ÐƆ-TƆM susuu tɔm cɛyaa nɛ pɩwɛɛnɩ wazaɣ siŋŋ. Ɛlɛ mba ɖisusuu-wɛ tɔm yɔ, pɩtɩkɛ pa-tɩŋa pɩkɛdɩɣna. Paa ɛyaa ɩsɔɔlɩ Bibl taa tɔm yɔ, pɩtɩkɛ paa ɛzɩmtaa pamaɣzɩɣ se pɩcɛyaa se ɖa nɛ wɛ ɖɩkpɛlɩkɩ Bibl.

Lɩmaɣza ana Gavin kaawɛna. Ɛɛpaɣzɩ kediɣzisi wobu ɛlɛ etitisi se pɛkpɛlɩkɩnɩ-ɩ Bibl. Ɛyɔɔdaa se: “Mantaatɩlɩ Bibl yɔɔ tɔm sakɩyɛ nɛ mantaasɔɔlɩ se nɔɔyʋ ɛna se mɛwɛnɩ ɛjandʋ ndʋ. Mantaañɩnɩɣ se nɔɔyʋ ɛcɛtɩ-m nɛ mantaañɩnɩɣ ɖɔɖɔ se mentisi tɔm natʋyʋ nɛ pʋwayɩ lɛ, maapɩzɩɣ tɩ-yɔɔ ɖɔm.” Suwe ŋmaɣzɩɣ? Ŋmaɣzɩɣ se wiɖiyi Gavin ɛɛkaɣ tisuu se ɛkpɛlɩkɩ Bibl? Aayɩ! Maɣzɩ ɖoŋ kɩbaŋ weyi Bibl taa tɔm pɩzɩɣ nɛ pɩwɛɛnɩ ɛyʋ yɔɔ yɔ, ɩ-yɔɔ nɛ ŋna. Yehowa kaaheyi ɛ-samaɣ caanaʋ taa se: “[Mɔn-tɔm] ɛkpa ɛzɩ ɖoluu yɔ, ɛzɩ lɩm hola ñɩtʋ lɛŋ ndʋ yɔɔ, nɛ ɛzɩ tɛʋ luluu hɛtʋ yɔɔ yɔ.” (Wayɩ Wayɩ Paɣtʋ 31:19, 30; 32:2) Ye ɖɩmaɣzɩ ɛzɩma ɖoluu lakɩ tʋmɩyɛ yɔ pɩ-yɔɔ kɔyɔ, pɩpɩzɩɣ piyele nɛ ɖɩsɩnɩ ɛyaa kpeekpe tɔm susuu taa camɩyɛ.​—1 Timootee 2:3, 4.

Ðoluu kpaɣ hɛɛ hɛɛ. Hulumiye kpaɣnɩ pazɩ pazɩ nɛ pɩkɔɔ pɩpɩsɩ ɖoluu. Yehowa yɔɔdʋʋ se ‘ɛ-tɔm kpaɣ ɛzɩ ɖoluu yɔ,’ pʋ-tɔbʋʋ lɛ se ɛyɔɔdaɣnɩ ɛ-samaɣ hɛɛ nɛ nɔɔ kɩbaŋa nɛ ñamtʋ. Ða ɖɔɖɔ ye ɖɩñaŋ ɛyaa lalaa lɩmaɣza yɔ, pɩwɩlɩɣ se ɖɩmaɣzɩɣnɩ Yehowa. Ðiseɣtiɣ-wɛ se pamaɣzɩ ndʋ ɖiheyi-wɛ yɔ tɩ-yɔɔ, nɛ pʋwayɩ lɛ pa-maɣmaɣ pakpaɣ pa-lɩmaɣza. Ye ɖɩñaŋ pa-lɩmaɣza mbʋ yɔ, pɩsɩɣnɩ-wɛ nɛ panɩɩ tɔm ndʋ ɖiheyiɣ-wɛ yɔ tɩ-taa camɩyɛ nɛ piyeki nɛ ɖɔ-tɔm susuu lʋlɩ pee kɩbana.

Ðoluu niɣdiɣ ñɩtʋ. Ye ɖɩmaɣzɩɣ nʋmɔŋ ndɩ ndɩ weyi ɩ-yɔɔ ɖɩtɩŋna nɛ ɖɔ-tɔm tukuni ɛyaa laŋa yɔ, piyeki nɛ ɖɔ-tɔm susuu niɣdi-wɛ yaa pɩhɛzɩ pa-laŋa. Gavin weyi ɖɩyɔɔdɩ ɛ-tɔm nɛ pɩɖɛɛ yɔ, pataakpa-ɩ nɛ ɖoŋ se ɛkpɛlɩkɩ Bibl. Ɛlɛ koobu Chris weyi ɛcalɩ-ɩ katʋʋ yɔ, ɛtɩŋnɩ nʋmɔŋ ndɩ ndɩ yɔɔ se ɛsɩnɩ-ɩ nɛ Bibl taa tɔm kɛdɩnɩ-ɩ. Chris lɩzɩ Gavin pɩ-taa se Bibl yɔɔdʋʋ tɔm kɩbandʋ natʋyʋ nɛ ye ɛnɩ tɩ-taa kɔyɔ, pɩsɩɣnɩ-ɩ nɛ ɛnɩɩ kediɣzisi taa camɩyɛ nɛ pɩkɩlɩ. Pʋwayɩ lɛ, Chris heyi-i se ɛzɩma Bibl natʋ tɔm wɛɛ nɛ tɩlakɩ yɔ, mbʋ yebina nɛ ɛnʋ tisi se Bibl yɔɔdʋʋ toovenim. Piyeba nɛ ɛ nɛ ɩ pala faawɩyɛ tam sakɩyɛ ɛzɩma Bibl natʋ tɔm ɖiɣni labʋ yɔ pɩ-yɔɔ. Pa-faawɩyɛ labʋ mbʋ, pɩhɛzɩ Gavin laŋɩyɛ nɛ etisi se pɛkpɛlɩkɩnɩ-ɩ Bibl.

