Mathayo 22:1-46
22 Na ĩngĩ Yesũ aneena namo atũmĩĩte ngelekany’o, akĩmea:
2 “Ũsumbĩ wa ĩtu no ũelekanw’e na mũsumbĩ waseũvisye mboka ya mũtwaano kwondũ wa mwana wake.
3 Na atũma ngombo syake ikete ala mathoketw’e mbokanĩ ĩsu ya mũtwaano, ĩndĩ mayendaa kũka.
4 Na atũma ngombo ingĩ, akyasya, ‘Matavyei ala mathoketw’e atĩĩ: “Sisyai! Nĩnĩseũvĩtye kyaũya kyakwa kya wĩoo, nĩnĩthĩnzĩte nzaũ syakwa na indo ila nou, na syĩndũ syonthe nĩsyũmbanĩtw’e. Ũkai mbokanĩ ya mũtwaano.”’
5 Ĩndĩ malea kwona ũu ta ũndũ, na ũmwe athi mũũndanĩ wake, ũla ũngĩ viasalanĩ wake;
6 namo ala angĩ, makwata ngombo syake, maithĩny’a mũno na masyũaa.
7 “Na mũsumbĩ athata mũno na atũma ita syake na syoaa oaani asu na syavĩvya ndũa yoo.
8 Na ĩndĩ asyĩa ngombo syake, ‘Mboka ya mũtwaano nĩ nzeũvye, ĩndĩ ala meĩthoketw’e mayaĩle.
9 Kwoou, endai nzĩanĩ ila syumĩte ndũanĩ, na mũithokya mũndũ o na wĩva ũla mũkwona oke mbokanĩ ya mũtwaano.’
10 Na ngombo isu syaumaala nzĩanĩ na syoombany’a onthe ala syoonie, athũku na aseo; na nyũmba ya mboka ya mũtwaano yausũa aeni.*
11 “Yĩla mũsumbĩ walikile asisye aeni, nĩwoonie mũndũ ũteekĩĩte ngũa ya mũtwaano.
12 Na ĩndĩ amũkũlya: ‘We ũlikangile vaa ata ũtekĩĩte ngũa ya mũtwaano?’ Nake akilya ki.
13 Na mũsumbĩ amea athũkũmi make, ‘Mwovei moko na maaũ na mũimwĩkya nza kĩvindunĩ. Vau nĩ vo ũkaĩĩa na kũvevetany’a maeo make.’
14 “Nũndũ nĩ aingĩ athokye, ĩndĩ ala anyuve nĩ anini.”
15 Na ĩndĩ Avalisi mathi kũsamana vamwe ũndũ matonya kũmũkwatya kwĩsĩla ũneeni wake.
16 Kwoou matũma amanyĩw’a moo kũla ũĩ vamwe na aatĩĩi ma kyama kya Elote, makamwĩe: “Mũmanyĩsya, nĩtwĩsĩ ũneenaa w’o, na ũmanyĩasya ũla w’o ĩũlũ wa nzĩa ya Ngai, na ndwendeeasya mũndũ, nũndũ ndũsiasya ũndũ mũndũ ũilye nza.
17 Tũtavye ĩndĩ, we wĩona ata? Nĩ ũndũ wosanĩte na mĩao* kũĩva Kaisali koti ũla waĩle kũĩvwa nĩ kĩla mũndũ, kana ũndũ ũsu ndwaĩle?”
18 Ĩndĩ nũndũ Yesũ nĩwamanyie ũthũku woo, amea: “Nĩkĩ mũũndata, inyw’ĩ angangany’a?
19 Mbony’ei mbesa ĩla mũtũmĩaa kũĩva koti.” Namo mamũetee ndinalĩ.
20 Nake amakũlya: “Visa ũũ na ũandĩko ũũ nĩ syaũ?”
21 Namo mamwĩa: “Nĩ sya Kaisali.” Nake amea: “Mũnengei Kaisali syĩndũ sya Kaisali, na Ngai syĩndũ sya Ngai.”
22 Ĩla meewie ũu, nĩmaseng’ie, na mamũtia mathi.
