Tiiti 1:1-16
1 Ma Pɔɔlɩ, Ɛsɔ yom nɛ Yesu Krɩstʋ tɛ apostoloo weyi e-tisuu labɩ nɔɔ kʋɖʋmaɣ nɛ ɛyaa mba Ɛsɔ lɩzaa yɔ pe-tisuu nɛ toovenim tɛ sɩmtʋ siŋŋ yɔ, toovenim mbʋ pɩlabɩ nɔɔ kʋɖʋmaɣ nɛ Ɛsɔ ñɔnʋʋ
2 nɛ pɩwɛ wezuu maatɛŋ lidaʋ tigiɖe yɔɔ,+ ŋgʋ Ɛsɔ weyi ɛɛpɩzɩɣ nɛ ɛcɛtɩ yɔ,+ ɛlabɩ kɩ-tamaɣ ɖooo lɔŋ yɔ;
3 ɛlɛ alɩwaatʋ ndʋ ɛɖʋwa yɔ tɩtalaa lɛ, ɛtɩŋnɩ tɔm susuu tʋmɩyɛ nɖɩ ɛɖʋzɩ me-nesi tɛɛ yɔ ɖɩ-yɔɔ nɛ eyele nɛ patɩlɩ ɛ-tɔm,+ ɛzɩ ɖa-Ñʋʋ Yaɖʋ Ɛsɔ ɖʋʋ paɣtʋ yɔ;
4 mamaɣnɩ takayaɣ kanɛ Tiiti, man-pɩɣa siŋŋ ɛzɩ tisuu mbʋ ɖɩkawa yɔ pɩpɔzʋʋ yɔ:
Tɛtɛ nɛ ŋhiɣ lootiye nɛ laŋhɛzɩyɛ nɖɩ ɖɩlɩnɩ Caa Ɛsɔ nɛ ɖa-Ñʋʋ Yaɖʋ Krɩstʋ Yesu pɔ-cɔlɔ yɔ.
5 Meyebi-ŋ Krɛɛtɩ se ŋñɔɔzɩ mbʋ pɩtɩtʋʋzɩ yɔ* nɛ ŋsɩɩ ɛzʋtʋyaa tɛtʋ sɔsɔtʋ ndɩ ndɩ taa, ɛzɩ manɖʋʋ-ŋ paɣtʋ yɔ:
6 pɩwɛɛ se ɛzʋtʋyʋ ɛkɛ weyi paayɔɔdʋʋ ɛ-tɔm* se ɛɖɔŋ ɖɔnɛ kɩdɛkɛdɩyɛ yɔ, ɛkɛ halʋ kʋɖʋm walʋ, ɛwɛɛnɩ piya nzɩ sɩwɛnɩ tisuu nɛ paayɔɔdʋʋ sɩ-tɔm se sɩcakɩ wezuu kɩdɛkɛdʋʋ yaa sɩlakɩ ñʋʋ taa ɖoŋ yɔ.+
7 Mbʋ pʋyɔɔ yɔ ɛzɩ Ɛsɔ wondu yɔɔ cɔnɩyʋ yɔ, pɩfɛyɩ se ɛgbɛyɛ yɔɔ cɔnɩyʋ ɛkɛ weyi pɔyɔɔdʋʋ ɛ-tɔm se ɛɖɔŋ ɖɔnɛ kɩdɛkɛdɩyɛ yɔ, ɛtaakɛ ñʋʋ taa ɖoŋ tʋ,+ ɛtaakɔʋ pana lɛɛ lɛɛ,+ ɛtaakɛ sʋlʋm kpaŋɩyʋ, ɛtaawɛɛ puuyaɣ,* etaamuli se ehiɣ kɛzɛɣa,*
8 ɛlɛ ɛsɔɔlɩ ɛyaa mʋʋ,+ ɛkɛ kɩbandʋ sɔɔlɩyʋ, ɛkɛ weyi ɛmaɣzɩɣ camɩyɛ yɔ,+ ɛwɛɛ toovenim, ɛwɛɛ siɣsiɣ,+ ɛwɛɛnɩ tɩ ɖɔkʋʋ,+
9 ɛñɔɔnɩ siɣsiɣ tɔm* kpam ɛ-tɔm wɩlʋʋ lɛɣtʋ taa,+ se pɩsa nɛ ɛtɩŋnɩ wɩlɩtʋ kɩbandʋ*+ yɔɔ nɛ ɛpɩzɩ ɛkpazɩ lalaa ɖoŋ* nɛ ekizini tɔm+ mba pakaɖɩɣnɩ wɩlɩtʋ kɩbandʋ ndʋ yɔ.
