COVID-19 kʋdɔŋ sɔsɔʋ tɔm wɛɛ nɛ pɩkpaɣ-ŋ sɔɔndʋ nɛ pɩhaɣ-ŋ nɩɣzɛ na? Ye mbʋ yɔ, pɩtɩkɛ ñe-ɖeke pɩlakɩ mbʋ. Pɩlakɩ fenasɩ sakɩyɛ yɔ, kedeŋa kpeekpe yɔɔ ɛyaa lɛɣzɩ pe-wezuu caɣʋ COVID-19 yɔɔ. Ðɔkɔtɔ sɔsɔ Hans Kluge weyi ɛkɛ Ɛjaɖɛ kpeekpe yɔɔ tɔnʋʋ taa alaafɩya ɛgbɛyɛ tʋmɩyɛ yɔɔ cɔnɩyʋ Erɔɔpɩ yɔ, ɛyɔɔdaa se: “Sakɩyɛ labɩ kɩlaŋ sɔsɔŋ se palʋbɩnɩ COVID-19. Wɛtʋ ndʋ tɩ-taa, pɩwɛ kɛlɛʋ se ɛyʋ ɛsʋʋ nɩɣzɛ taa nɛ pitibi-i yɔɔɔ nɛ pɩma e-toma taa.”

 Ye ŋwɛ mbʋ payaɣ se kʋdɔŋ sɔsɔʋ alɩwaatʋ taa nɩɣzɛ taa yɔ, taayele nɛ pitibi-ŋ yɔɔɔ. Bibl wɛɛ nɛ kɩsɩɣnɩ ɛyaa sakɩyɛ se papɩzɩ nɛ palʋbɩnɩ kala wena ɖɩkatɩɣ kaɖɛ alɩwaatʋ tʋnɛ tɩ-taa yɔ. Kɩpɩzɩɣ nɛ kɩsɩnɩ-ŋ ɖɔɖɔ.

•  Ɛbɛ payaɣ se kʋdɔŋ sɔsɔʋ alɩwaatʋ taa nɩɣzɛ?

•  Ɛbɛ yɔɔ kʋdɔŋ sɔsɔʋ alɩwaatʋ taa nɩɣzɛ tɩkɛnɩ aleɣya tɔm?

•  Bibl paɣtʋ kila wena pɩzɩɣ nɛ asɩnɩ-ŋ nɛ ŋlʋbɩnɩ kʋdɔŋ sɔsɔʋ alɩwaatʋ taa nɩɣzɛ?

•  Bibl masɩ nzɩ sɩsɩɣnɩ-ŋ se ŋlʋbɩnɩ kʋdɔŋ sɔsɔʋ alɩwaatʋ taa nɩɣzɛ yɔ

 Kʋdɔŋ sɔsɔʋ alɩwaatʋ taa nɩɣzɛ, tɩkɛnɩ tomnaɣ taa kʋdɔŋ. Pɩkɛnɩ hɩɖɛ nɖɩ palakɩnɩ tʋmɩyɛ se pɔyɔɔdɩ ɛzɩma pɩlakɩ ɛyaa alɩwaatʋ ndʋ pɛwɛ kʋdɔŋ sɔsɔʋ nakʋyʋ alɩwaatʋ taa nɛ pileɖiɣ, nɛ paanaɣ se ɛbɛ pɩkaɣ tɛmnʋʋ yɔ. Paa yʋsasɩ nzɩ wɛtʋ ndʋ tɩkɔŋnɩ ɛyʋ yɔɔ yɔ, sɩwɛ ndɩ ndɩ yɔ, ɖoŋ ɖoŋ lɛ, yʋsasɩ nzɩ patɩlɩɣnɩ wɛtʋ ndʋ yɔ, sɩ-taa nasɩyɩ yɔ:

