Mɛkɩsiiki egeetiye nɖɩ payaɣ se Tamaulipas yɔ, ɖɩ-tɛtʋ kɩbandʋ ndʋ payaɣ se Ciudad Mante yɔ, tɩ-taa palʋlɩ-m. Toovenim taa lɛ, ɛyaa mba pɛwɛ tɛtʋ ndʋ tɩ-taa yɔ, pɛ-wɛtʋ wɛ ɖeu nɛ palakɩ ɖama kʋjɔŋ. Ɛlɛ pɩlabɩ pʋtɔdɩyɛ se puuyaɣ lakasɩ yɔɔ lɛ, lone nɖɩ ɖɩ-taa caɣʋ kaawɛ kaɖɛ.

Ðɩkpɛndɩ abalɩbiya naadozo nɛ kajalaɣ tʋ wayɩ lɛ, mantɩŋna. Ma-lʋlɩyaa kaayeba nɛ palabɩ-m lɩm sɔʋ sɔnzɩ Katooliki cooci taa nɛ pʋwayɩ lɛ manpɩsɩ cooci taa hendu teyaa taa lɛlʋ. Maasɔɔlaa se mɔn-tɔm ɛkɛdɩnɩ Ɛsɔ mbʋ pʋyɔɔ yɔ, sɔɔndʋ kpaɣaɣ-m se mantaala nabʋyʋ nɛ pʋyɔɔ lɛ, Ɛsɔ kɔɔ nɛ ɛɖʋ-m miŋ maatɛŋ taa.

Mɔnkɔma nɛ mɛwɛɛnɩ pɩnzɩ kagbanzɩ lɛ, ɖa-caa ɖɛɛ nɛ eyebi-ɖʋ. Ɛ-ɖɛʋ mbʋ, pisidi ma-lɩmaɣza taa nɛ pɩkɔnɩ-m laŋwɛɛkɩyɛ siŋŋ, mbʋ pʋyɔɔ yɔ ɖɩɩsɔɔlɩ ɛ-tɔm nɛ mantɩna mbʋ pʋyɔɔ ɛlabɩ mbʋ yɔ. Peeɖe mon-ɖoo paɣzɩ tʋmɩyɛ labʋ ñɩɣtʋ sakɩyɛ paa evemiye nɖɩ se pɩsa nɛ ɛcɔnɩ ɖa abalɩbiya naanza ɖɔ-yɔɔ.

Wɛtʋ ndʋ tɩhanɩ-m waɖɛ nɛ manpaɣzɩ taabalɩyɛ kɩdɛkɛdɩyɛ ɖʋʋ nɛ me-egeetiye taa piya nzɩ sɩkɩlɩ-m pɩnzɩ yɔ, nɛ mɔnkɔɔ nɛ meyele sukuli wobu. Pɛkpɛlɩkɩ-m tɔm kɩdɛkɛdɩtʋ yɔɔdʋʋ, sɩgaa nɛ tabakʋʋyaɣ ñɔʋ, mɩlɩm nɛ kɩmakʋ. Ɛzɩma maasɔɔlaa se nɔɔyʋ ɛtaawabɩ-m yɔ, pʋyɔɔ lɛ, mɛnkpɛlɩkɩ boxe, lʋbɩyɛ, karaté, nɛ halɩ pɩkpɛndɩnɩ you labʋ nɛ sɩsɩ. Peeɖe manpɩsɩ pɩɣa evelaɣ ŋga kɛwɛ puuyaɣ pɩdɩɩfɛyɩ yɔ. Nabʋyʋ taa ɖiyowaɣni ɖama nɛ malɩfanaa, nɛ tam sakɩyɛ you tɛŋ lɛ, mefiɣnaa, nɛ mɔ-yɔɔ nɛ calɩm ɖeke. Mon-ɖoo kɔŋ nɛ ɛmaɣnɩ-m mbʋ lɛ, ɛkpaɣ-m lɛɛ lɛɛ nɛ ɛɖɛnɩ fɛɖaa tɛɛ, nɛ wɛtʋ ndʋ tɩɖʋwaɣ-ɩ wɩzasɩ pɩdɩɩfɛyɩ!

