Masazigwa: Libaka gwe Bafakazi ba Jehova ba singa kitike Christmas wu ti ha ba to dumila mu na Jesu.

 Malebeswa: Ti Bakirisiti. To dumila kuti ku chidziwa kowo zhisiwa na Jesu Kirisiti.—Mishingo 4:12.

 Masazigwa: Mo thubukanya misha ne ntata ye ku diya bathu kuti basitongo kitika Christmas.

 Malebeswa: To amika kwazo ne kwe misha ngono to shingisa Baibili ku batsha ku baka misha ya ka sima.

 Masazigwa: Mo lashikigwa kwazo ne meya “dze Christmas” dze bumoyonchena ne mbakiso mu bathu banoushathisa.

 Malebeswa: To gwisa ku be moyonchena ne kube ne mbakiso zhuba ne zhuba. (Zwiani 11:25; Baroma 12:18) Ku lakidzila, zila ya ti no bata zwidiyo zwedu ne ku rera kwedu ko dumilana ne ndayelo dza Jesu: “Makapiwa musingalipisiwe, namwibo ipani musingalipise.” (Matewu 10:8) Kakale, to lingisa bathu ku Bushe gwe Ndzimu se iyo thembo ye malebeswa ino zhisa mbakiso mu shango.—Matewu 10:7.

•   Jesu wa ka layila kuti ti kumbule lufu gugwe, isini mazwagwa awe.—Luka 22:19, 20.

•   Baapostolo ba Jesu ne badiyiwa be kutanga ba ka be ba singa kitike Christmas. The New Catholic Encyclopedia ikati “Mukiti we Nativity wa ka tangisiwa ku nga be ne 243 CE ,” ku pinda century shule kwe ku fa kwe baapostolo be bupelo.

•   A kuna busupi gwe kuti Jesu wa ka zwagwa ne December 25, mazwagwa awe ha zo kwagwa mu Baibili.

•   To dumila kuti Christmas a ito amuchigwa nge Ndzimu ne kuti ya ka teiwa mu zwilenje ne zila dze buheitani.—2 Bakorinta 6:17.

 Banjinji ba no dwilila be kitika Christmas nenguba be ziba kuti ya ka teiwa mu buheitani, kakale kusina chino legwa ne kwayo mu Baibili. Bathu ba banga buzhwa be ti: Ini Bakirisiti be tola thambo i singa amuchigwe ne bathu banjinji? Ini be i thama khani wulu zwi ngapa?

 Baibili inoti kulumbidza kuti ti zwi kumbulile, ku shingisa “mikumbulo yedu.” (Baroma 12:1, 2) Inoti diya bukulu gwe malebeswa. (Johani 4:23, 24) Ndizo, ne ti shaka ziba kuti bangwe ba noti linga chini, to namatila mu milayontewo ye Baibili dumbu ne tinga pelela ti singa diiwe ne bathu.

 Nenguba ti shalula ku sa kitika Christmas, to hlonipa fanilo ye nngwe ne nngwe ku zwi tolela thambo mu khani iyeyi. A ti to kgoreletsa bangwe a be kitika Christmas.