•   Piiseɣtiɣ ɛyʋ se ɛla mbʋ pɩpɔzʋʋ yɔ

•   Ɛzɩma ɛyʋ tɔkɩ tɔɔnaɣ nɛ ɛzɩma eɖou yɔ pɩlɛɣzɩɣ

•   Pana mʋʋ lɛɛ lɛɛ

•   Tʋma wena ɛyʋ tɩɩlakɩ yɔ, a-labʋ nɛ ɛsɩñɩŋɩyɛ

•   Pɩwɛ kaɖɛ se ɛyʋ ɛka ñʋʋ mbʋ eɖiɣni labʋ yɔ pɩ-yɔɔ

•   Pɩlakɩ ɛyʋ ɛzɩ lidaʋ nakʋyʋ tɩtasɩ wɛʋ yɔ

 Kʋdɔŋ sɔsɔʋ alɩwaatʋ taa nɩɣzɛ kɔŋnɩ kaɖɛ ɖa-maɣmaɣ nɛ ɛyaa lalaa ɖɔɖɔ. Ye ɖɩtɩlʋbɩnɩ wɛtʋ ndʋ yɔ, pɩpɩzɩɣ nɛ piyele nɛ pazɩ pazɩ lɛ, pɩɩtasɩɣ-ɖʋ seɣtuu se ɖɩla mbʋ mbʋ pɩpɔzʋʋ se ɖɩla nɛ COVID kʋdɔŋ ɛtaakpa-ɖʋ yɔ. Pɩtɩla alɩwaatʋ wɛɣ nɛ tɩɖɛɣ lɛ, ɖɩpaɣzɩɣ labʋ kaakendu pɩlɩɩnɩ mbʋ ɖɩla nɛ ɖɩfɛɛ kʋdɔŋ piye nɖɩ yɔ, pɩ-yɔɔ, paa kiɖiɣni yɛlʋʋ nɛ kɩkʋʋ ɛyaa yɔ. Paɣtʋ ndʋ paɖʋ-ɖʋ kʋdɔŋ ŋgʋ kɩ-nʋmɔʋ taa yɔ, tɩkɔŋ nɛ tɩnɩɩ-ɖʋ lɛ, pɩpɩzɩɣ nɛ pɩlabɩ-ɖʋ ɛzɩ ɖiyele tɩ-taa natʋyʋ yɔɔ ɖɔm nɛ ɖɩwɛɛ ɖa-tɩ yɔɔ yɔ. Nɛ wɛtʋ ndʋ tɩpɩzɩɣ nɛ tɩkɔnɩ-ɖʋ kaɖɛ nɛ tɩkɔnɩ kaɖɛ ɖɔɖɔ lalaa.

 Kaɖɛ alɩwaatʋ tʋnɛ tɩ-taa, mbʋ pɩtalɩ ɛyaa sakɩyɛ, piyeba nɛ pana se Bibl tɔm tʋnɛ tɩkɛ toovenim. Kɩyɔɔdʋʋ se: “Ye pɩnɩ-ŋ kʋñɔŋ kɩyakʋ wiye yɔ, ño-ɖoŋ kɛ ɛjandʋ na.” (Aduwa 24:10) Paɣtʋ kila wena apɩzɩɣ nɛ asɩnɩ-ɖʋ nɛ pitaatibi-ɖʋ yɔɔɔ kaɖɛ alɩwaatʋ taa, pɩkpɛndɩnɩ kʋdɔŋ sɔsɔʋ alɩwaatʋ tʋnɛ tɩ-taa yɔ, awɛ Bibl taa.

•   Iposi mɩ-tɩ nɛ ɖama tomnaɣ yɔɔ ɛlɛ pɩtaacɛ mɩ-taabalɩyɛ

   Ndʋ Bibl yɔɔdʋʋ yɔ: “Weyi ɛkɛ ɛgbaɣdʋ yɔ, . . . kʋñɔŋ taa lɛ, ɛpɩsɩɣ koobu.”—Aduwa 17:17.

   Mbʋ pʋyɔɔ pɩcɛyaa yɔ: Taabalaa kɩbama kpazɩɣ-ɖʋ ɖoŋ. (1 Tesalooniiki mba 5:11) Ɛlɛ ɖama posinuu alɩwaatʋ sakɩyɛ pɩzɩɣ nɛ pɩkɔnɩ kaɖɛ ɖo-tomnaɣ taa alaafɩya yɔɔ.—Aduwa 18:1.

