KAPÍTLU 35

Modi ki N pode bira amigu di Deus?

Dipôs ki kontise un disgrasa ku Jeremy, el pasa ta da txeu valor pa se amizadi ku Deus. El fla: “Kantu N tinha 12 anu, nha pai bandona nos família. Un dia di noti N staba ta faze orason na kama ta inplora Jeová pa nha pai torna ben pa kaza.”

Jeremy staba ta xinti frontadu, pur isu, el kumesa ta lé Bíblia. Kantu el lé Salmo 10:14, kes palavra mexe txeu ku el. Kel versíklu ta fla kel-li sobri Jeová: ‘Kel ki sta sufri ta volta pa bo; é bo ki ta djuda kes órfu di pai.’ Jeremy fla: “N xinti ma Jeová staba ta pâpia ku mi, ta mostra ma el é kel ki ta djuda-m; el é nha Pai. N ka ta pode ten un pai midjór di ki el.”

SIKRÊ bu sta ta pasa pa un situason sima di Jeremy ô nau, Bíblia ta mostra ma Jeová krê pa bu ser se amigu. Na verdadi, Bíblia ta fla: ‘Nhos ser amigu di Deus i el ta ser nhos amigu.’ (Tiago 4:8 ) Pensa na kuzê ki kes palavra li krê fla: Nbóra bu ka ta pode odja-l i el é txeu diferenti di bo, Jeová Deus ta konvida-u pa bu ser se amigu!

Má pa bu ser amigu di Deus, bu ten ki faze sforsu. Pur izénplu, si bu ten un planta na vazu, bu sabe ma el ka ta kria el sô. Pa el fika bunitu, bu ten ki rega-l sénpri i pô-l na un lugar ki el ta kria dretu. Mésmu kuza ta kontise ku nos amizadi ku Deus. Modi ki bu pode bira kel amizadi li más fórti?

Studa Bíblia é inportanti

Dôs algen ki é amigu ten ki pâpia ku kunpanheru, i kel-li ta nvolve obi i pâpia. Mésmu kuza ta kontise ku nos amizadi ku Deus. Lé i studa Bíblia é un manera ki nu ta obi kuzê ki Deus ten pa fla-nu. — Salmo 1:2, 3.

Studa Bíblia talvês é ka kel kuza ki bu gosta di faze más txeu. Txeu jóven ta prifiri odja tilivizon, djuga ô pasa ténpu ku ses amigu. Má si bu krê ten un amizadi ku Deus ka ten otu kaminhu. Bu meste studa se Palavra pa bu pode obi kuzê ki el ten pa fla-u.

Má ka bu preokupa. Studa Bíblia ka meste ser un kuza nfadadu. Bu pode prende gosta di lé Bíblia, sikrê bo é un algen ki ka gosta di studa. Primeru kuza ki bu meste faze, é tra ténpu pa bu studa Bíblia. Un jóven ki txoma Lais fla: “N ten un prugrama. Primeru kuza ki N ta faze tudu dia di palmanhan é lé un kapítlu di Bíblia.” Maria, un jóven ki ten 15 anu, ten un prugrama diferenti. El fla: “Tudu dia di noti N ta lé Bíblia un bokadinhu antis di N bai deta.”

Pa bu faze bu prugrama di studa, odja  kuadru na pájina 292. Dipôs, skrebe dibaxu ki óra ki bu pode pasa sô uns 30 minutu ta studa Palavra di Deus.

․․․․․

Faze un prugrama é sô komésu. Óras ki bu kumesa ta studa própi, bu ta da kónta ma nen sénpri leitura di Bíblia é ka fásil. Talvês bu pode xinti sima Jezreel, un jóven di 11 anu ki fla klaru: “Alguns párti di Bíblia é difísil di lé, i es é ka mutu interesanti.” Si bu xinti si, ka bu dizisti. Pensa sénpri ma óras ki bu ta tra ténpu pa bu studa Bíblia, bu sta faze-l pa bu obi kuzê ki bu amigu, Jeová Deus sta ta fla. Kantu más bu sforsa, más sábi i interesanti bu studu di Bíblia ta bira.

