Ɛbɛ yɔɔ pɩpɔzʋʋ ɛyaa Ɛsɔ Kewiyaɣ?
Lɩzɩyʋ weyi payaɣ se Yehowa yɔ, ɛlɩzɩ ɛyaa tɛtʋ yɔɔ kpaagbaa lɛ, e-ɖeke ɛɛkɛnɩnɩ pa-Ðiyiyu. Eɖiyaɣ-wɛ nɛ sɔɔlɩm. Ɛɛñɔɔzɩ kaɖaɣ kɩbaŋa nakɛyɛ, ŋga payaɣ se Edɛɛnɩ kaɖaɣ yɔ se kɛkɛ ɛyaa ɖɩɣa, nɛ ɛha-wɛ ɖɔɖɔ tɔɔnasɩ kɩbanzɩ ndɩ ndɩ nzɩ pɔtɔɔ yɔ. Pɩtasɩ lɛ, ɛɖʋ ɛyaa tʋmɩyɛ naɖɩyɛ se pala. (Kiɖe Tɛɛ Tɔm 1:28, 29; 2:8, 15) Ye ɛyaa iiluzi pa-tɩ Ɛsɔ weyi eɖiyaɣ-wɛ nɛ sɔɔlɩm yɔ ɛ-tɛɛ yɔ, paawɛ pɛɛyɛ taa.
Aɖam nɛ Ɛva pekizaa se Ɛsɔ ɛtaakɛ pe-Ðiyiyu
Bibl wɩlɩɣ se Ɛsɔ tiyiyu nɔɔyʋ kaɖɩnɩ Ɛsɔ Kewiyitu tɔɔʋ. Tiyiyu ɛnʋ pɔkɔma nɛ payaa pʋwayɩ se Sataŋ Eleeu. Ɛyɔɔdaa se ye ɛyaa ɛfɛyɩ Ɛsɔ Kewiyitu tɛɛ yɔ, pɛwɛɣ koboyaɣ taa siŋŋ. Pɩlabɩ pʋtɔdɩyɛ se ɖɔ-cɔzɔ Aɖam nɛ ɖe-neze Ɛva pewelisini Sataŋ nɛ pakaɖɩnɩ Ɛsɔ.—Kiɖe Tɛɛ Tɔm 3:1-6; Natʋ 12:9.
Aɖam nɛ Ɛva pekizaa se Ɛsɔ ɛtaakɛ pe-Ðiyiyu, piyeba nɛ pelesi pa-ɖɩɣa kɩbaŋa ŋga kaakɛ paradisuu yɔ; nɛ pelesi ɖɔɖɔ lidaʋ ŋgʋ paawɛna se pacaɣ wezuu tamtam nɛ pɛwɛɛnɩ tɔnʋʋ taa alaafɩya kiya yɔ. (Kiɖe Tɛɛ Tɔm 3:17-19) Lɩmaɣza wena pakpaɣ yɔ, akɔnɩ asɛyʋʋ pɛ-sɛyɩnaa yɔɔ. Bibl yɔɔdaa se Aɖam kɩwɛɛkɩm yɔɔ lɛ, ‘kɩwɛɛkɩm lɩ ɛjaɖɛ yɔɔ nɛ sɩm ñatɩŋnɩ kɩwɛɛkɩm yɔɔ nɛ pɩlɩɩ.’ (Roma mba 5:12) Kɩwɛɛkɩm tasɩ kɔnʋʋ ɖɔɖɔ asɛyʋʋ sɔsɔʋ nakʋyʋ: “Ɛyʋ ñazɩɣ ɛyʋ nɛ ɛwɩlɩɣ-ɩ kʋñɔŋ.” (Eklesɩyastɩ 8:9) Tɔm tʋnɛ tɩ-tɔbʋʋ lɛ se ye ɛyaa ɩkɛnɩ ɖiyiyaa yɔ, paa pɩɩkpawa nɛ pitii yɔ ɖɩkaɣ katʋʋ kʋñɔmɩŋ.
ƐYAA PAƔZƖ KEWIYITU TƆƆƲ
Nimroodi kaɖɩnɩ Yehowa
Ɛyʋ kajalaɣ tʋ weyi ɛpaɣzɩ kewiyitu tɔɔʋ tɛtʋ yɔɔ nɛ pɔyɔɔdɩ ɛ-tɔm Bibl taa yɔ, ɛnʋ lɛ Noowa sɛyɩ Nimroodi. Nɛ Nimroodi kaɖɩnɩ Yehowa kewiyitu tɔɔʋ. Nɛ kpaɣnɩ Nimroodi alɩwaatʋ taa nɛ sɔnɔ, ɛyaa mba pɔtɔkɩ kewiyitu yɔ, paalakɩnɩ po-ɖoŋ tʋmɩyɛ camɩyɛ. Pɩlakɩ pɩnzɩ 3000 yɔ, Wiyaʋ Salomɔɔ mawa se: “Mba panazɩ-wɛ yɔ pɛ-ɛsɩtɛɣlɩm kɔyɔ, nɛ laŋɩyɛ hɛzɩyʋ nɔɔyʋ fɛyɩ; nazɩyaa ɖɔŋ-wɛ wɩlʋʋ ñaŋ.”—Eklesɩyastɩ 4:1.
Mbʋ ɖeyi ɖeyi pɩwɛ sɔnɔ. Pɩnaɣ 2009 taa, Ajɛɛ Kɩgbɛndʋʋ Ɛgbɛyɛ (ONU) takayaɣ nakɛyɛ yɔɔdaa se piɖiɣni naʋ kpayɩ kpayɩ se “kʋñɔmɩŋ sakɩyɛ weyi ɩwɛ ɛjaɖɛ yɔɔ yɔ, ɩlɩnɩ ɛzɩma ɛyaa ɩɩtɔkɩ kewiyitu camɩyɛ yɔ pɩ-cɔlɔ.”
ALƖWAATƲ TALAA
Ɛyaa sɔɔlaa se pɛwɛɛnɩ ɖiyiyaa kɩbama nɛ komina kɩbaŋʋ; nɛ tamaɣ ŋga ɖeyi ɖeyi ɖa-Lɩzɩyʋ labɩ-ɖʋ.
Halɩ ɛyaa kominawaa kɩbama tɩpɩzɩ nɛ pɔcɔnɩ ɛyaa kʋñɔmɩŋ sɔsɔŋ ɖeɖe
Ɛsɔ sɩ Kewiyaɣ nakɛyɛ yaa komina nakʋyʋ nɛ kɩkaɣ lɛɣzʋʋ ɛyaa kominawaa lone taa, nɛ komina ŋgʋ ‘kɩkaɣ wɛʋ tam.’ (Danɩyɛɛlɩ 2:44) Kewiyaɣ ŋga ɛyaa miiliyɔɔwaa sakɩyɛ tɩmɩɣ nɛ pɔpɔzʋʋ se kɔkɔɔ. (Maatiyee 6:9, 10) Ɛlɛ pɩtɩkɛ Ɛsɔ maɣmaɣ kaɣnɩ kɛʋ komina ŋgʋ kɩ-ñʋʋdʋ. Ɛlɩzɩ nɔɔyʋ nɛ ɛha-ɩ ɖoŋ se ɛkɛ kɩ-ñʋʋdʋ. Weyi ɛlɩzaa yɔ, ɛɛcaɣ wezuu ɛzɩ ɛyʋ yɔ tɛtʋ yɔɔ. Anɩ Ɛsɔ lɩzaa?