   Ðɔ lɔŋ tasʋʋ pʋnɛ pɩ-yɔɔ nɛ ŋna: Tɩŋnɩ videowaa yɔɔ kɛdɛsɩ labʋ, pɔrtaabɩlɩ, e-mail waa nɛ message waa yɔɔ nɛ ŋyɔɔdʋʋnɩ ña-taabalaa. Ñaɣ pana nɛ ŋpɔzɩ sɩnʋʋ ña-taabalaa alɩwaatʋ ndʋ pɩlakɩ-ŋ kaɖɛ yɔ, nɛ ŋpɔzʋʋ pɔ-yɔɔ ɖoŋ ɖoŋ. Kɛdɩ lalaa lɛɣtʋ ndʋ ŋlakɩnɩ tʋmɩyɛ nɛ pɩsɩɣnɩ-ŋ se ŋlʋbɩnɩ kʋdɔŋ sɔsɔʋ alɩwaatʋ tʋnɛ yɔ. Ñaɣ pana nɛ ŋtɩŋnɩ nʋmɔŋ nɩɩyɩ yɔɔ nɛ ŋla camɩyɛ lakasɩ ña-taabalʋ nɔɔyʋ nɛ pɩsɩnɩ-mɩ nɛ kaɖɛ wɛtʋ ndʋ tɩ-taa ɩwɛɛ yɔ tɩtaakɩlɩ mɩ-yɔɔ caɣʋ.

•   Wɛtʋ ndʋ tɩ-taa ŋwɛ lɛɛlɛɛyɔ yɔ, tɩlɩ mbʋ tɩhaɣ-ŋ waɖɛ se ŋla yɔ

   Ndʋ Bibl yɔɔdʋʋ yɔ: “Ɩlabɩnɩ mɩ-alɩwaatʋ tʋmɩyɛ camɩyɛ.”—Efɛɛzɩ mba 5:16.

   Ɛbɛ yɔɔ pɩcɛyaa: Ye ŋlakɩnɩ ña-alɩwaatʋ tʋmɩyɛ nɛ lɛɣtʋ yɔ, pɩsɩɣnɩ-ŋ nɛ ŋwɛɛnɩ lɩmaɣza kɩbana nɛ ŋtaanɩɣzɩɣ kadadayaɣ.—Luka 12:25.

   Ðɔ lɔŋ tasʋʋ pʋnɛ pɩ-yɔɔ nɛ ŋna: Taakaŋ ña-lɩmaɣza mbʋ ŋŋtasɩɣ pɩzʋʋ labʋ yɔ, pɩ-yɔɔ, ɛlɛ kaŋ ña-lɩmaɣza mbʋ ñɛ-wɛtʋ haɣ-ŋ nʋmɔʋ se ŋla yɔ, pɩ-yɔɔ. Pɔzɩ ña-tɩ nɛ ŋna se lɛɛlɛɛyɔ lɛ, ñɛ-wɛtʋ haɣ-ŋ alɩwaatʋ camɩyɛ se ŋla tʋma naayɛ yaa aleɣya naayɛ? Ŋpɩzɩɣ nɛ ŋhiɣ alɩwaatʋ nɛ ña nɛ ñɔ-hɔʋ taa mba ɩcakɩ ɖama cɔlɔ nɛ pɩkpaɖɩ?

•   Ñɔɔnɩ ña-ɖʋtʋ kɩbandʋ

   Ndʋ Bibl yɔɔdʋʋ yɔ: “Pɩtɩŋa pɩɖɔ camɩyɛ . . . cɔlɩɩɩ.”—1 Kɔrɛntɩ mba 14:40.

   Ɛbɛ yɔɔ pɩcɛyaa: Pɩkɛdɩɣnɩ ɛyaa sakɩyɛ nɛ pɩhaɣ-wɛ taa leleŋ alɩwaatʋ ndʋ pɛwɛnɩ ɖʋtʋ kɩbandʋ nɛ pɔɖɔŋ tɩ-yɔɔ yɔ.

