Jehova wa ka pa balume ne bakadzi shango. I nzi wedu. Ichecho cho dwa kuti nlume ne nkadzi be kutanga, Adamu na Eva, ba ka be ba sa bumbigwa ku gala kudzimu—Ndzimu wa ka be a chi bumba baengele kale kuti ba gale kudzimu. (Jobe 38:4, 7) Ndzimu wa ka biga nthu we kutanga mu paradaisi i no shathisa i no dangwa kuyi garden ye Edeni. (Genesisi 2:15-17) Jehova wa ka pa Adamu ne bana ba a ka be wobe nabo thembiso ye ku shathila buchilo gu singa pele mu shango.​—Bala Pisalema 37:29; 115:16.

Ku tangisa, garden ye Edeni ndiyo koga ya ka be i li paradaisi. Nlume ne nkadzi be kutanga ba ka be ba ka fanila gala mu shango ne bana babo. Ba ka bowo pelela be lawula shango yose ne ku i thama paradaisi. (Genesisi 1:28) Shango ha i nga chinyiwe. I nowo dwilila i li bugalo gwe bathu.​—Bala Pisalema 104:5.

Lingilila vidiyo Why Did God Create the Earth?

Adamu na Eva ha ba zo teedza Ndzimu, ngono Jehova a ka ba dusa mu garden. Paradaisi ya ka lashika, ngono ha kuna nthu wa ka khona ku thama kuti shango i be paradaisi kakale. Baibili i kati: “Shango ya wila mu maboko e mbi.”—Jobe 9:24.​—Bala Genesisi 3:23, 24.

A Jehova wa ka shandukila mazwimisilo awe ne kwe bathu? Aa! U na masimba wose. Ha a nga kongwe. (Izaya 45:18) U nowo thama kuti bathu ba chile ne zila ya a ka be e shaka.​—Bala Pisalema 37:11, 34.

Shango i nowo be Paradaisi ha Jesu e busa a li She ye Bushe gwe Ndzimu. Mu nghwa i no dangwa Amagedoni, Jesu u nowo tungamila baengele be Ndzimu ku chinya bathu bose ba no nyanyayidza Ndzimu. Ku dwapo Jesu u nowo longa Satani mu  busungwa makole a li 1,000. Bathu be Ndzimu ba nowo chidziwa ne kuti Jesu u nowo ba lakidza zila ne ku ba bakilila. Ba nowo shathila buchilo gu singa pele mu Paradaisi.​—Bala Zumbunulo 20:1-3; 21:3, 4.

Ndzimu u nowo pedzisa bubi lini mu shango? Jesu wa ka pa ‘chilakidzilo’ chi no lakidza kuti bupelo gwa be pejo. Mamo e shango ngwenu a no thama kuti bathu ba si shathile buchilo a no lakidza kuti to chila mu ‘bupelo gwe njendiso ye zwithu.’​—Bala Matewu 24:3, 7-14, 21, 22.

Mu chibaka che makole a li 1,000 ha Jesu e busa shango a li kudzimu, u nowo pedzisa ku dziyidzika. (Izaya 9:6, 7; 11:9) Pezhugwi kwe ku shingila se She, Jesu u nowo shingila se Mperesiti u Nkulu, ngono u nowo pedzisa zwibi zwe bathu ba no da Ndzimu. Ndzimu u nowo shingisa Jesu ku pedzisa bugwele, kwegula ne lufu.​—Bala Izaya 25:8; 33:24.

Bathu ba no teedza Ndzimu ba nowo chila mu Paradaisi. (1 Johani 2:17) Jesu wa ka tumila batobeli babe kuti ba shake bathu ba na moyonnyolo ne ku ba diya kuti ba ka fanila thamani kuti ba amuchigwe ne Ndzimu. Ngwenu, Jehova u no baakanyila dzimillion dze bathu ku chila mu shango ye paradaisi i no zha. (Zafaniya 2:3) Ku Holo dze Bushe dze Bafakazi ba Jehova, bathu ba no zwidiya ku be balume na botate ba butuka ne ku be bakadzi na bomme ba butuka. Bana ne bazwadzi ba no namata Ndzimu bose, ne ku zwidiya kuti ba nga wana mbayilo upi mu ndebo mbuya.​—Bala Mika 4:1-4.