Ézudu 18:1-27
18 Jetru, kel saserdóti di Midian i sogru di Muizés, obi tudu kel ki Deus faze pa Muizés i pa Israel, se povu, i modi ki Jeová tra Israel di Ijitu.
2 Jetru, ki éra sogru di Muizés, resebe Zípura, mudjer di Muizés. Muizés mandaba el pa kaza di se sogru,
3 djuntu ku se dôs fidju. Un di es txomaba Jérson,* pamodi Muizés fla: “N bira un stranjeru ta mora na un téra stranjeru.”
4 I kel otu es txoma-l Eliézer,* pamodi el fla: “Kel Deus di nha pai é kel ki ta djuda-m, ki libra-m di spada di Faraó.”
5 Nton Jetru, ki éra sogru di Muizés, bai djuntu ku kes fidju i mudjer di Muizés pa ba atxa-l na dizértu, undi ki el staba kanpadu pértu di monti di Deus verdaderu.
6 Nton, el manda fla Muizés: “Ami Jetru, bu sogru, N sta ba atxa-u. Bu mudjer i bus dôs fidju sta djuntu ku mi.”
7 Muizés sai kel óra pa ba atxa se sogru, i el inbaxa se dianti i el kunprimenta-l ku beju. Kada un di es pergunta kunpanheru modi ki es staba, i dipôs es entra na ténda.
8 Muizés konta se sogru tudu kel ki Jeová faze Faraó i Ijitu pamodi kes israelita, tudu kes difikuldadi ki es pasaba pa el na kaminhu i modi ki Jeová libra-s di es.
9 Jetru fika kontenti ku tudu kes kuza dretu ki Jeová faze pa Israel kantu el libra-s di Ijitu.*
10 Nton, Jetru fla: “Pa Jeová lovadu, kel ki salva nhos di Ijitu i di Faraó, i ki salva povu di Israel di Ijitu ki staba ta maltrata-s.
11 Gósi, N sabe ma Jeová é más grandi di ki tudu kes otu deus, pamodi kuzê ki el faze ku kes algen di Ijitu ki trata se povu ku orgulhu.”
12 Nton Jetru, sogru di Muizés, leba un oférta kemadu i sakrifisiu pa Deus. Aron i tudu kes ansion di Israel ba kume djuntu ku sogru di Muizés, dianti di Deus verdaderu.
13 Na kel otu dia, Muizés xinta pa julga povu, sima el ta kustuma fazeba i povu fika dianti di Muizés di palmanhan ti kuazi ta fika noti.
14 Kantu sogru di Muizés odja tudu kuza ki el staba ta faze pa povu, el pergunta-l: “Pamodi ki bu sta faze kel-li ku povu? Pamodi ki bu ta xinta bo sô pa julga, timenti povu ta fika ta spera bu dianti di palmanhan ti kuazi ta fika noti?”
15 Muizés fla se sogru: “É pamodi povu ta ben na mi pa djobe orientason di Deus.
16 Óras ki parse un prubléma entri dôs algen, es ta fla-m kuzê ki kontise asi pa N julga, i N ta fla-s kal ki é kes disizon di Deus verdaderu i se leis.”
17 Sogru di Muizés fla-l: “Kuzê ki bu sta faze é ka dretu.
18 Di serteza bu ta ben fika kansadu dimás, abo i kel povu ki sta li djuntu ku bo, pamodi kel-li é un karga pizadu dimás pa bu karega bo sô.
19 Gósi obi ku mi. N sta ben da-u un konsedju, i Deus ta sta ku bo. Abo, bu ta reprizenta povu dianti di Deus verdaderu, i bu ten ki fla Deus verdaderu kes prubléma di povu.
20 Bu debe inxina-s kes régra i kes lei, i pô-s ta sabe kel kaminhu ki es debe anda i kel trabadju ki es debe faze.
21 Má, na meiu di povu bu debe skodje ómis ki ten kapasidadi i ki ten grandi ruspetu pa Deus, ómis di kunfiansa i ki ta ôdia ganha algun kuza ku dizonestidadi. Skodje-s pa es ser xéfis di mil, xéfis di 100, xéfis di 50 i xéfis di 10.
22 Es debe julga povu óras ki parse un prubléma. Es ta traze-u kes prubléma difísil, má es ta rezolve kes prubléma más sinplis. Dexa-s dividi es karga ku bo, asi ta ser más fásil pa bo.
23 Si bu faze kel-li, i si Deus manda-u faze si, bu ta pode aguenta kel karga i tudu algen ta volta pa kaza na pas.”
24 Kel óra, Muizés obi ku se sogru i el faze tudu kel ki el fla.
25 Muizés skodje ómis ku kapasidadi na Israel interu i el pô-s pa es ser xéfis di povu: xéfis di mil, xéfis di 100, xéfis di 50 i xéfis di 10.
26 Nton, óras ki ta parseba un prubléma, es ta julgaba povu. Si kel prubléma éra difísil es ta lebaba el pa Muizés, má si kel prubléma éra más sinplis es ta julgaba es mê.
27 Dipôs, Muizés dispidi di se sogru, i se sogru volta pa se téra.
Nótas di rodapé
^ Ki krê fla “kel ki ta mora sima stranjeru la”.
^ Ki krê fla “nha Deus é kel ki ta djuda-m”.
^ Na ebraiku ta fla: “di mô di Ijitu”.