Mantalɩ pɩnzɩ 16 lɛ, evemiye naɖɩyɛ, man-taabalʋ nɔɔyʋ kɔɔ ɖɛ-tɛ, payaɣ-ɩ se Jorge, ɖɩɩsɩm ɖama ɖooo ɖe-pitu taa. Eheyi-ɖʋ se ɛkɛ Yehowa Aseɣɖe Tʋ nɛ ɛsɔɔlaa se eheyi-ɖʋ tɔm kɩcɛyɩtʋ natʋyʋ. Nɛ ɛpaɣzɩ e-tisuu tɔm yɔɔdʋʋ nɛ ɛkpakɩɣ Bibl nɛ ɛñɩkɩɣnɩ niye ndʋ eheyiɣ-ɖʋ yɔ, tɩ-yɔɔ. Wiɖiyi mantɩkalɩ-tʋ nɛ mana nɛ pɩɩlabɩ-m leleŋ siŋŋ se mantɩlɩ Ɛsɔ hɩɖɛ nɛ ɛ-kaɖʋwa tɔm. Jorge heyi-ɖʋ se ye ɖɩsɔɔlaa yɔ, ɖa nɛ ɩ ɖɩpɩzɩɣ nɛ ɖɩpaɣzɩ Bibl kpɛlɩkʋʋ. Peeɖe ɖitisaa nɛ ɖa nɛ ɩ ɖɩpaɣzɩ kpɛlɩkʋʋ.

Pɩɩlabɩ-m leleŋ siŋŋ alɩwaatʋ ndʋ mɛnkpɛlɩkaa nɛ mana se miŋ maatɛŋ wɩlɩtʋ tɩlɩɩnɩ Bibl taa yɔ. (Keɣa145:4; Eklesɩyastɩ 9:5) Kpaɣnɩ alɩwaatʋ ndʋ mantɩlɩ  toovenim tɔm ndʋ yɔ, maatasɩɣ Ɛsɔ seu sɔɔndʋ ɛzɩ coojo yɔ, ɛlɛ ɛpɩsɩ-m caja kɩbanʋ weyi ɛsɔɔlɩ siŋŋ se piɖeni e-piya yɔ.

Mɛwɛɛ mɛnkpɛlɩkɩɣ nɛ mɛnɖɛɣnɩ ɛzɩdaa lɛ, mana se pɩcɛyaa se mɛlɛɣzɩ mɛ-wɛtʋ nɛ pɩmʋnɩ ndʋ Bibl wɩlɩɣ yɔ. Pɩwɛɛ se mɛnkpɛlɩkɩ tɩ luzuu nɛ meyele puuyaɣ lakasɩ. Lɔŋ tasʋʋ mbʋ pɩwɛ 1 Kɔrɛntɩ 15:33 taa yɔ pɩsɩnɩ-m siŋŋ. Pɔyɔɔdʋʋ peeɖe se taabalɩyɛ kɩdɛkɛdɩyɛ “lesiɣ lakasɩ kɩbanzɩ tʋ.” Mayaɣ ŋga kasɩnɩ-m nɛ manɩɩ pɩ-taa se ye mɔnsɔɔlaa se mɛlɛɣzɩ mɛ-wɛtʋ yɔ, pɩcɛyaa se ma nɛ mba pɛwɛnɩ wɛtʋ kɩdɛkɛdɩtʋ yɔ, ɖɩcɛ taabalɩyɛ. Peeɖe mɛncɛbɩ taabalaa mba maawɛna yɔ, nɛ manpaɣzɩ taabalɩyɛ ɖʋʋ nɛ Krɩstʋ ɛgbɛyɛ toovenim ñɩnɖɛ taa ñɩma, mbʋ pʋyɔɔ yɔ, paa tɔm ɛkɔm pɛ-hɛkʋ taa yɔ, Bibl masɩ pakpakɩɣ nɛ pɔñɔɔzɩnɩ-tʋ, pɩtɩkɛ ŋgulumee nɛ puuyaɣ lakasɩ.

