Ézudu 21:1-36
21 “Kes-li é kes lei ki bu debe da-s:
2 “Si bu kunpra un skravu ebreu, el ta sirbi di skravu duránti 6 anu, má na sétimu anu el ta libertadu sen paga nada.
3 Si el ben el sô, el ta bai el sô. Má si el ben ku mudjer, se mudjer ta bai ku el.
4 Si se dónu da-l un mudjer i el ten fidju matxu ô fidju-fémia, kel mudjer i kes fidju ta pasa ta ser di se dónu, i kel ómi ta bai el sô.
5 Má si kel skravu insisti i el fla: ‘N ta ama nha dónu, nha mudjer i nhas fidju. N ka krê fika livri’,
6 se dónu debe leba-l dianti di Deus verdaderu. Nton, se dónu debe ingosta-l na pórta ô na aru di pórta, i el debe fra-l orédja ku un gudja grós i el ta ser se skravu pa tudu se vida.
7 “Si un ómi bende se fidju-fémia pa ser skravu, el ka ta libertadu sima ta libertadu un ómi ki é skravu.
8 Si se dónu ka sta kontenti ku el i el ka skodje-l pa el ser se konkubina, el debe dexa pa el kunpradu.* Má el ka ta ten direitu di bende-l pa un stranjeru, pamodi se dónu trai-l.
9 Si el skodje-l pa el ser mudjer di se fidju, el debe da-l kes direitu ki un fidju-fémia ten.
10 Si el toma un otu mudjer pa el, el ka debe diminui nada ki el ta daba kel primeru mudjer, nen kumida, nen ropa, nen direitu ki un algen kazadu ten.*
11 Si el ka da kel mudjer kes três kuza li, kel mudjer ta sai livri, sen paga nada.
12 “Ken ki da un ómi pankada i el móre debe matadu.
13 Má si el faze kel-li sen krê i Deus verdaderu dexa pa kel-li kontise, N ta skodje un lugar pa el fuji pa la.
14 Si un ómi fika xatiadu ku se prósimu i el mata-l di propózitu, kel ómi debe móre, sikrê bu ten ki tra-l djuntu di nha altar.
15 Ken ki sota se pai ô se mai debe matadu.
16 “Si un algen rapta un ómi i el bende-l ô el atxadu ku el, el debe matadu.
17 “Ken ki maldísua se pai ô se mai* debe matadu.
18 “É kel-li ki debe kontise óras ki dôs ómi briga, i un da kel otu pankada ku un pédra ô ku un feraménta i el ka móre, má el fika na kama:
19 si el konsigi labanta i anda fóra di kaza ku ajuda di un pó, kel ki da-l pankada ka ta kastigadu. Sô el ten ki paga kel algen ki fika ku pankada un konpensason pa kel ténpu ki el fika sen trabadja, ti ki el rekupera.
20 “Si un ómi da se skravu ô se skrava ku pó i el móre na se mô, kel ómi debe kastigadu.
21 Má, si el fika bibu pa más un ô dôs dia, se dónu ka debe kastigadu, pamodi se dónu kunpra-l ku se dinheru.
22 “Si dôs ómi briga ku kunpanheru i es prujudika un mudjer grávida i kel mudjer ten fidju antis di ténpu,* má ningen ka móre,* kel ki é kulpadu ten ki paga présu ki maridu di kel mudjer pidi. El ten ki paga-l através di juís.
23 Má, si algen móre, debe dadu vida pa vida,
24 odju pa odju, denti pa denti, mô pa mô, pé pa pé,
25 kemadura pa kemadura, frida pa frida i si el sota el ten ki sotadu.
26 “Si un ómi da se skravu ô se skrava ku algun kuza na odju* i kel skravu perde kel odju, el debe liberta kel skravu pamodi kel odju.
27 Si el sota se skravu ô se skrava i el rinka-l se denti, el debe liberta-l pamodi se denti.
28 “Si un boi da un ómi ô un mudjer ku txifri i kel algen móre, kel boi debe dadu ku pédra ti ki el móre i se karni ka debe kumedu. Má dónu di kel boi ka ta kastigadu.
29 Má si kel boi dja kustuma daba algen ku txifri i se dónu avizadu, má el ka prende-l, i kel boi mata un ómi ô un mudjer, kel boi debe dadu ku pédra i se dónu debe matadu tanbê.
30 Si dónu di kel boi izijidu pa paga un présu,* asi pa el ka matadu, el debe paga kel ki el izijidu.
31 Si kel boi da un mininu ô un minina ku txifri, debe aplikadu kel mésmu lei na dónu di kel boi.
32 Si un boi da un skravu ô un skrava ku txifri, dónu di kel boi debe paga 30 pésa di prata* pa dónu di kel skravu, i kel toru ta dadu ku pédra ti ki el móre.
33 “Si un ómi distapa un posu ô el koba un posu i el ka kubri-l, i un boi ô un buru kai la déntu,
34 dónu di kel posu debe paga pa kel animal ki móre. El ten ki da dónu di kel animal dinheru, i kel animal mortu ta bira di sel.
35 Si boi di un ómi da boi di un otu algen ku txifri i kel boi ki dadu ku txifri móre, nton es debe bende kel boi ki fika bibu i dividi kel présu ki pagadu pa el. Tanbê, es debe dividi kel animal ki móre.
36 Má, si pesoas dja sabia ma kel boi ta kustuma daba ku txifri, má se dónu ka prende-l, el debe paga boi pa boi pa konpensa kel dónu, i kel animal mortu ta bira di sel.
Nótas di rodapé
^ Na ebraiku ta fla: “resgatadu”.
^ Kel-li krê fla relason seksual.
^ Ô: “Ken ki pidi se pai ô se mai praga”.
^ Na ebraiku ta fla: “i se fidju sai”.
^ Ô: “ka panha pankada gravi”.
^ Kel-li tanbê pode krê fla ma el sota-l ku mô.
^ Na ebraiku ta fla: “resgati”.