10 Mbʋ pʋyɔɔ yɔ ñʋʋ taa ɖoŋ tɩnaa, mba pɔyɔɔdʋʋ tɔm ndʋ tɩɩwazɩɣ pʋyʋ yɔ nɛ peɣziyaa pɔɖɔwa, kɔzɩ kɔzɩ mba patɩnɩɣ pɛlɩtʋ yɔɔ yɔ.+
11 Pɩcɛyaa se ŋsuli pɔ-nɔsɩ, mbʋ pʋyɔɔ yɔ ɛyaa mba, pawɩlɩɣ tɔm ndʋ pɩtɩmʋna se pawɩlɩ yɔ nɛ paɖʋzʋʋ ɖɩsɩ nɛ sɩ-tɛɛ pilim se pehiɣ mulum kɛzɛɣa.
12 Pa-taa nɔɔyʋ, weyi ɛkɛ pa-maɣmaɣ pa-nayʋ yɔ, ɛyɔɔdaa se: «Krɛɛtɩ mba kɛ cɛtɩyaa paa ɛzɩmtaa, pɛkɛ tɛtɛgbɩna kɩdɛkɛda, hiluu tɩnaa mba paalakɩ naɖɩyɛ yɔ.»
13 Aseɣɖe tɔm ndʋ tɩkɛ toovenim. Pʋyɔɔ lɛ, wolo pɩ-yɔɔ nɛ ŋkiziɣni-wɛ tɔm nɛ ɛsɩyɛ kɩsɛɛmɩyɛ se pɩsa nɛ pakpa ɖoŋ tisuu taa,
14 nɛ pataakemsini Yuuda mba mʋya nɛ ɛyaa mba pahaɣ toovenim siɣye yɔ pa-paɣtʋ.
15 Pɩtɩŋa pɩwɛ kele kele ɛyaa mba pɛwɛ kele kele yɔ pɛ-ɛsɩndaa;+ ɛlɛ azuluma tɩnaa nɛ mba pɛfɛyɩnɩ tisuu yɔ pɛ-ɛsɩndaa lɛ, nabʋyʋ fɛyɩ kele kele, mbʋ pʋyɔɔ yɔ pa-maɣzɩm nɛ pɛ-ɛhʋyɛ piyaa.+
16 Pɔyɔɔdʋʋ ɛyaa ɛsɩndaa se pasɩm Ɛsɔ, ɛlɛ patɩŋɩɣnɩ pa-lakasɩ yɔɔ nɛ pekiziɣ-i;+ mbʋ pʋyɔɔ yɔ pacaɣ kiniŋ nɛ pɛkɛ kaañamtʋ tɩnaa, nɛ patɩmʋna se pala tʋmɩyɛ kɩbanɖɛ naɖɩyɛ.
Pɩ-tɛɛ tɔm
^ Yaa «se ŋla mbʋ pɩkazaa se pala yɔ.»
^ Piye piye, «ye nɔɔyʋ ɛwɛɛ nɛ paayɔɔdʋʋ ɛ-tɔm.»
^ Yaa «ɛtaakɛ weyi ɛmakɩ ɛyaa yɔ.»
^ Yaa «ɛtaakɛ weyi ɛñɩnɩɣ kɛzɛsɩ nɛ ɛsa naɣ naɣ yɔ.»
^ Yaa «ɛñɔɔnɩ tɔm ndʋ papɩzɩɣ nɛ pataa-tʋ liu yɔ.»
^ Yaa «wɩlɩtʋ ndʋ tɩwazɩɣ yɔ.»
^ Yaa «ɛpɩzɩ eseɣti lalaa.»
