ƖWƐƐ FEŊUU YƆƆ!

Suwe Bibl yɔɔdʋʋ Sɩʋ kpelisi sɛʋ yɔɔ?

WELISI NƐ

Takayaɣ ŋga payaɣ se Catholic News Service yɔ, kɔyɔɔdaa se 25 mars 2022 wiye, palakaɣ sɔnzɩ nasɩyɩ cooci kuduyuu sɔsɔʋ ŋgʋ payaɣ se Basilique Saint-Pierre yɔ kɩ-taa lɛ, papa François sɩŋ Maarɩɩ sɩʋ kpeliɣa ɛsɩndaa, ehuuzi «ɛsa nɛ eluzi ɛ-ñʋʋ nɛ ɛtɩmɩɣ ɛ-laŋɩyɛ taa.» ‘Etendi Maarɩɩ’ se ɛkɔnɩ laŋhɛzɩyɛ ɛjaɖɛ yɔɔ. Takayaɣ ŋga payaɣ se Vatican News yɔ, kɔsɔzɩ tɔm tʋnɛ se «papa ɖʋzɩ ɛyaa kpeekpe, kɔzɩ kɔzɩ Rusii nɛ Ukrɛɛnɩ ajɛɛ taa mba Maarɩɩ weyi ɛ-laŋɩyɛ wɛ kele kele nɛ ɛfɛyɩnɩ kɩwɛɛkɩtʋ natʋyʋ yɔ e-nesi taa.»

Ŋmaɣzɩɣ suwe? Pɩmʋnaa se patɩmɩ sɩʋ kpelisi ɛsɩndaa yaa palabɩnɩ-sɩ tʋmɩyɛ Ɛsɔ sɛtʋ taa? Maɣzɩ masɩ nzɩ sɩkɔŋ yɔ sɩ-yɔɔ nɛ ŋna:

«Pɩfɛyɩ se ŋsaɣ ña-tɩ sɩʋ kpeliɣa nakɛyɛ yaa nabʋyʋ mbʋ pɩnɩɣzɩnɩ mbʋ pɩwɛ ɛsɔdaa, yaa tɛtʋ yɔɔ, yaa lɩm taa yɔ pɩ-taa nabʋyʋ. Pɩfɛyɩ se ŋluŋ pɩ-tɛɛ yaa ŋyele nɛ pɩhɔmɩ-ŋ nɛ ŋsɛɛ-pʋ, mbʋ pʋyɔɔ yɔ ma ñɛ-Ɛsɔ Yehowa lɛ, mɛnkɛ Ɛsɔ weyi ɛñɩnɩɣ se pɔñɔɔnɩ e-ɖeke koŋ yɔ.»—Ejipiti Lɩʋ 20:4, 5. a
«Pa-sɩʋ kpelisi kɛ liidiye nɛ sika, sɩkɛ ɛyʋ nesi tɛɛ tʋmɩyɛ. Sɩwɛnɩ nɔɔ, ɛlɛ sɩɩyɔɔdʋʋ; sɩwɛnɩ ɛsa, ɛlɛ sɩɩnaɣ; sɩwɛnɩ nɩŋgbaaŋ, ɛlɛ sɩɩnɩɣ; sɩwɛnɩ mɔɔʋ, ɛlɛ sɩɩnɩɣ sɔzɩŋ nɩɩyɩ; sɩwɛnɩ nesi, ɛlɛ sɩɩpɩzɩɣ nɛ sɩtakɩ nabʋyʋ nɛ sɩna; sɩwɛnɩ nɩŋgbanzɩ, ɛlɛ sɩɩɖɔŋ; natʋyʋ ɛɛlɩɣnɩ si-liu tɛɛ. Mba palakɩ-sɩ yɔ, pakaɣ pɩsʋʋ ɛzɩ nzɩ yɔ, pɩkpɛndɩnɩ mba payɩ pataɣ-sɩ liu yɔ.»—Keɣa 115:4-8.
«Ma lɛ Yehowa. Ma-hɩɖɛ lɛ; maacɛlɩɣ mon-ɖoŋ nɔɔyʋ, nɛ maacɛlɩɣ ɖɔɖɔ man-samtʋ sɩʋ kpelisi.»—Izaayii 42:8, pɩ-tɛɛ tɔm.
«Ise sɩɩnaa latʋ.»—1 Kɔrɛntɩ mba 10:14.
«Ɩkpa mɩ-tɩ nɛ sɩʋ kpelisi.»—1 Yohanɛɛsɩ 5:21.