23 Na mũthenya ũsu Asatukai, ala maasya kana kũi ũthayũũkyo, mooka, na mamwĩa:
24 “Mũmanyĩsya, Mose aisye atĩĩ: ‘Ethĩwa mũndũ nĩwakw’a ate na syana, mwana-a-inyia no nginya atwae kĩveti kĩu kyatiwa na aisyaa syana kwondũ wa mwana-a-inyia.’
25 Kwaĩ aũme mũonza masyaanĩw’e. Na wa mbee atwaana na akw’a, na nũndũ ndaĩ na mwana, kĩveti kĩu kyatiĩwa mwana-a-inyia.
26 Na ũu nĩw’o kweethĩiwe kwa ũla wa kelĩ na wa katatũ nginya ũla wa mũonza.
27 Na ĩtina wa ũu mũndũ mũka ũsu akw’a.
28 Kwoou ĩvinda ya ũthayũũkyo, mũndũ mũka ũsu akeethĩwa kĩveti kya wĩva katĩ wa asu me mũonza? Nũndũ onthe nĩmamũtwaĩte.”
29 Nake Yesũ amasũngĩa, amea: “Nĩmũvĩtĩtye, nũndũ mũyĩsĩ Maandĩko o na mũyĩsĩ vinya wa Ngai;
30 nũndũ ũthayũũkyonĩ aũme maitwaanaa na aka maitwaawa, ĩndĩ methĩawa ta alaĩka ĩtunĩ.
31 Na ĩũlũ wa ũthayũũkyo wa akw’ũ, no mwaasoma kĩla Ngai wamũtavisye yĩla waisye:
32 ‘Nyie ninyie Ngai wa Avalaamu, na Ngai wa Isaka, na Ngai wa Yakovo’? We ti Ngai wa ala akw’ũ, ĩndĩ wa ala me thayũ.”
33 Yĩla ĩkomano yeewie ũu, nĩyaseng’iw’e nĩ nzĩa yake ya kũmanyĩsya.
34 Yĩla Avalisi meewie kana nĩwakilĩthya Asatukai, moombana vamwe na mooka vala ũĩ.
35 Na ũmwe woo wĩsĩ Mĩao nesa amũtata kwa kũmũkũlya:
36 “Mũmanyĩsya, nĩ mwĩao wĩva ũla mũnene ĩla Mĩaonĩ?”
37 Nake amea: “‘No nginya ũmwende Yeova Ngai waku na ngoo yaku yonthe, na thayũ waku w’onthe, na kĩlĩko kyaku kyonthe.’
38 Ũũ nĩw’o mwĩao ũla mũnene na wa mbee.
39 Wa kelĩ, ũla ũilye ta ũsu, nĩ ũũ: ‘No nginya ũmwende mũtũi waku o ũndũ wĩyendete.’
40 Mĩao yonthe na Mavuku ma Athani matw’ĩĩkĩtwe nĩ mĩao ĩsu ĩlĩ.”
41 Na Avalisi mombanĩte vamwe Yesũ amakũlya:
42 “Mwĩ na woni mwaũ ĩũlũ wa Klĩsto? We nĩ mwana waũ?” Namo mamũsũngĩa: “Wa Ndaviti.”
43 Nake amakũlya: “Na nĩkĩ ĩndĩ Ndaviti e mũveveee ũmwĩtĩte Mwĩaĩi, yĩla ũkwasya,
44 ‘Yeova eeie Mwĩaĩi wakwa atĩĩ: “Ĩkala kw’okonĩ kwakwa kwa aũme nginya yĩla ngaia amaitha maku ungu wa nyaaĩ syaku”’?
45 Ethĩwa ĩndĩ Ndaviti amwĩtĩte Mwĩaĩi, nĩ mwana wake ata?”
46 Na vaiĩ ũmwe waĩ atonya kũneena ndeto amũsũngĩe, na kuma mũthenya ũsu na kũendeea, vaiĩ ũmwe waatata kũmũkũlya ũndũ.