Bibl hɔɔlɩŋ weyi ɩɩsɩnɩ-m yɔ, ɩ-taa lɛɛkʋ ɖɔɖɔ lɛ Roma 12:17-19. Pɔyɔɔdɩ peeɖe se: “Ɩtaahɛyɩ nɔɔyʋ kɩdɛkɛdɩm, kɩdɛkɛdɩm yɔɔ. . . . Ye ɩpɩzɩɣ kɔyɔ, ye pɩwɛɛ mɩ-cɔlɔ na yɔ, laŋhɛzɩyɛ ɛwɛɛ mɩ nɛ ɛyaa kpeekpe mɩ-hɛkʋ taa, itaaɖezi mɩ-tɩ tɔm, . . . Mbʋ yɔ [Yehowa] tɔm Takayaɣ Kiɖeɖeɣa taa se: ‘Makaɣnɩ tɔm ɖezuu, Makaɣnɩ hɛyʋʋ.’” Mɔnkɔm nɛ manɩɩ pɩ-taa se Yehowa kaɣnɩ yebu nɛ mulum lakasɩ sɩɩ tɩnaɣ, alɩwaatʋ ndʋ ɛ-maɣmaɣ ɛɖʋwa yɔ tɩ-yɔɔ. Pazɩ pazɩ lɛ, mɔnkɔm nɛ meyele puuyaɣ lakasɩ nzɩ maawɛna yɔ.

Maakaɣ sɔʋ mbʋ pɩlabɩ ɖanaɣ nakɛyɛ yɔ, pɩ-yɔɔ kaaʋ. Mɔnɖɔŋaɣ habɩyɛ yɔɔ nɛ menkpeŋ mɛn-tɛ lɛ, evebiya nabɛyɛ katɩ-m, paakɛ añɔndɔmwaa mba ma nɛ ma-taabalaa ɖɩkaɣaɣ nɛ ɖiyouni-wɛ yɔ, pa-taa nabɛyɛ. Weyi ɛɛɖɛ-wɛ nɔɔ yɔ, ɛkɔɔ ɛmabɩ-m nɛ ma-wayɩ kiŋ nɛ eholi mɔ-yɔɔ se: “Lɛdɩ-m nɛ mana!” Peeɖe mantɩmnɩ Yehowa se ɛsɩnɩ-m nɛ manpɩzɩ malɩɩ kaɖɛ nɖɩ ɖɩ-taa. Pɩɩɖɔm ma-nandʋ taa wɩɩɩ se mɛlɛdɩ-ɩ, ɛlɛ mɔnɖɔkɩ man-tɩ kpam. Tɛʋ fema lɛ, mankatɩ pa-ñʋʋdʋ ɛnʋ e-ɖeke. Pana ɖaɣnɩ man-taa kpaʋ se mankpa-ɩ mbʋ ɛlabɩ-m yɔ pɩ-kɩmɩyɛ lɛ, manɖaɣnɩ Yehowa tɩmnʋʋ se ɛsɩnɩ-m nɛ mɔnɖɔkɩ man-tɩ. Ɛkɔma nɛ ɛñɔtɩnɩ-m lɛ, pɩɖɩɣzɩ-m siŋŋ alɩwaatʋ ndʋ eheyi-m se: “Kpaɣ nɛ ŋkpeɣ-m ɖeɖe mbʋ ɖɩlabɩ-ŋ yɔ, pɩ-yɔɔ. Toovenim lɛ, mancaɣ se mɛwɛɛ ɛzɩ ña yɔ. Mɔnsɔɔlaa se mɛnkpɛlɩkɩ Bibl.” Man-taa labɩ leleŋ kpem se maapɩzaa nɛ mɔnɖɔkɩ man-tɩ. Piyeba nɛ ma nɛ ɩ ɖɩpaɣzɩ Bibl kpɛlɩkʋʋ.

Pɩlabɩ pʋtɔdɩyɛ se mɔ-hɔʋ taa ñɩma lalaa tɩpɩzɩ nɛ papaɣzɩ Bibl kpɛlɩkʋʋ alɩwaatʋ ndʋ tɩ-taa. Paa mbʋ yɔ, maaɖʋ man-taa se nɔɔyʋ yaa nabʋyʋ etaayele nɛ me-Bibl kpɛlɩkʋʋ sɩɩ tɩnaɣ. Maanawa se ye manɖʋʋ taabalɩyɛ nɛ Ɛsɔ samaɣ yɔ, pɩkaɣ-m sɩnʋʋ siŋŋ, nɛ mehiɣ ɖɔɖɔ taabalaa kɩbama mba mañɩnaɣ yɔ. Pʋyɔɔ mowobi pɩ-yɔɔ nɛ mañaɣ pana, nɛ pɩkɔm nɛ pɩtalɩ pɩnaɣ 1991 lɛ, pamɩyɩsɩ-m lɩm nɛ manpɩsɩ Yehowa Aseɣɖe Tʋ.

