Pɩlakɩ-ŋ ɛzɩ pɩwɛ kaɖɛ lɛɛlɛɛyɔ se ɛyʋ ɛɖʋ tʋkaɣ toovenim nɛ cɛtɩm pɛ-hɛkʋ taa? Pɩwɛ ɛzɩ mbʋ pɩ-yɔɔ ɛyaa tisiɣ nɛ pɩkɩlɩ yɔ pɩlɩɣnɩ ɛzɩma pɩlakɩ-wɛ nɛ ndʋ pamaɣzɩɣ yɔ pʋ-cɔlɔ nɛ pɩkɩlɩ toovenim tɔm yaa mbʋ pɩlabɩ ɖeyi ɖeyi yɔ. Sɔnɔ ɛjaɖɛ kpeekpe yɔɔ, ɛyaa sakɩyɛ maɣzɩɣ se toovenim tɩtasɩ wɛʋ.

 Pɩtɩkɛ sɔnɔ ɛyaa paɣzɩ wɛnʋʋ lɩmaɣza ana. Pɩlakɩ ɛzɩ pɩnzɩ 2 000 mbʋ yɔ, Roma Komina ñʋʋdʋ Pɔɔnsɩ Pilaatɩ kaapɔzɩ Yesu se: «Ɛbɛ payaɣ toovenim?» (Yohanɛɛsɩ 18:38) Paa Pilaatɩ ɛtaaɖaŋ se Yesu ecosi-i natʋyʋ yɔ, tɔm ndʋ ɛɛpɔzaa yɔ tɩ-tɔm cɛyaa. Tɔm ndʋ Bibl cosuu yɔ ŋkaɣ naʋ se tɩ-taa tʋ kpayɩ kpayɩ, nɛ tɩkaɣ-ŋ sɩnʋʋ nɛ ŋɖʋ tʋkaɣ toovenim nɛ cɛtɩm pɛ-hɛkʋ taa ɛjaɖɛ ɖɩnɛ ɖɩ-taa.

Ɛzɩ toovenim tasɩ wɛʋ na?

 Ɛɛɛ. Bibl lakɩnɩ tʋmɩyɛ tɔm piye «toovenim» nɛ kɩyɔɔdʋʋ mbʋ pɩlabɩ ɖeyi ɖeyi yɔ pɩ-tɔm yaa mbʋ pɩlakɩ nɔɔ kʋɖʋmaɣ nɛ wezuu kɩbaŋʋ caɣʋ yɔ. Kɩwɩlɩɣ se Yehowa a Ɛsɔ cɔlɔ toovenim kiya lɩnaa, nɛ kɩyaɣ-ɩ se «toovenim tɛ Ɛsɔ.» (Keɣsi 31:5) Toovenim tɔm ndʋ tɩlɩnɩ Ɛsɔ cɔlɔ yɔ tɩwɛ Bibl taa, nɛ Bibl kpaɣ toovenim tɔm ndʋ nɛ kɩmaɣzɩnɩ ñalɩmɩyɛ mbʋ pʋyɔɔ yɔ tɩpɩzɩɣ nɛ tiɖiyi-ɖʋ nɛ ɖɩɖʋ tʋkaɣ toovenim nɛ cɛtɩm pɛ-hɛkʋ taa cɩkpɛndʋʋ ɛjaɖɛ ɖɩnɛ ɖɩ-taa.—Keɣsi 43:3; Yohanɛɛsɩ 17:17.

Ɛzɩma ɖɩpɩzɩɣ ɖɩla nɛ ɖɩtɩlɩ toovenim?

 Ɛsɔ tɩsɔɔlɩ se ɖitisi Bibl taa toovenim tɔm yɔɔ yem se pɔtɔm se ɖitisi. Ɛtɩsɔɔlɩ se ɛzɩma pɩlakɩ-ɖʋ yɔ mbʋ eɖiyini-ɖʋ, ɛlɛ eseɣtiɣ-ɖʋ se ɖɩlabɩnɩ tʋmɩyɛ ɖa-ñʋʋ taa maɣzɩm nɛ ɖɩtazɩnɩ Bibl taa. (Roma mba 12:1) Ɛsɔɔlaa se ɖɩlabɩnɩ tʋmɩyɛ ‘ɖa-maɣzɩm pilim’ nɛ ɖɩkpɛlɩkɩ nɛ ɖɩtɩlɩ-ɩ nɛ ɖɩsɔɔlɩ-ɩ; eseɣtiɣ-ɖʋ ɖɔɖɔ se ɖɩtazɩ nɛ ɖɩna se tɔm ndʋ ɖɩkpɛlɩkɩɣ Bibl taa yɔ tɩkɛ toovenim yaa we.—Maatiyee 22:37, 38; Tʋma Labʋ 17:11.

Le cɛtɩm lɩnaa?

 Bibl yɔɔdʋʋ se Sataŋ Eleeu weyi ɛkɛ Ɛsɔ koyindu yɔ ɛ-cɔlɔ cɛtɩm lɩnaa, nɛ kɩya-ɩ se «cɛtɩm caa.» (Yohanɛɛsɩ 8:44) Sataŋ heyi kajalaɣ ɛyaa cɛtɩm tɔm Ɛsɔ yɔɔ. (Kiɖe Tɛɛ Tɔm 3:1-6, 13, 17-19; 5:5) Kpaɣnɩ mbʋ lɛ, Sataŋ wɛɛ nɛ ewoki pɩ-yɔɔ nɛ ɛyɛlɩɣnɩ cɛtɩm tɔm Ɛsɔ yɔɔ nɛ ɛmɛsɩɣ ɛ-yɔɔ toovenim tɔm.—Natʋ 12:9.

