Bon kumunikason é óras ki pai ku mai i ses fidjus ta xinti avontádi pa fla kunpanheru kel ki es ta pensa i ta xinti.

Pâpia di manera klaru pode ser más difísil pa adulesentis. Antis, éra fásil bu konsigi entra na pórta di korason di bu fidju. Má gósi bu ten ki fika sakédu na kel pórta ta spéra. Alvês ka nporta kantu bês ki bu konku, kel pórta ka ta abri. Pode parse stranhu, má óras ki kel-li ta kontise, bu fidju sta ta meste más di ki nunka pa bu pâpia ku el!

Sta prontu pa pâpia ku bu fidju na óra ki el tene gana di pâpia. Faze kel-li sikrê nhos ten ki pâpia di noti óras ki dja sta txeu tardi.

“Talvês ta da-u gana di fla, ‘Gósi bu krê pâpia? Nu staba djuntu dia interu!’ Má ka ta da pa reklama si nos fidjus krê abri ses korason ku nos. É kel-li própi ki tudu pai ku mai krê pa es faze, ka simé?” — Lisa.

“N gosta di deta sédu, má alguns di kes midjór konbérsu ki dja N tevi ku nhas fidju adulesenti foi dipôs di meia-noti.” — Herbert.

KONSEDJU DI BÍBLIA: ‘Ki kada algen kontinua ta djobe ka se própi vantaji, má kel di otu algen.’ — 1 Coríntios 10:24.

Ka bu fika distraídu ku otus kuza. Un pai fla: “Alvês N ta da kónta ma N ta fika ta pensa na otus kuza óras ki nhas fidju sta ta pâpia ku mi. I es ta repara ma N ka sta presta atenson!”

Si kel-li dja kustuma kontise ku bo, fitxa tilivizon i para di mexe na kalker aparelhu iletróniku óras ki es sta pâpia ku bo. Konsentra na kel ki bu fidju sta ta fla i mostra ma bu ta da valor pa kel kuza ki sta dexa-l preokupadu, sikrê bu ta atxa ma kel-la é ka un kuza txeu inportanti.

“Nu meste djuda nos fidjus ten sertéza ma kel ki es ta xinti é inportanti pa nos. Si es ka ten sertéza di kel-li, es ta dexa ses preokupason déntu di es ô nton es ta djobe otus algen pa djuda-s.” — Maranda.

“Ka bu reaji di manera izajeradu, sikrê kel ki bu fidju ta pensa ka sta nada dretu.” — Anthony.

KONSEDJU DI BÍBLIA: ‘Nhos presta atenson na manera ki nhos ta obi’. — Lucas 8:18.

Pruveta kes óra ki nhos sta diskontraídu. Alvês fidjus ta konsigi pâpia midjór sobri kuzê ki es ta xinti, óras ki es ka sta róstu ku róstu ku ses pai ô ku ses mai.

“Nu ta pruveta óras ki nu ta sta na karu pa pâpia ku nos fidjus. Dja nu kustuma ten bons konbérsu pamodi nu ka ta sta róstu ku róstu ku kunpanheru.” — Nicole.

Otu momentu ki pode djuda nhos ten konbérsu diskontraídu é na óra di kume.

“Na janta, kada un di nos ta fla kel kuza más kasábi i kel kuza más sábi ki kontise ku nos duránti kel dia. Faze kel-li sénpri, ta djuda-nu fika más unidu i ta djuda-nu ten sertéza ma nu ka ten ki lida ku nos prublémas nos sô.” — Robin.

KONSEDJU DI BÍBLIA: ‘Sta prontu pa obi, má bu ka debe pâpia faxi’. — Tiago 1:19.