Ebreus 4:1-16
4 Pur isu, dja ki inda falta un promésa di entra na se diskansu, nu toma kuidadu* pa ninhun di nhos ka atxadu ma nhos ka merese-l.
2 Pamodi nos tanbê nu papiadu di kes notísia sábi, sima es. Má kel palavra ki es obi ka djuda-s, pamodi es ka tinha kel mésmu fé ki kes ki obi.
3 Pamodi nos, ki mostra fé, nu entra na diskansu, sima el fla: “Pur isu, N jura na nha raiba: ‘Es ka ta ben entra na nha diskansu’”, enbóra se óbras dja tirminaba désdi fundason di mundu.
4 Pamodi na un párti di Skrituras el fla sobri kel sétimu dia: “I na sétimu dia Deus diskansa di tudu se óbras”,
5 tanbê el fla: “Es ka ta ben entra na nha diskansu.”
6 Kes ki papiadu di kes notísia sábi primeru ka entra pamodi es ka obidese. Má inda ta da pa alguns entra na el.
7 É pur isu ki dipôs di txeu ténpu, Deus fla na salmu di Davidi, sima es karta dja flaba antis: “Oji, si nhos obi se vós, ka nhos bira nhos korason duru.” Nton el torna marka un dia ki el txoma di “oji”.
8 Pamodi si Juzué lebaba es pa un lugar di diskansu, Deus ka ta papiaba dipôs di otu dia.
9 Nton, inda sta falta un diskansu sima un sábadu pa povu di Deus.
10 Pamodi kel ómi ki entra na diskansu di Deus tanbê el diskansa di se própi óbra, sima Deus diskansa di kes di sel.
11 Pur isu, nu faze tudu kel ki nu ta pode pa nu entra na kel diskansu, asi pa ningen ka sigi kel mésmu izénplu di dizobidiensa.
12 Pamodi palavra di Deus é bibu i el ten puder, i el é más moladu di ki kalker spada ki ta korta pa dôs ladu i el ta entra fundu ti dividi alma* ku spritu,* i osu* ku tutanu, i el ta pode mostra kes kuza ki nu ta pensa i dizejus di nos korason.
13 I ka ten kriason ki sta sukundidu di el, má tudu kuza sta nu i klaru dianti di odju di kel ki nu ten ki presta kónta.
14 Pur isu, dja ki nu ten un grandi saserdóti prinsipal ki entra na séu, ki é Jizus, Fidju di Deus, nu kontinua ta pâpia di nos fé na el.
15 Pamodi nu ka ten un saserdóti prinsipal ki ka ta pode intende nos frakéza, má nu ten un ki provadu na tudu sentidu sima nos, má sen pekadu.
16 Nton, nu txiga ku kunfiansa* na tronu di kel grandi bondadi, pa nu resebe mizerikórdia i pa nu atxa kel grandi bondadi na óra ki nu meste di ajuda.
Nótas di rodapé
^ Na gregu ta fla: “nu fika ku medu”.
^ Djobe Disionáriu di Bíblia.
^ Djobe Disionáriu di Bíblia.
^ Na gregu ta fla: “junta”.
^ Ô: “liberdadi na pâpia”.