Ɛbɛ yɔɔ cɛtɩm tɔyɩ sɔnɔ mbʋ?

 Ɛzɩma Sataŋ peɣziɣ ɛyaa yɔ pɩwɛɛ nɛ pɩkpaɣ ɖoŋ kpaʋ yɔɔ ɖa-alɩwaatʋ tʋnɛ tɩ-taa; ndʋ Bibl yaɣ se «kɛdɛzaɣ kɩyakɩŋ.» Ðoŋ ɖoŋ lɛ, ɛyaa yɔɔdʋʋ cɛtɩm tɔm se pepeɣzi lalaa nɛ pomuli-wɛ. (2 Timootee 3:1, 13) Cɛtɩm tɔyɩ Ɛsɔ sɛtʋ agbaa sakɩyɛ taa sɔnɔ ɖɔɖɔ. Bibl kaayɔɔdaa se ɖa-alɩwaatʋ taa, ɛyaa kaɣ «pa-tɩ ñɩnʋʋ wɩlɩyaa se paba ɩsaɣyɩ pa-nɩŋgbaaŋ taa,» nɛ «pakaɣ kizuu se paawelisiɣ toovenim tɔm.»—2 Timootee 4:3, 4.

Ɛbɛ yɔɔ toovenim tɔm cɛyaa?

 Pɩsa ɛyaa nabɛyɛ taa ɖama liu lɛ, pɩpɔzʋʋ se peheyi ɖama toovenim. Nɔɔ kʋɖʋmaɣ yaa taabalɩyɛ ɛɛpɩzɩɣ nɛ pɩwɛɛ ɛyaa hɛkʋ taa ye paataɣ ɖama liu yɔ. Bibl yɔɔdʋʋ se Ɛsɔ sɔɔlaa se toovenim ɛkɛnɩ ɖɛ-Ɛsɔ sɛtʋ tigiɖe. Kɩtɔŋ se: «Mba pɛsɛɣ [Ɛsɔ] yɔ, pɩwɛɛ se pɛsɛɛ-ɩ fezuu taa nɛ toovenim taa.» (Yohanɛɛsɩ 4:24) Pɩsa nɛ ŋtɩlɩ ɛzɩma Bibl taa toovenim tɔm pɩzɩɣ nɛ tɩsɩnɩ-ŋ nɛ ŋtɩlɩ cɛtɩm tɔm ndʋ Ɛsɔ sɛtʋ agbaa wɩlɩɣ yɔ nɛ ŋlɩɩ ti-yomiye taa lɛ, kalɩ tɔm ñʋŋ «Des mensonges qui empêchent d’aimer Dieu.»

Ɛbɛ yɔɔ Ɛsɔ sɔɔlaa se mantɩlɩ toovenim?

 Ɛsɔ sɔɔlaa se ŋhiɣ ñʋʋ yabʋ; pɩsa nɛ ŋtalɩ kaɖʋwa ŋga lɛ, pɩpɔzʋʋ se ŋkpɛlɩkɩ nɛ ŋtɩlɩ ɛ-yɔɔ toovenim tɔm. (1 Timootee 2:4) Ye ŋkpɛlɩkaa nɛ ŋtɩlɩ paɣtʋ ndʋ Ɛsɔ ɖʋ kɩbam nɛ kɩdɛkɛdɩm pɔ-yɔɔ nɛ ŋcakɩ wezuu nɛ pɩlakɩ nɔɔ kʋɖʋmaɣ nɛ paɣtʋ ndʋ yɔ, pɩkaɣ yebu nɛ taabalɩyɛ kɩbanɖɛ wɛɛ ña nɛ ɩ mɩ-hɛkʋ taa. (Keɣsi 15:1, 2) Ɛsɔ tiyi Yesu tɛtʋ yɔɔ se pɩsa nɛ ɛyaa kpɛlɩkɩ nɛ patɩlɩ-ɩ. Ɛsɔ sɔɔlaa se ɖiwelisi Yesu wɩlɩtʋ.—Maatiyee 17:5; Yohanɛɛsɩ 18:37.

Ɛsɔ kaɣ yebu nɛ cɛtɩm sɩɩ tɩnaɣ wiɖiyi?

 Ɛɛɛ. Ɛsɔ tɩsɔɔlɩ sɛ ɛyaa ɩcɛtɩɣ lalaa nɛ pomuluu-wɛ. Ɛlabɩ tamaɣ se ɛɖɩzɩɣ mba pɛtɛm pa-taa se pɛwɛɣ cɛtʋʋ yɔɔ yɔ. (Keɣsi 5:6) Alɩwaatʋ ndʋ ɛɖɩzɩɣ cɛtɩyaa yɔ, eyeki nɛ tamaɣ kanɛ ɖɔɖɔ kala: «Ndomee wena awɛ toovenim yɔ, akaɣ wɛʋ tam tam.»—Aduwa 12:19.