Maliko 1:1-45
-
Yoana Mũvatisi aitavany’a (1-8)
-
Kũvatiswa kwa Yesũ (9-11)
-
Yesũ aitatwa nĩ Satani (12, 13)
-
Yesũ ayambĩĩa kũtavany’a Kalilii (14, 15)
-
Kwĩtwa kwa amanyĩw’a ma mbee (16-20)
-
Veva mũvuku ũyumw’a (21-28)
-
Yesũ aivosya andũ aingĩ Kavelinaumi (29-34)
-
Yesũ aivoyea vandũ vate andũ (35-39)
-
Kũvow’a kwa mũndũ wĩ na mangũ (40-45)
1 Mwambĩlĩlyo wa ũvoo mũseo ĩũlũ wa Yesũ Klĩsto, Mwana wa Ngai:
2 O tondũ kũandĩkĩtwe ĩvukunĩ ya mwathani Isaia: “(Sisya! nĩngũtũma mũtũmwa wakwa mbee waku,* ũla ũkaseũvya nzĩa kwondũ waku.)
3 Wasya mũnene wa mũndũ ũkũneena weũnĩ, akyasya: ‘Seũvyai nzĩa ya Yeova! Lũngalyai nzĩa syake.’”
4 Yoana Mũvatisi aĩ weũnĩ akĩmatavya andũ mavatiswe nĩ kana monany’e nĩmelilĩte nũndũ wa naĩ syoo nĩ kana maekewe.
5 Na andũ onthe ma kĩsio kya Yutia na onthe ala mekalaa Yelusaleme nĩmaendaa vala waĩ, na kũvatiswa* nĩwe Ũsĩnĩ wa Yolotani, na kumbũla naĩ syoo ũtheinĩ.
6 Na Yoana eekĩĩte ngũa ya w’ĩa wa ngamĩle na aĩ na mũsivi wa kĩthuma kĩnyunyunĩ kyake, na aĩsaa ngie na ũkĩ wa nzũkĩ wa kĩthekanĩ.
7 Nake atavanasya, akyasya: “Mũndũ ũla wũkĩte ĩtina wakwa e vinya kwĩ nyie, na ndii sya iatũ syake ndyaĩlĩtwe nĩ kũkumana nĩithasye.
8 Nyie nĩnamũvatisaa na kĩw’ũ, ĩndĩ we akamũvatisaa na veva mũtheu.”
9 Mĩthenyanĩ ĩsu Yesũ nĩwookie kuma Nasaleti ya Kalilii, na avatiswa nĩ Yoana Ũsĩnĩ wa Yolotani.
10 Na aumĩla kĩw’ũnĩ oou, oona matu mavingũka, na veva wamũtheeea ta ĩvũĩ.
11 Na wasya wauma ĩtunĩ, ũkyasya: “Nue Mwana wakwa mwendwa; nĩnendeeaw’a nue.”
12 Na vau kwa vau veva mũtheu wamũtwaa weũnĩ.
13 Kwoou ekala weũnĩ mĩthenya 40, aitatwa nĩ Satani. Na aĩ vamwe na nyamũ sya kĩthekanĩ, na alaĩka nĩmamũthũkũmaa.
14 Na ĩtina wa Yoana kũkwatwa, Yesũ nĩwaendie Kalilii, akĩtavany’a ũvoo mũseo wa Ngai
15 na kwasya: “Ĩvinda yĩla yĩnyuvĩtwe nĩ ĩviku, na Ũsumbĩ wa Ngai nĩ mũthengeeu. Ĩlilei, na mũyĩĩkĩĩa ũvoo mũseo.”
16 Na esĩlĩte ũtee wa Ũkanga wa Kalilii, nĩwoonie Simoni na Endelea mwana-a-inyia mayĩkya itei* syoo ũkanganĩ, nũndũ maĩ atei ma makũyũ.
17 Na Yesũ amea: “Ngatĩĩai, nakwa ngamũtw’ĩkĩthya atei ma andũ.”
18 Na vau kwa vau matia itei syoo na mamũatĩĩa.
19 Ĩtina wa kũendanga o vanini, nĩwoonie Yakovo mwana wa Sevetii na Yoana mwana-a-inyia, namo maĩ ĩsiwanĩ* maiseũvya itei syoo,
20 na vau kwa vau ameta. Kwoou matia ĩthe woo Sevetii ĩsiwanĩ vamwe na athũkũmi na mamũatĩĩa.
21 Na mathi Kavelinaumi.
Mũthenya wa Savato wambĩlĩlya oou, nĩwalikile ĩsinakokenĩ na ambĩĩa kũmanyĩsya.