   Ðɔ lɔŋ tasʋʋ pʋnɛ pɩ-yɔɔ nɛ ŋna: La ɖʋtʋ ndʋ tɩmʋnɩ wɛtʋ ndʋ tɩ-taa ŋwɛ lɛɛlɛɛyɔ yɔ. Lɩzɩ alɩwaatʋ ndʋ ɖeyi ɖeyi ŋlakɩ tʋmɩyɛ nɖɩ paɖʋ-ŋ sukuli taa yɔ, ña-tʋmɩyɛ taa yɔ, ɖɩɣa taa yɔ, pɩkpɛndɩnɩ alɩwaatʋ ndʋ ŋkpakɩɣ nɛ ŋcɔŋnɩ ñe-fezuu taa kɩcɛyɩm ɖeɖe yɔ. Taasɔɔ ɖɔɖɔ tʋma wena awazɩɣ-ŋ camɩyɛ yɔ a-labʋ yɔɔ. A-taa naayɛ yɔ: Kpakɩɣ alɩwaatʋ nɛ ŋcakɩ ñɔ-hɔʋ cɔlɔ, ɩmʋʋ helim yaa ɩlakɩ sport. Cɔŋnɩ ɖʋtʋ ndʋ ŋtɛm labʋ yɔ, ti-ɖeɖe ɖoŋ ɖoŋ nɛ ye pɩpɔzʋʋ yɔ, ŋñɔɔzɩ-tʋ.

•   La ɖʋtʋ nɛ tɩmʋnɩ pɩnaɣ alɩwaatʋ ndʋ tɩ-taa ŋwɛɛ yɔ

   Ndʋ Bibl yɔɔdʋʋ yɔ: “Ɛyʋ lɔŋ tʋ naɣ kɩdɛkɛdɩm nɛ ɛmɛlɩɣ, ɛyaa kɛlɛʋ tɩnaa tɛzɩɣ-pʋ nɛ panɩɣ siziŋ.”—Aduwa 22:3.

   Ɛbɛ yɔɔ pɩcɛyaa: Ɛzɩma pɩnaɣ taa alɩwaatʋ lɛɣzɩɣ yɔ, pʋyɔɔ lɛ ŋpɩzɩɣ nɛ ŋhiɣ helim kɩbam nɛ ñalɩmɩyɛ alɩwaatʋ natʋyʋ taa nɛ pɩkpaɖɩ lɛɛtʋ. Paa mbʋ yɔ, wɛtʋ ndʋ, tɩ-tɔm cɛyaa se pɩsa nɛ ŋwɛɛ alaafɩya tomnaɣ taa nɛ maɣzɩm taa.

   Ðɔ lɔŋ tasʋʋ pʋnɛ pɩ-yɔɔ nɛ ŋna: Ye niŋkaɣ alɩwaatʋ eɖiɣni ñɔtʋʋ yɔ, ñɔɔzɩ ña-ɖaŋ taa nɛ ña-tʋmɩyɛ ɖɩlaɖɛ taa se pɩsa nɛ wɩsɩ ñalɩmɩyɛ wɛɛ camɩyɛ. Yele nɛ ñe-helim mʋʋ tʋma kɛ wena ŋpɩzɩɣ nɛ ŋlabɩ-yɛ paa niŋkaɣ ɛwɛɛ pɩdɩɩfɛyɩ yɔ. Ye pɩsaŋ yɔ, ñaɣ pana nɛ ŋwɛɛnɩ wondu ndʋ posuu niŋkaɣ alɩwaatʋ taa yɔ nɛ pɩsɩnɩ-ŋ nɛ ŋpɩzɩ nɛ ŋla tʋmɩyɛ awayɩ alɩwaatʋ sakɩyɛ nɛ pɩkpaɖɩ.

   Ye soŋaɣ alɩwaatʋ eɖiɣni ñɔtʋʋ yɔ, ɛyaa paɣzɩɣ caɣʋ awayɩ nɛ pileɖiɣ. Lɩzɩ ɖenɖe ŋkaɣ wobu yɔ, nɛ ŋwolo peeɖe alɩwaatʋ ndʋ tɩ-yɔɔ ɛyaa ɩɩkaɣ kɩlʋʋ suu lona ana a-taa yɔ.

