Sugundu livru di Samuel 6:1-23
6 Davidi torna djunta tudu kes midjór trópa di Israel. Es éra 30 mil ómi.
2 Nton, Davidi i tudu kes ómi ki staba djuntu ku el sai i es bai pa Baal-Judá, pa es ba buska Arka di kel Deus verdaderu. É dianti di kel Arka li ki pesoas ta invokaba nómi di Jeová di izérsitu, ki sta xintadu na se tronu riba* di kes kerubin.
3 Má, es tra Arka di kel Deus verdaderu di kaza di Abinadabe, ki ta fikaba na un monti i es pô-l na un karósa novu i es ba ku el. Uzá i Aiô, kes fidju di Abinadabe, staba ta konduzi kel karósa.
4 Nton, es tra Arka di kel Deus verdaderu di kaza di Abinadabe, ki ta fikaba na un monti, i es leba-l. I Aiô staba ta bai na frenti di kel Arka.
5 Davidi i tudu algen di Israel staba ta komemora dianti di Jeová ku tudu tipu di instrumentu di madera,* ku arpa, ku otus tipu di instrumentu di kórda, ku tanbor, ku xukalhu i ku sínbalu.*
6 Má, kantu es txiga na lugar di digudja* di Nakon, Uzá stika mô i el pega Arka di Deus verdaderu, pamodi kes boi staba kuazi ta bota-l na txon.
7 Nton, Jeová fika txeu xatiadu ku Uzá. Deus verdaderu mata-l la mê, pamodi el mostra falta di ruspetu pa lei di Deus. I el móre na ladu di Arka di kel Deus verdaderu.
8 Má, Davidi fika xatiadu* pamodi Jeová kastiga Uzá. I kel lugar fika ta txomadu di Peres-Uzá* ti dia di oji.
9 Davidi fika ku txeu medu di Jeová na kel dia i el fla: “Modi ki N pode traze Arka di Jeová pa nha sidadi?”
10 Davidi ka krê lebaba Arka di Jeová pa undi el staba, na Sidadi di Davidi. Má, el manda pa es leba Arka pa kaza di Obede-Edon, kel jeteu.
11 Arka di Jeová fika na kaza di Obede-Edon, kel jeteu, duránti três mês, i Jeová kontinua ta abênsua Obede-Edon i tudu algen di se família.
12 Nton, es fla rei Davidi: “Jeová sta ta abênsua família di Obede-Edon i tudu kes kuza ki el ten pamodi Arka di Deus verdaderu.” Pur isu, Davidi bai kontenti pa ba buska Arka di kel Deus verdaderu na kaza di Obede-Edon i pa leba-l pa Sidadi di Davidi.
13 Kantu kes algen ki staba ta karega Arka di Jeová da 6 pasu, Davidi sakrifika un toru i un animal gordu.
14 Davidi staba ta badja dianti di Jeová ku tudu se forsa, i el staba ta uza un éfodi* di linhu.
15 Davidi i tudu algen di Israel staba ta leba Arka di Jeová, ta grita di alegria i ku son di buzina.
16 Má, kantu Arka di Jeová entra na Sidadi di Davidi, Mikal, fidju-fémia di Saul, staba na janéla ta djobe pa baxu i el odja rei Davidi ta salta i ta badja dianti di Jeová, i el kumesa ta dispreza Davidi na se korason.
17 Nton, es leba Arka di Jeová pa kel ténda ki Davidi fazeba pa el i es pô-l na se lugar. Dipôs, Davidi oferese ofértas kemadu i sakrifísius di pas dianti di Jeová.
18 Kantu Davidi tirmina di oferese ofértas kemadu i sakrifisius di pas, el abênsua povu na nómi di Jeová di izérsitu.
19 Tanbê, el da pa tudu algen di Israel, pa kada ómi i pa kada mudjer, un pon rodondu sima anel, un bolu di tanbra i un bolu di uva séku. Dipôs, tudu algen bai kada un pa se kaza.
20 Kantu Davidi ba abênsua kes algen di se família, Mikal, fidju-fémia di Saul, ba inkontra ku el. El fla Davidi: “Fórti rei di Israel resebe txeu glória oji! El duspi dianti di kes skrava di se sérvus, sima un tolu ta faze.”
21 Nton, Davidi fla Mikal: “N staba ta komemora dianti di Jeová, ki skodje-m ami envês di bu pai i kes algen di se família. É Jeová ki skodje-m pa N ser líder di se povu, Israel. Pur isu, N ta komemora dianti di Jeová.
22 N ta umilha mutu más inda i N ta faze mutu más kuza pa N mostra ma mi é ka nada. Má kes skrava ki bu pâpia di es, es ta ben da-m glória.”
23 I Mikal, kel fidju-fémia di Saul, ka tevi ninhun fidju ti dia ki el móre.
Nótas di rodapé
^ Ô talvês: “na meiu”.
^ Na ebraiku ta fla: “instrumentu ki fazedu di madera di juníperu”.
^ Éra instrumentu di múzika ki es ta fazeba di metal i es éra rodondu.
^ Djobe Disionáriu di Bíblia.
^ Ô: “perturbadu”.
^ Ki krê fla “kastigu kóntra Uzá”.
^ Djobe Disionáriu di Bíblia.
