Ɛyaa sakɩyɛ maɣzɩɣ se pɩkɛnɩ ɖoziye se ɛyʋ ɛɖaŋ se wiɖiyi ɛyaa mba pɛwɛnɩ tomnaɣ tɔlɩm ndɩ ndɩ yɔ paakaɣ wɛʋ kɩmaŋ.

•   «Ɛzɩma ɛyaa wɛnɩ tomnaɣ tɔlɩm ndɩ ndɩ yɔ, pɩwɛnɩ ɖoŋ kɩdɛkɛdɩŋ ɛyaa wezuu caɣʋ hɔɔlɩŋ ndɩ ndɩ yɔɔ ɛzɩ tʋma nɛ agbaa taa mbʋ yɔ. Piyeki nɛ ɛyaa woki pɩ-yɔɔ nɛ pomuluu ɖama.» (Ɛgbɛyɛ nɖɩ payaɣ se ONU yɔ ɖɩ-takayaɣ taa mayʋ António Guterres yɔɔdɩnɩ-tʋ).

 Wiɖiyi ɛyaa kaɣ wɛʋ kɩmaŋ paa pɛwɛnɩ tomnaɣ tɔlɩm ndɩ ndɩ yɔ? Suwe Bibl yɔɔdʋʋ?

 Bibl heyiɣ-ɖʋ lɩmaɣza wena Ɛsɔ wɛnɩ ɛyaa yɔɔ paa pɛwɛnɩ tomnaɣ tɔlɩm ndɩ ndɩ yɔ.

•   «[Ɛsɔ] tɩŋnɩ ɛyʋ kʋɖʋm yɔɔ nɛ ɛla ajɛɛ ndɩ ndɩ taa ɛyaa se pacaɣ tɛtʋ tɩŋa yɔɔ.»—Tʋma Labʋ 17:26.

•   «Ɛsɔ ɛɛtʋkʋʋ ɛyaa taa, ɛlɛ paa ɛjaɖɛ nɖɩ ɖɩ-taa, weyi ɛñaŋɩ-ɩ nɛ ɛlakɩ mbʋ pɩwɛ ɖeu yɔ ɛ-tɔm kɛdɩɣnɩ-ɩ.»—Tʋma Labʋ 10:34, 35.

 Bibl wɩlɩɣ se ɛyaa tɩŋa lɩnɩ hɔʋ kʋɖʋmʋʋ taa nɛ Ɛsɔ ɛɛtʋkʋʋ ɛyaa taa paa tomnaɣ tɔlɩm mbʋ pɛwɛna yɔ.

 Ɛsɔ Kewiyaɣ, pʋ-tɔbʋʋ se ɛsɔdaa komina kaɣnɩ yebu nɛ ɛyaa wɛɛ kɩmaŋ. Komina ŋgʋ kɩkaɣ wɩlʋʋ ɛyaa ɛzɩma pala ɖama mbʋ pɩtʋʋzaa yɔ. Ɛyaa kaɣ kpɛlɩkʋʋ ɛzɩma pataaɖʋ tʋkaɣ ɛyaa taa ye pɛkpɛndɩ pɛwɛnɩ wɛtʋ ndʋ yɔ.

•   «Ɛjaɖɛ taa mba [kaɣ kpɛlɩkʋʋ] siɣsiɣ wɛtʋ.»—Izaayii 26:9.

•   «Toovenim siɣsiɣ wɛtʋ kaɣ lʋlʋʋ laŋhɛzɩyɛ, nɛ toovenim siɣsiɣ wɛtʋ piye kaɣ kɛʋ tamtam ɖiɣ ɖiɣ caɣʋ nɛ pɛɛyɛ.»—Izaayii 32:17.

 Sɔnɔ, ɛyaa miiliyɔɔwaa sakɩyɛ wɛɛ nɛ pɛkpɛlɩkɩɣ Bibl taa ɛzɩma paña ɛyaa lalaa nɛ paɖʋ-wɛ hɩɖɛ yɔ.

•   Pɩsa nɛ ŋtɩlɩ nɛ pɩkpaɖɩ lɛ, kalɩ Réveillez-vous! «Y a-t-il un remède contre les préjugés?»

•   Kalɩ tɔm ñʋʋ «Comment parler de racisme à votre enfant?» nɛ ŋna ɛzɩma lʋlɩyaa pɩzɩɣ pakpaɣna nɛ pa nɛ pe-piya patazɩ tɔm ndʋ tɩ-taa yɔ.