Ðoluu yeki se ñɩtʋ ɩtaawɩlɩ. Alɩwaatʋ ndʋ wɩlɩŋ kpaɣ Izrayɛɛlɩ ɛjaɖɛ taa yɔ, pɩpɩzɩɣ pɩla fenasɩ sakɩyɛ tɛʋ ɛɛnɩɣ. Ye pɩtɩkɛ ɖoluu yɔɔ kɔyɔ, ñɩtʋ nɛ tɔɔnasɩ polou wɔɔɔ nɛ pawɩlɩ. Yehowa kaayɔɔdaa se ɖa-alɩwaatʋ tʋnɛ tɩ-taa, fezuu taa ñɔɔsɩ kaɣ ɛyaa wɩʋ nɛ fezuu taa lɔkɔtʋ ɖɔɖɔ ɖɔkɩ-wɛ. (Amosi 8:11) Ɛlɛ, ɛyɔɔdaa ɖɔɖɔ se patam numwaa kaɣ wɛʋ ɛzɩ “ɖoluu ŋgʋ kɩlɩnɩ” ɛ-cɔlɔ yɔ, mbʋ pʋyɔɔ yɔ pa nɛ “heŋ lɛɛŋ” pakaɣ susuu Kewiyaɣ laŋhɛzɩyɛ tɔm. (Mikee 5:6; Yohanɛɛsɩ 10:16, ABT) Ŋnɩɣ pɩ-taa se Kewiyaɣ tɔm ndʋ ɖisusuu yɔ, tɩkɛ fezuu taa tɔɔnaɣ ŋga Yehowa haɣ ɛyaa se kasɩnɩ-wɛ nɛ pataasɩ ñɔɔsɩ fezuu taa yɔ?

Ðoluu kɛnɩ wazaɣ ŋga kalɩnɩ Yehowa cɔlɔ yɔ. (Wayɩ Wayɩ Paɣtʋ 33:13) Tɔm ndʋ ɖisusuu yɔ, tɩpɩzɩɣ tɩwazɩ mba pewelisiɣ-tʋ yɔ. Mbʋ ɖɔɖɔ tɩwazɩ Gavin. Alɩwaatʋ ndʋ ɛkpɛlɩkaɣ Bibl yɔ, ɛpɩzaa nɛ ɛnɩɩ tɔm ndʋ ɛpɔzaɣ ɛ-tɩ yɔ tɩ-tɩŋa tɩ-taa. Piyeba nɛ ɛɖɛɛnɩ ɛzɩdaa lɛɛ lɛɛ nɛ pamɩyɩsɩ-ɩ lɩm nɛ lɛɛlɛɛyɔ lɛ, ɛ nɛ ɛ-halʋ Joyce pɛwɛ alɩwaatʋ tɩŋa Ɛsɔ sɛtʋ tʋmɩyɛ taa nɛ posusuu Kewiyaɣ laŋhɛzɩyɛ tɔm.

Ye ɖɩkpakɩɣ ɖɔ-tɔm susuu nɛ ɖɩmaɣzɩɣnɩ ɖoluu kɔyɔ, pɩsɩɣnɩ-ɖʋ ɖɔɖɔ nɛ ɖɩna se pana wena ɖa-taa paa weyi ɛñakɩ tɔm susuu taa yɔ, awɛnɩ wazaɣ siŋŋ. Ɛzɩma tɩyɛ? Ðoluu piye kʋɖʋmɖɩyɛ ɛɛpɩzɩɣ nɛ ɖiniɣdi tɛtʋ tɩŋa, ɛlɛ ye ɖoluu ɛɖɔwa yɔ kɩpɩzɩɣ kiniɣdi-tʋ camɩyɛ. Mbʋ ɖɔɖɔ pɩpɩzɩɣ nɛ pɩlabɩ-ɖʋ ɛzɩ pana wena ɖa-taa paa weyi ɛñakɩ tɔm susuu taa yɔ, atɩlɩɩ pʋyʋ. Ɛlɛ ye pɛkpɛndɩ pana wena Yehowa sɛyaa tɩŋa ñakɩ tɔm susuu taa yɔ, piyeki se “ɛyaa kpeekpe” ɩnɩɩ laŋhɛzɩyɛ tɔm. (Maatiyee 24:14) Ðɩkaɣ yebu se ɖɔ-tɔm susuu ɛwazɩ ɛyaa lalaa na? Ɛzɩ ɖoluu yɔ, ye ɖɩyɔɔdʋʋnɩ ɛyaa nɛ nɔɔ kɩbaŋa nɛ ɖiheyiɣ-wɛ tɔm ndʋ tɩhɛzɩɣ pa-laŋa nɛ tiyeki se pataasɩ fezuu taa ñɔɔsɩ yɔ, ɖɔ-tɔm susuu kaɣ-wɛ wazʋʋ.