Orason é txeu inportanti

Orason é un manera di nu pâpia ku Deus. Pensa na modi ki orason é un prezenti spetakular. Bu pode pâpia ku Jeová Deus kalker óra di dia ô di noti. El ta sta sénpri prontu pa obi-u. Inda más, el krê obi kuzê ki bu ten pa fla. É pur isu ki Bíblia ta insentiva-nu pa nu faze kel-li: ‘Na tudu kuza, nhos faze orason ku súplika, djuntu ku agradesimentu, pa nhos dexa Deus sabe kuzê ki nhos krê’. — Filipenses 4:6.

Sima kel versíklu li ta mostra, ten txeu kuza ki bu pode pâpia ku Jeová. Bu pode pâpia sobri bus prubléma i preokupason i tanbê agradese-l pa kuzas ki el ta da-u., Bu ka ta kustuma agradese bus amigu pa kuzas dretu ki es ta faze pa bo? Di mésmu manera bu pode agradese Jeová ki dja faze mutu más kuza pa bo di ki kalker otu amigu. — Salmo 106:1.

Skrebe dibaxu alguns kuza ki bu ta krê agradese Jeová pa es.

․․․․․

Di sertéza, di vês en kuandu ten kuzas ki ta pô-u ta xinti medu i txeu preokupadu. Salmo 55:22 ta fla: ‘Lansa bu karga na Jeová, i el ta apoia-u. Nunka el ka ta dexa pa algen justu kai.’

Na kes linha ki sta dibaxu, skrebe kalker preokupason ki bu ta gostaba di pâpia sobri el na orason.

․․․․․

Sprimenta pa bu pode odja

Ten otu kuza ki bu meste sabe pa bu pode ser amigu di Deus. Salmista Davidi skrebe: ‘Nhos sprimenta i nhos odja ma Jeová é bon’. (Salmo 34:8) Kantu Davidi skrebe kel Salmo 34, dja tinha poku ténpu ki el pasaba pa un situason difísil. El staba ta fuji di Rei Saul ki krê mataba el. Kel-li éra un situason difísil pa el. Má dipôs el tevi ki sukundi na meiu di ses inimigu, ki é kes filisteu. Na situason ki ta parse ma el ta moreba, ku sabedoria Davidi finji ma el staba dodu i el konsigi fuji. — 1 Samuel 21:10-15.

Davidi kuazi dja moreba, má el ka atxa ma el skapa pamodi kuza ki el faze. Envês di kel-la, el da ónra pa Jeová. Na komésu di kel salmo ki dja nu papiaba di el antis, el skrebe: ‘N pergunta Jeová, i el responde-m. El libra-m di tudu nhas medu.’ (Salmo 34:4) Pamodi kuzas ki Davidi pasa pa el, el da otus algen konsedju pa ‘sprimenta i odja ma Jeová é bon’.

Bu ta konsigi lenbra algun kuza ki kontise ku bo ki ta mostra ma Jeová ta kuida di bo? Si bu ta lenbra skrebe kel-li na kes linha dibaxu. Sujiston: Bu spiriénsa ka meste ser spetakular. Tenta pensa na bensons sinplis di dia-dia. Alguns ki bu pode ka daba kónta.

․․․․․

Talvês bu pai ku bu mai inxina-u verdadis di Bíblia. Si é es ki inxina-u, kel-li é un benson. Má simé, bu meste dizenvolve bu amizadi ku Deus. Si inda bu ka faze kel-li, informasons ki sta na kel kapítlu li pode djuda-u kumesa. Jeová ta abênsua sforsu ki bu ta faze. Bíblia ta fla: ‘Nhos kontinua ta pidi, i nhos ta dadu; nhos kontinua ta djobe, i nhos ta atxa’. — Mateus 7:7.

LÉ MÁS SOBRI KEL ASUNTU LI NA VOLUMI 1, KAPÍTLUS 38 I 39

NA KEL OTU KAPÍTLU

Bu ta atxa ma é difísil pâpia ku otus algen sobri Deus? Prende modi ki bu pode difende kuzas ki bu ta kridita na el.

TESTU DI BÍBLIA

‘Filís é kes ki ten konsénsia ma es ten nisisidadi spritual’. — Mateus 5:3.