22 Na andũ maseng’a nũndũ wa nzĩa yake ya kũmanyĩsya, nĩkwĩthĩwa amanyĩasya ta ũmwe wĩ na ũkũmũ, na ti ta aandĩki.
23 Na ĩvinda o yĩu kwaĩ mũndũũme ĩsinakokenĩ walikĩtwe nĩ veva mũvuku, na akaya na wasya mũnene, akyasya:
24 “Ithyĩ twĩ na ũndũ mwaũ naku, Yesũ Mũnasaleti? Wooka kũtwananga? Nĩngwĩsĩ nesa nue ũũ, we nue Ũla Mũtheu wa Ngai!”
25 Ĩndĩ Yesũ aũkany’a, akyasya: “Vindya, na ũyuma mũndũnĩ ũũ!”
26 Na veva ũsu mũvuku wauma nthĩnĩ wa mũndũ ũsu, ĩtina wa kũmũthingithangya mũno na kũkaya na wasya mũnene.
27 Na andũ onthe maseng’a mũno nginya mambĩĩa kũneenea ũndũ ũsu katĩ woo, makyasya: “Ũndũ ũũ nĩ mwaũ? Nĩ ũmanyĩsyo mweũ! E na ũkũmũ wa kwĩaĩa o na maveva mavuku, na maimwĩw’a.”
28 Kwoou ũvoo ĩũlũ wake wanyaĩĩka mĩtũkĩ kĩla vandũ na kĩsionĩ kyonthe kya Kalilii.
29 Ĩtina wa ũu mauma ĩsinakokenĩ na mathi mũsyĩ kwa Simoni na Endelea, na Yakovo na Yoana maendany’a vamwe namo.
30 Na inyia wa mũka wa Simoni nĩwakomete awaĩte ndetema, na vau kwa vau mamũtavya ĩũlũ wake.
31 Nake athi vala waĩ, amũkwata kw’oko, na amũkĩlya. Na avoa ndetema na ambĩĩa kũmathũkũma.
32 Na kwavika mawĩoo, syũa yamina kũthũa, andũ mambĩĩa kũmũetee andũ onthe ala maĩ awau na malikĩtwe nĩ ndaimoni;
33 na andũ onthe ma ndũa nĩmoombanĩte vamwe mũomonĩ.
34 Kwoou avosya aingĩ ala mawaĩte mowau me kĩvathũkany’o, na aumya ndaimoni mbingĩ, ĩndĩ ndaasyĩtĩkĩlya ndaimoni isu ineene, nũndũ nĩsyeesĩ we nĩwe Klĩsto.*
35 Kwakya tene, o kwĩ kĩvindu, nĩwookĩlile na aumaala nza na athi vandũ vate andũ, na e vau ambĩĩa kũvoya.
36 Ĩndĩ Simoni na ala waĩ namo mambĩĩa kũmũmantha na kĩthito,
37 na mamwona mamwĩa: “Kĩla mũndũ nũkũũmantha.”
38 Ĩndĩ amea: “Tũendei vandũ vangĩ, ndũanĩ ila syĩ vakuvĩ, nĩ kana nĩtavany’e kũu o nakw’o, nũndũ nookie kwondũ wa ũu.”
39 Na athi akĩtavany’a masinakokenĩ kĩla vandũ Kalilii yonthe, na kumya ndaimoni.
40 Na mũndũ ũwaĩte mangũ ooka vala ũĩ na amwĩsũva atulĩtye ndu, akyasya: “Mwĩaĩi, ethĩwa nũkwenda, nũtonya kũnthesya.”*
41 Eew’a ũu amwĩw’ĩa tei mũno, na atambũũkya kw’oko kwake amũkiita, na amwĩa: “Nĩngwenda! Ĩthĩwa mũtheu.”
42 Na vau kwa vau avoa mangũ vyũ, na eethĩwa e mũtheu.
43 Na ĩndĩ amũkany’a kwa ũito na vau kwa vau amwĩa nĩ athi,
44 akyasya: “Ndũkatate kũtavya mũndũ o na ũmwe, ĩndĩ enda ũkeyonany’e kwa mũthembi na ũyumya syĩndũ ila Mose waisye syumaw’e, kwondũ wa kũthew’a kwaku, nĩ kana ũu wĩthĩwe ũkũsĩ kwoo.”
45 Ĩndĩ mũndũ ũsu amina kũthi, ambĩĩa kũtavany’a ũvoo ũsu mũno na kũũnyaĩĩkya kĩla vandũ nginya weethĩa Yesũ ndatonya ĩngĩ kũlika ndũanĩ enekee, ĩndĩ ekala nza wa ndũa kũndũ kũte andũ. O na ũu wĩ o vo, andũ nĩmaendeeie kũthi vala waĩ kuma ngalĩ syonthe.
Maelesyo ma kwongeleela
^ Ndeto kwa ndeto, “mbee wa ũthyũ waku.”
^ Kana “kũindwa; kũthikwa.”
^ Kana “neti.”
^ Kana “ĩtalũnĩ.”
^ Kana nĩvatonyeka, “nĩsyeesĩ nĩwe ũũ.”
^ Kana “kũmbosya.”
