Inyw’ĩ ene nĩmwĩsĩ kana moko aa nĩmatethisye wĩa kwondũ wa mavata makwa mwene na ma andũ ala naĩ namo.
35 Nĩnĩmwonetye maũndũnĩ onthe kana kwa kũthũkũma na kĩthito kĩu, no nginya mũtetheesye ala onzu, na no nginya mũlilikane ndeto sya Mwĩaĩi Yesũ, yĩla waisye atĩĩ: ‘Kũnengane kwĩ ũtanu mwingĩ kwĩ kwosa.’”
36 Na amina kũneena maũndũ asu, nĩwatulilye ndu na avoya vamwe namo onthe.
37 Na onthe mambĩĩa kũĩa mũno, na mamũkumbatĩa Vaulo* na mamũmumunya,
38 nĩkwĩthĩwa nĩmeewie kyeva kingĩ nũndũ wa ndeto ila waĩ ananeena akyasya kana maikona ũthyũ wake ĩngĩ. Na ĩndĩ mamumaasya nginya melinĩ.
Maelesyo ma kwongeleela
^ Kana “thayũ wake wĩ nthĩnĩ wake.”
^ Kana “kĩeleelo kyonthe kya.”
^ Ndeto kwa ndeto, “mamũvalũkĩla Vaulo ngingonĩ.”