UN IDEIA

Si bu lé sô kuatu pájina di Bíblia tudu dia, bu ta tirmina di le-l na un anu.

BU SABIA MA. . .

Sô pamodi bu sta lé kel livru li i bu sta ta sigi kes konsedju ki el ta da ku bazi na Bíblia, ta mostra ma Jeová ta preokupa ku bo? — João 6:44.

FAZE UN PLANU

Pa N tra más pruvetu di studu pesoal di Bíblia, N ta ․․․․․

Pa N konsigi faze orason sénpri, N ta ․․․․․

Kuzê ki N krê pergunta nha mai ku nha pai sobri kel asuntu li, é ․․․․․

KUZÊ KI BU TA ATXA?

● Modi ki bu pode bira bu studu pesoal di Bíblia más sábi?

● Pamodi ki Jeová ta krê obi orason di algen inperfetu?

● Modi ki bu pode bira bus orason más midjór?

[Lejenda]

“Kantu mi éra más jóven, N ta flaba sénpri kes mésmu kuza na orason. Gósi N ta tenta ora sobri kes kuza dretu i kes kuza mariadu ki ta kontise tudu dia. Dja ki ka ten dôs dia igual, kel-li ka ta dexa-m fla kes mésmu kuza na orason.” — Eve

 [Kuadru/​Fotu]

Izamina bu Bíblia

1. Skodje un stória di Bíblia ki bu ta gostaba di lé. Ora pa Deus da-u sabedoria pa bu ntende kel ki bu sta lé.

2. Lé kel stória ku atenson. Ka bu lé faxi. Uza bu imajinason timenti bu sta lé. Imajina ma bu sta na kel stória: Tenta odja kuzê ki sta kontise, obi vós di kes algen, xinti kes txeru, xinti gostu di kel kumida, i otus kuza di kel stória. Bira kel stória interesanti pa bo!

3. Pensa na kuzê ki bu kaba di lé. Faze bu kabésa pergunta sima kes-li:

● Pamodi ki Jeová poi kel stória li na se Palavra?

● Ki izénplus di algen na Bíblia ki N debe sigi, i ki izénplus ki N ka debe imita?

● Kuzê ki N ta prende na kel leitura li ki pode djuda-m na nha dia-dia?

● Kuzê ki kel stória li ta inxina-m sobri Jeová i sobri manera ki el ta aji?

4. Faze un orason brévi pa Jeová. Fla-l kuzê ki bu prende na bu studu di Bíblia i modi ki bu krê aplika kel-la na bu vida. Sénpri agradese Jeová pa prezenti ki el da-u, ki é se Palavra Bíblia!

[Fotu]

‘Bu palavra é lánpida pa nha pé, i un lus pa nha kaminhu.’ — Salmo 119:105.

[Kuadru/​Fotu]

primeru faze kes kuza más inportanti

Bu ka tene ténpu pa faze orason i pa studa Bíblia? Txeu bês kel-li ta dipende di kuzê ki bu ta poi na primeru lugar.

Sprimenta faze si: Panha un baldi i poi txeu pédra grandi déntu di el. Intxi baldi ku areia ti bóka. Gósi el sta xeiu di areia i pédra.

Gósi dispixa baldi, má poi areia ku pédra apárti. Tenta faze diferenti gósi: Intxi baldi ku areia, i dipôs tenta poi pédra déntu baldi. Ka ta kebe? É pamodi di es bês bu poi areia primeru.

Kuzê ki nu ta prende? Bíblia ta fla: ‘Nhos konfirma kuzê ki é más inportanti’. (Filipenses 1:10) Si bu poi kuzas pikinoti sima diverson na primeru lugar, kuzas grandi sima atividadis spritual ta parse ma nunka ka ta kebe na bu vida. Má si bu sigi kel konsedju li di Bíblia, bu ta da kónta ma atividadis spritual i diverson ta kebe na bu vida. El ta dipende di kuzê ki bu ta poi primeru na baldi!

[Fotu]

Sima un planta na vazu, nu meste kuida di nos amizadi ku Deus pa el pode kria