•   Wolo pɩ-yɔɔ nɛ ŋlakɩ mbʋ pɩpɔzʋʋ se ŋla nɛ COVID kʋdɔŋ ɛtaakpa-ŋ yɔ

   Ndʋ Bibl yɔɔdʋʋ yɔ: “Kɩmɛlɛŋ ɖʋʋ yem nɛ kɩtaɣ liu.”—Aduwa 14:16.

   Ɛbɛ yɔɔ pɩcɛyaa: COVID-19 kɛ kʋdɔŋ ŋgʋ kɩkʋʋ yɔ, nɛ ye ɖɩtɩkpa ɖa-tɩ yɔ, kɩpɩzɩɣ nɛ kɩkpa-ɖʋ.

   Ðɔ lɔŋ tasʋʋ pʋnɛ pɩ-yɔɔ nɛ ŋna: Welisiɣ ñe-egeetiye taa lɔŋ weyi patasɩɣ yɔ ɖoŋ ɖoŋ nɛ ŋna se ŋɖiɣni ña-tɩ yɔɔ kandɩyʋʋ camɩyɛ na. Taasɔɔ kaaʋ se ña-lakasɩ pɩzɩɣ nɛ sɩkɔŋnɩ-ŋ kaɖɛ, sɩkɔnɩ kaɖɛ ñɔ-hɔʋ taa mba nɛ ɛyaa lalaa.

•   Cɛyɩsɩ ña nɛ Ɛsɔ mɩ-taabalɩyɛ

   Ndʋ Bibl yɔɔdʋʋ yɔ “Ɩñɔtɩ mɩ-tɩ nɛ Ɛsɔ, nɛ ɛkaɣ-mɩ ñɔtɩnʋʋ.”—Yakubu 4:8.

   Ɛbɛ yɔɔ pɩcɛyaa: Ɛsɔ pɩzɩɣ nɛ ɛsɩnɩ-ŋ nɛ ŋlʋbɩnɩ paa kaɖɛ nɖɩ.—Izaayii 41:13.

   Ðɔ lɔŋ tasʋʋ pʋnɛ pɩ-yɔɔ nɛ ŋna: Kalɩ Ɛsɔtɔm, Bibl hɔɔlʋʋ nakʋyʋ paa evemiye nɖɩ. Bibl kalʋʋ ɖʋtʋ ndʋ, tɩkaɣ-ŋ sɩnʋʋ nɛ ŋpaɣzɩ ña-tɩ ñɔtɩnʋʋ nɛ Ɛsɔ.

 Yehowa Aseɣɖe Tɩnaa labɩ ɖʋtʋ nɛ powoki pɩ-yɔɔ nɛ palakɩ Kediɣzisi COVID-19 kʋdɔŋ sɔsɔʋ alɩwaatʋ taa. Pɩɩwɛɣ ɖeu se ŋyɔɔdɩnɩ-wɛ nɛ ŋna ɛzɩma ɖʋtʋ ndʋ tɩpɩzɩɣ nɛ tɩwazɩ-ŋ yɔ? Ðʋtʋ ndʋ tɩ-taa natʋyʋ lɛ, ɛzɩma patɩŋɩɣnɩ visioconférence waa yɔɔ nɛ palakɩ ɛgbɛyɛ taa kediɣzisi, pɔtɔzʋʋ Yesu sɩm yɔɔ paa pɩnaɣ ŋga nɛ palakɩ pɩnaɣ taa kigbeɣliŋ sɔsɔŋ yɔ.

 Izaayii 33:24: “Nɛ tɛtʋ taa ɛyʋ nɔɔyʋ ɛɛkaɣ tɔm se: ‘Pɩwɩɣ-m.’”

 Pʋ-tɔbʋʋ: Ɛsɔ labɩ tamaɣ se ɛkaɣ yebu nɛ kʋdɔmɩŋ kpeekpe sɩɩ tɩnaɣ.