Mu makole a si mangana a ka pinda, Venezuela ya ka bo ne mathatha a ka ama ikhonomi ne bathu. Nfakazi unoyi Edgar akati, “Mu makole a si mangana koga, chimo che buchilo gwe bathu cha ka wila pasi ne lubilo gu no chenamisa, kwa ka ta zwiiwa ungati ta ka fulukila ku shango ingwe ngono ti chi mu Venezuela!”

 Ini cha ka batsha Edgar ku shanduka ne mamo? Akati: “Imi ne nkadzi wangu, Carmen, ta ka kumbula ne kwe zwilakidzilo zwe dzi-missionaries dza ka fulukila mu shango dzi sina kungapo ngono ba ka zwidiya ku chila ne kutukununu. Ichecho cha ka ti sendedzela ku chila buchilo gulelu ne ku mililana ne dzindiko dzitshwa, se ku lima zwa ti nowo ja.”

 Ngono Edgar na Carmen ba ka thama kwa ka paphidzika. Ba ka zwidusa chibayilo ku kulumbidza bazwalani ne dziazwadzi dzabo, ku shanganyila ne ba ka tshambilidzigwa mu mazwiwo. (1 Bathesalonika 5:11) Edgar akati, “Pezhugwi kwe ku ba nyaladza, ta ka lika ku ba kulumbidza kuti be zwibonele kushatha ku no dwa mu ku batsha bangwe.”—Mishingo 20:35.

 Ha bugwele gwe COVID-19 gu tangisa, Argenis wa be a ka zwimisila ku rerela be matshinga awe. Bangwe babo ba ka dumila ku zwidiya be shingisa dzifouni.

 Argenis kakale wa ka be e shaka kuti be matshinga awe ba kabe be sina Internet be khone ku lingilila nshangano we 2020. Nfakazi u mu turopo i pejo wa ka ba pa ndongoloso ye nshangano ya ka rekhodiwa. Ku dwapo be matshinga a Argenis ba ka adzima TV ikulu ne dzipikara. Argenis wa ka ba lidzila ndongoloso i sathu i ka tangisa kuti e tembezele nabo. Ne mabaka e ku zwidusa chibayilo kwa Argenis, ba li 4 be matshinga awe ne bangwe ba li 15 ba ka khona ku lingilila ndongoloso ye nshangano.

 Bangwe ba ka lobolana ba noyi Jairo na Johana ndibo koga mu gubungano labo bana mota, ndizo ba no i shingisa ku dwa mu moyo ku batsha bangwe. Mathatha mangwe a ba no shangana nawo ndi kuti kwa ka sima kwazo ku wana fuel mu Venezuela. Jairo akati, “To shingisa dziawara dzinjinji, zwibaka zwingwe to linda busiku gose ti li mu laini ye ku dila fuel.”

 Jairo u no zwiwila kuti masimba a ba no tola ku batsha bangwe ne mota yabo a no shathisa. Akati: “Ha ti yesila bazwalani zwithu zwabo, ko ndi shathisa ku bona se kwa ba no bokela batsho, isini batsho yedu ngono batsho ya Jehova, iye u no pa bathu babe zose zwa ba no sheta.”—2 Bakorinta 9:11, 14.

 Nenguba azwadzi Norianni a li mu makole awe e bu 20, wa ka be ne mazwiwo e kuti u nga lingiwa a li ntukununu kwazo ku batsha bangwe. Ngono wa ka bala likwalo gwa 1 Timoti 4:12 gu noti: “Kushaye unokudeyelela ngobe uli ntjetjana, koga bigila bagalimoyo tjilakidzilo.”

 Likwalo igogo gwa ka sendedzela Norianni ku zwidusa chibayilo ku batsha ba ka kula mu gubungano lile, e ba batsha ne ku kwala makwalo mu nshingo we ku rera, kose ne ku ba koka ku be naye mu thutho dzidze dze Baibili. Kalale wa ka ba lidzila ne ku ba tumilila milaetsa i no kulumbidza. Norianni akati, “Jehova wa ka ndi lakidza kuti kunjinji kwa ndi nga thama.”

 Bazwalani ne dziazwadzi dzedu ku Venezuela ba ka lingisana ne mathatha manjinji mu zwibaka izwezwi zwa ka sima. Ne kwa ka jalo, ba ka dwilila ba li majatu mu nshingo we ku rera ngono ba no ‘kulumbidzana kwazo’.—Bakolosa 4:11; 2 Timoti 4:2.