Ézudu 36:1-38
36 “Bezalel ta trabadja djuntu ku Oliabe i ku tudu kes ómi ki ten kapasidadi, ki Jeová da sabedoria i intendimentu pa faze tudu trabadju ki ten aver ku tabernáklu, sima Jeová manda.”
2 Nton, Muizés txoma Bezalel, Oliabe i tudu kes ómi ki tinha kapasidadi, kes ki Jeová da sabedoria, tudu kes ki ses korason pô-s ta oferese di livri vontadi pa faze kel trabadju.
3 I Muizés da-s tudu kes kontribuison ki kes israelita lebaba pa kel trabadju ki tinha aver ku tabernáklu. Má, kes israelita kontinua ta leba kes prezenti di livri vontadi, tudu dia di palmanhan.
4 Nton, dipôs ki es kumesa kel trabadju sagradu, tudu kes trabadjador ki tinha kapasidadi kumesa ta bai un tras di kel otu,
5 pa pâpia ku Muizés. Es fla: “Povu sta ta traze mutu más di ki kel ki mestedu pa kel trabadju ki Jeová manda faze.”
6 Nton, Muizés manda pa es daba kel avizu li pa tudu kanpamentu: “Pa ningen ka traze más material pa kontribuison sagradu.” Di kel manera li es ka dexa povu leba más nada.
7 Kes material éra más di ki kel ki es mesteba pa faze tudu kel trabadju.
8 Asi, tudu kes trabadjador ki tinha kapasidadi faze kel tabernáklu ku 10 panu di linhu di bon kualidadi, linha azul, lan roxu i fiu brumedju. El* faze-s ku kes kerubin bordadu na es.
9 Kada panu tinha 12 métru i meiu di kunprimentu i dôs métru di largura.* Tudu kes panu éra di mésmu tamanhu.
10 El koze sinku panu na kunpanheru, i dipôs el koze kes otu sinku panu na kunpanheru.
11 Dipôs, el faze alsa di linha azul na borda di kel panu ki ta djuntaba ku kel otu konjuntu di panu. El faze mésmu kuza na borda di panu ki ta fika na pónta di kel otu konjuntu, undi es ta ba djuntaba kel otu konjuntu.
12 El faze 50 alsa na un panu i 50 alsa na borda di kel otu panu, undi es ta ba djuntaba kes dôs konjuntu, asi kes alsa ta fikaba un frenti di kel otu.
13 Pa últimu, el faze 50 kolxeti di oru i el djunta kes konjuntu di panu ku kes kolxeti, asi es forma tabernáklu.
14 Dipôs, el faze panu di kabelu di kabra pa kubri tabernáklu ku es. El faze 11 panu.
15 Kada panu tinha 13 métru i meiu di kunprimentu i dôs métru di largura.* Kes 11 panu tinha mésmu tamanhu.
16 El koze sinku panu na kunpanheru, i el koze kes otu 6 panu na kunpanheru.
17 Dipôs, el faze 50 alsa na pónta di un konjuntu, na borda di kel panu ki ta djuntaba ku kel otu konjuntu, i 50 alsa na borda di kel panu di kel otu konjuntu, ki ta djuntaba ku kel primeru konjuntu.
18 I el faze 50 kolxeti di kóbri, asi pa bira un panu sô pa kubri tabernáklu.
19 El faze un kubertura di péli di karneru tinjidu di brumedju pa ténda i el faze un kubertura di péli di fóka pa poi riba di el.
20 Dipôs, el faze kes armason di madera di akásia pa tabernáklu, i es podu di pé.
21 Kada armason tinha kuatu métru i meiu di altura i 67 sentímetru di largura.*
22 Na pé di kada armason tinha dôs pésa di madera djuntadu na kunpanheru. É si ki el faze tudu kes armason di tabernáklu.
23 Asi, el faze kes 20 armason pa ladu sul di tabernáklu.
24 Dipôs, el faze 40 bazi di prata pa poi baxu di kes 20 armason: baxu di un armason el faze dôs bazi ki ta inkaxa na dôs pésa di madera, i baxu di kes otu armason el faze tanbê dôs bazi ki ta inkaxa na dôs pésa di madera.
25 Na kel otu ladu di tabernáklu, na ladu nórti, el faze 20 armason.
26 Tanbê, el faze-s 40 bazi di prata: baxu di un armason el faze dôs bazi i baxu di kes otu armason tanbê el faze dôs bazi.
27 Na kel párti di tras di tabernáklu, na oésti, el faze 6 armason.
28 Tanbê, el faze dôs armason pa sirbi di dôs pósti pa kes kantu di párti di tras di tabernáklu.
29 Kes armason li tinha dôs pésa di bazi ti párti di riba, undi kel primeru argóla staba. É si ki el faze kes dôs pósti pa kantu.
30 Tinha 8 armason i ses 16 bazi di prata: baxu di kada armason tinha dôs bazi.
31 El faze vara di madera di akásia: sinku vara pa kes armason di un ladu di tabernáklu,
32 sinku pa kes armason di kel otu ladu di tabernáklu i sinku pa kes armason di ladu oésti di tabernáklu, ki é kel párti di tras.
33 El faze kel vara di meiu, asi pa el pasaba na metadi di altura di kes armason ki ta baba di un pónta ti kel otu pónta.
34 El kubri kes armason di oru, i el faze-s kes argóla di oru na undi kes vara ta pasaba.Tanbê el kubri kes vara di oru.
35 Dipôs, el faze un kurtina di linha azul, lan roxu, fiu brumedju i linhu di bon kualidadi. El faze kel kurtina ku kerubin bordadu na el.
36 Dipôs, el faze kuatu pilar di akásia pa kurtina i el kubri-s di oru. Tanbê, el faze ganxu di oru i el faze kuatu bazi di prata pa kes pilar.
37 Nton, el faze un kurtina pa entrada di ténda ku linha azul, lan roxu, fiu brumedju i linhu di bon kualidadi.
38 Tanbê el faze sinku pilar i ses ganxu. El kubri di oru kel párti di riba di kes pilar i ses argóla pa faze ligason, má ses sinku bazi éra di kóbri.
Nótas di rodapé
^ Talvês el sta pâpia di Bezalel.
^ Na ebraiku ta fla: “28 kôvadu di kunprimentu i kuatu kôvadu di largura”. Un kôvadu ta daba 44,5 cm. Djobe Ap. B14.
^ Na ebraiku ta fla: “30 kôvadu di kunprimentu i 4 kôvadu di largura”.
^ Na ebraiku ta fla: “10 kôvadu di altura i un kôvadu i meiu di largura”.
