Prinsípius krê fla kes kuza ki nu ta kridita na es i ki ta orienta nos vida. Pur izénplu, bu ta sforsa pa bu ser onéstu na tudu kuza? Nton talvês bu ta krê inxina bus fidju pa es faze sima bo.

Prinsípius tanbê ta inklui ser idukadu. Pur izénplu, un algen ki ten bons prinsípiu ka ten prigisa, el é justu ku otus algen i el ta preokupa ku otus. Un algen ta konsigi dizenvolve kes kualidadi li midjór timenti inda el sta pikinoti.

KONSEDJU DI BÍBLIA: ‘Iduka mininu na kaminhu ki el debe anda; mésmu óras ki el bira bédju, el ka ta disvia di el.’ — Provérbios 22:6.

Na kel ténpu di tekinolojia li, é txeu inportanti ten bons prinsípiu. Un mai ki txoma Karyn fla: “Nos fidju pode atxa maus koléga na kalker aparelhu iletróniku i na kalker óra. Es pode sta xintadu djuntu ku nos i nen nu ka ta da kónta ma es sta ta odja algun kuza mariadu!”

KONSEDJU DI BÍBLIA: ‘Algen maduru ta trena ses kapasidadi di pensa óras ki es ta uza-l pa sabe kuzê ki é dretu i kuzê ki é mariadu.’ — Hebreus 5:14.

Ser idukadu é txeu inportanti tanbê. Kel-li ta inklui mostra idukason na kuzas pikinoti (sima fla “pur favor” i “obrigadu”) i mostra preokupason ku otus. Kel-li é un kuza ki kuazi dja dizaparse, pamodi gósi gentis sta ta mostra más interesi na aparelhus iletróniku di ki na algen.

KONSEDJU DI BÍBLIA: ‘Faze otus sima bu ta gostaba pa es faze-u.’ — Lúkas 6:31, Bíblia Na Prugrésu Di Traduson Pa Língua Kabuverdianu, BPK.

Mostra klaru kal ki é prinsípius ki bu ta sigi. Pur izénplu, piskizas ta mostra ma é más fásil adulesentis ivita faze séksu antis di kazamentu si es inxinadu klaru ma kel-la é un kuza mariadu.

AJUDA: Pruveta di algun notísia ki dadu ka dura li, pa bu tra bu fidju konbérsu sobri alguns prinsípiu. Pur izénplu, si dadu un notísia sobri un algen ki faze un krimi pamodi ódiu, bu pode fla bu fidju: “É txeu tristi odja modi ki alguns algen ta mostra txeu raiba kóntra otus. Modi ki bu ta atxa ma algen ta bira di kel manera la?”

“É mutu más difísil pa fidjus skodje entri un kuza dretu ô mariadu si es ka sabe kuzê ki é dretu ô mariadu.” — Brandon.

Inxina-s kes prinsípius sobri idukason. Ti kes mininu más pikinoti pode prende fla “pur favor” i “obrigadu” i mostra preokupason ku otus. Un livru a ta fla: “Si fidjus odja ma es ta faze párti di un grupu más grandi sima ses família, skóla i sosiadadi, es ta sta más priparadu pa faze kuzas ki ta mostra bondadi i ki ta djuda otus algen, envês di djuda sô ses kabésa.”

AJUDA: Da bus fidju trabadju pa es faze na kaza i pértu di kaza, asi pa es pode prende kel prinsípiu di faze kuzas pa otus algen.

“Si nos fidjus kustuma ku faze trabadjus na kaza désdi gósi, es ka ta fika spantadu óras ki es ba mora na ses kaza. Es ta sta kustumadu ku kunpri ku alguns responsabilidadi na ses vida.” — Tara.