A u no wana kwa ka sima ku shalula chi li malebeswa ne manyepkhwa? Bathu ba ngwenu ba no dumila zwithu be laugwa ne mazwiwo pana ku lingilila chi li malebeswa. Bathu banjinji mu shango yose ba no duma kuti akuna chithu chi noyi malebeswa.

 Nkumbulo iwoyu ha te i li chithu chitshwa. Makole a li 2 000 a ka pinda, mbusi we Roma u noyi Pontio Pilato wa ka buzwa Jesu kuti: “Malebeswa ini?” (Johani 18:38) Ne hapa Jesu a sa ka milila ku shandugwa, buzo iye ya ka i li buthokwa. Baibili i no ti pa dabilo dzi no kgotsofatsa, kakale i nga ku thusa ku ziba chi li malebeswa ne chi si malebeswa mu shango iyeyi.

A malebeswa a yapo?

 Ee. Baibili i no shingisa dama “malebeswa” i dwa malebeswa a ka pelela ne mazwibato a ka lulwama. I no diya kuti malebeswa a ka pelela a no dwa ku na Jehova a Ndzimu, i no ndana “Ndzimu we malebeswa.” (Pisalema 31:5) Baibili i na malebeswa a no dwa ku Ndzimu, e bile i no fanidzanya malebeswa iyawo ne chedza, i no khona ku ti kaela mu ku tsietseka ku mu shango.—Pisalema 43:3; Johani 17:17.

U nga wana malebeswa chini?

 Ndzimu ha a to shaka ti amuchila malebeswa a mu Baibili ti si nga kumbule. U no ti kumbila ku zwidiya Baibili ti shingisa bukhoni gwedu gwe ku thalusa ngono ti si nga shingise mazwiwo edu. (Baroma 12:1) U no shaka kuti ti nzibe e bile ti nde ne “mikumbulo yedu yose,” kakale u no ti kgothaletsa kuti ti shakisise kuti a cha ti no zwidiya mu Baibili i malebeswa.—Matewu 22:37, 38; Mishingo 17:11.

Manyepkhwa a no dwa ngayi?

 Baibili i no leba kuti chita che Ndzimu, Satani Diabolo, ndiye wa ka simolola ne manyepkhwa, kakale i no ndana “tate be manyepkhwa. (Johani 8:44) Wa ka leba manyepkhwa ne kwe Ndzimu ku bathu be ntha. (Genesisi 3:1-6, 13, 17-19; 5:5) Ku dwa mu nako iyeyo, Satani u no dwilila ne ku leba manyepkhwa ne ku sumbika malebeswa nekwe Ndzimu.—Zumbunulo 12:9.

Ini kuli zhele manyepkhwa kwazo mu nako ya ngwenu?

 Mu nako yedu, ye Baibili ya i no dana “mazhuba e bupelo,” ku tsietsa kwa Satani mu shango kwabo kunjinji kwazo. Bathu ba no leba manyepkhwa ku tsietsa bangwe ne ku ba shingisa. (2 Timoti 3:1, 13) Bunji gwe dzikereke ngwenu dzo andamisa manyepkhwa. Se kwa Baibili ya ka lebela mbeli mu nako ya ngwenu, bathu “banowokubunganya bezwipoteledza nge badiyi banjinji banodiya tjabanoshaka zebe dzabo dzitjihwa,” ba nowo shalula ku “zwina zebe dzabo mukuhwa malebeswa.”—2 Timoti 4:3, 4.

Ini malebeswa a li buthokwa?

 Malebeswa a no thama kuti bathu ba thembane. Ha ku sina thembo, bathu ha ba nga hwanane. Baibili i no leba kuti Ndzimu u no shaka kuti ti nnamate ne malebeswa. I no ti: “Ibabo banounamata [Ndzimu] bakafanila kuunamata nge Meya nenge malebeswa.” (Johani 4:24) Ku zwidiya kuti malebeswa a no dwa mu Baibili a nga ku thusa chini ku bona dzikereke dzi si na malebeswa ne ku thubukana nadzo, bala nsholo u no ti “Maaka a a Dirang Gore Modimo a Lebege a sa Ratege.”

Ini Ndzimu e shaka kuti ndi zibe malebeswa?

 Ndzimu u no shaka kuti u chilile chose, ngono ko shaka u zwidiya malebeswa ne kukwe. (1 Timoti 2:4) Ha u zwidiya ne kwe milayo ye Ndzimu ye cha ka lulwama ne chi sa ka lulwama u bo u chila nayo, u nowo be tsala ye Ndzimu. (Pisalema 15:1, 2) Ndzimu wa ka tumila Jesu mu shango, ku batsha bathu ku zwidiya malebeswa. Ndzimu u no shaka kuti ti teedze zwidiyo zwa Jesu.—Matewu 17:5; Johani 18:37.

A Ndzimu u no pedzisa manyepkhwa choselele?

 Ee. Ndzimu u no shima bathu ba no tsietsa bangwe. U no thembesa kuti u nowo chinya ibabo ba ka zwimisila ku dwilila be leba manyepkhwa. (Pisalema 5:6) Hapa Ndzimu e thama e jalo, u nowo shingikadza mazwimisilo awe: “Milomo ina lebeswa inogalila tjose.”—Zwiani 12:19.