Sugunda Timótiu 4:1-22
4 N ta da-u órdi dianti di Deus i di Kristu Jizus, ki ta ben julga kes bibu i kes mortu, óras ki el parse klaru i óras ki el ben na se Reinu:
2 prega palavra. Faze-l ku urjénsia, na ténpu bon i na ténpu difísil. Koriji,* txoma atenson i da konsedju, ku tudu paxénxa i arti di inxina.
3 Má, ta ben txiga un ténpu ki es ka ta ben aguenta kel ensinu ki é bon, má es ta ben sigi ses própi dizeju i es ta ben djobe instrutoris ki ta faze-s gósga na obidu.*
4 Es ta ben dexa di obi verdadi i es ta ben presta atenson na stórias falsu.
5 Má abo, kontinua sienti na tudu kuza, aguenta prublémas, faze trabadju di un pregador* i faze bu trabadju pa Deus konplétu.
6 Pamodi dja N sta ta bazadu sima un oférta di bebida, i ténpu di nha libertason sta kuazi ta txiga.
7 N faze kel bon luta, N tirmina korida i N vive di akordu ku fé.
8 Di gósi pa dianti sta guardadu pa mi kel koroa di justisa, ki Sinhor, kel juís justu, ta ben da-m pa ser nha rekonpénsa na kel dia, ka sô pa mi, má tanbê pa tudu kes ki tene vontadi di odja-l ta parse.
9 Faze tudu kel ki bu ta pode pa bu ben djobe-m faxi.
10 Pamodi Demas bandona-m dja ki el ta amaba es mundu,* i el bai pa Tesalónika. Kresenti bai pa Galásia i Titu bai pa Dalmásia.
11 Sô Lukas ki sta ku mi. Traze Markus djuntu ku bo, pamodi el ta ben djuda-m txeu na nha trabadju pa Deus.
12 N manda Tikiku pa Éfezu.
13 Óras ki bu ben, traze-m kel kapa* ki N dexa na Trôadi na kaza di Karpu, i kes rolu, prinsipalmenti kes pergaminhu.*
14 Alexandri, kel ki ta trabadja ku kóbri, prujudika-m txeu. Jeová* ta ben da-l kel ki el merese.
15 Abo tanbê bu debe toma kuidadu ku el, pamodi el fika kóntra nos mensajen ku tudu se forsa.
16 Na nha primeru diféza, ningen ka fika di nha ladu, má tudu es bandona-m. Pa Deus ka uza kel-li kóntra es.
17 Má Sinhor fika di nha ladu i el da-m forsa pa N prega tudu kuza ki palavra di Deus ta fla, asi pa pesoas di tudu nason obi-l. I N libradu di bóka di lion.
18 Sinhor ta ben libra-m di tudu maldadi i el ta ben salva-m pa se Reinu na Séu. Pa el dadu glória pa tudu ténpu. Amén.
19 Da Priska ku Ákila nha mantenha i tanbê família di Onezífru.
20 Erastu fika na Korintu, má N dexa Trófimu duenti na Miletu.
21 Faze tudu kel ki bu ta pode pa bu txiga li antis di ténpu friu.
Êubulu sta manda-u mantenha, i tanbê Pudenti, Linu, Kláudia i tudu kes irmon.
22 Pa Sinhor sta ku kel spritu* ki bu ta mostra. Pa se grandi bondadi sta ku nhos.
Nótas di rodapé
^ Ô: “Reprende”.
^ Ô: “ki ta fla-s kuzê ki es krê obi”.
^ Ô: “kontinua ta prega notísias sábi”.
^ Ô: “sistéma”. Djobe Disionáriu di Bíblia.
^ Ô: “kel ropa di friu”.
^ Kel-li krê fla kes rolu di péli.
^ Ô: “bon atitudi”.