Maakɛ pana nɛ puuyaɣ tʋ, nɛ maasɔɔlɩ ɖɔɖɔ lalaa ñazʋʋ. Ɛlɛ Bibl lɛɣzɩ me-wezuu caɣʋ hɔɔlɩŋ kpeekpe taa. Sɔnɔ mɛwɛɛ nɛ monsusuu laŋhɛzɩyɛ tɔm ɛyaa mba payɩ pɔsɔɔlɩ-tʋ nɩʋ yɔ. Man-taa wɛ leleŋ se pɩnzɩ 23 nzɩ sɩɖɛwa yɔ sɩ-taa, manpɩzaa nɛ mala paa ɖooye nʋmɔʋ lɩzʋʋ tʋmɩyɛ.

Alɩwaatʋ natʋyʋ maaha man-tɩ faaa nɛ mala tʋmɩyɛ ɖɔɖɔ Yehowa Aseɣɖe Tɩnaa ɛgbɛyɛ piliŋa ŋga kɛwɛ Mɛkɩsiiki yɔ ka-taa. Peeɖe mankatɩ koobu halɩñɩnʋ Claudia, weyi ɛwɛ kpekpeka Ɛsɔ sɛtʋ taa yɔ nɛ ma nɛ ɩ ɖɩɖɔkɩ nesi pɩnaɣ 1999 taa. Mɛnsɛɣ Yehowa se ɛha-m sɩnɩyʋ kɩbanʋ ɛnɛ!

Ðɩɖʋ nesi Mɛkɩsiiki ɛjaɖɛ taa tandamaa ɛgbɛyɛ naɖɩyɛ nɛ ɖɩsɩɣnɩ ɖɩ-taa ɛyaa se patɩlɩ Yehowa tɔm. Pʋwayɩ lɛ, ɖiwolo Beliizi se ɖɩwɩlɩ Ɛsɔtɔm peeɖe ñɩma. Paa lɛɛlɛɛyɔ ɖe-wezuu caɣʋ ɛwɛ kɛlɛʋ ɛzɩma yɔ, ɖa-taa wɛ leleŋ se mbʋ ɖɩwɛna yɔ pɩkɔŋnɩ-ɖʋ koboyaɣ. Ðiikpiɖiɣ kɩlaŋ weyi ɖɩlawa yɔ, ɩ-yɔɔ.

Pʋwayɩ, mon-ɖoo kɔma nɛ ɛɖaɣnɩ paɣzʋʋ Bibl kpɛlɩkʋʋ nɛ pamɩyɩsɩ-ɩ lɩm. Pɩtasɩ lɛ, man-ɖalʋ nɛ ɛ-halʋ nɛ e-piya pɛkɛ Yehowa Aseɣɖe Tɩnaa sɔnɔ. Monsusi Kewiyaɣ tɔm man-taabalaa kɩbɩma nabɛyɛ nɛ paba ɖɔɖɔ papɩsɩ Yehowa Aseɣɖe Tɩnaa.

Pɩlabɩ pʋtɔdɩyɛ se mɔ-hɔʋ taa ñɩma nabɛyɛ lesi pe-weziŋ, mbʋ pʋyɔɔ yɔ petitisi nɛ pɛlɛɣzɩ pe-wezuu caɣʋ nɛ peyele puuyaɣ lakasɩ. Ye mantaalɛɣzɩ me-wezuu caɣʋ yɔ, pɩtʋʋ fɛyɩ se mbʋ ɖɔɖɔ pɩɩtɛmnɩ-m. Sɔnɔ, man-taa wɛ leleŋ se Yehowa ha-m waɖɛ se mɔñɔtɩnɩ-ɩ, nɛ mɔñɔtɩnɩ ɖɔɖɔ ɛ-sɛyaa mba pakpaɣ suuɖu nɛ pawɩlɩ-m ɛzɩma malabɩnɩ Bibl paɣtʋ kila tʋmɩyɛ me-wezuu caɣʋ taa yɔ.