Un méta é más di ki sô un sonhu ô un kuza ki bu ta gostaba pa kontise. Un méta di verdadi ta nvolve faze planus, ser ikilibradu i faze sforsu.

Ten métas ki ta leba sô alguns dia ô simana, otus méta ta leba alguns mês i ten métas ki pode leba ti un anu ô más pa bu kunpri ku es. Bu pode poi métas ki ta leba alguns mês pa djuda-u kunpri ku kes ki ta leba un anu ô más.

Óras ki bu ta kunpri ku bus méta, bu pode xinti más kunfiansa na bu kabésa, bira bus amizadi más fórti i ser más filís.

Kunfia na bu kabésa: Óras ki bu ta poi métas pikinoti i bu ta kunpri ku es, bu ta ten más kunfiansa pa bu poi métas más grandi. Tanbê bu ta xinti más kunfiansa óras ki bu ta nfrenta dizafius di dia-dia sima preson di kolégas.

Amizadis: Pesoas gosta di sta djuntu ku otus algen ki ta poi métas ikilibradu na ses vida, pamodi kel-li ta mostra ma es sabe dretu kuzê ki es krê pa es i es ta sforsa pa konsigi kel-la. Alén di kel-li, un di kes midjór manera di bira un amizadi más fórti é óras ki bo ku bu amigu ta sforsa djuntu pa alkansa un méta ki nhos ten igual ku kunpanheru.

Ser filís: Óras ki bu ta poi métas i bu ta kunpri ku es, bu ta xinti sábi ku bu kabésa.

“N gosta txeu di poi métas. Es ta djuda-m kontinua okupadu i es ta djuda-m ten obijetivus pa N alkansa. I si bu konsigi alkansa un méta, bu ta xinti rei di sábi óras ki bu para i bu pensa, ‘Uau, N konsigi mê! N faze kel ki N kria.’” — Christopher.

KONSEDJU DI BÍBLIA: ‘Ken ki ta djobe pa béntu ka ta símia, i ken ki ta djobe pa núvens ka ta kodje.’ — Eclesiastes 11:4.

Faze kes kuza ki sta dibaxu li pa bu poi métas i pa bu alkansa-s.

Skodje. Faze un lista di métas ki bu ta gostaba di alkansa i pô-s pa órdi di kel más inportanti pa kel ménus inportanti. Poi kal ki é nunbru un, nunbru dôs, nunbru três i di la pa dianti.

Faze un planu. Faze kes kuza ki sta dibaxu ku kada un di kes méta:

• Poi un data ikilibradu pa bu kunpri ku el.

• Faze un planu di kes kuza ki bu meste faze pa bu kunpri ku el.

• Pensa na dizafius ki pode trapadja bu méta i pensa na maneras ki bu pode vense-s.

Aji. Ka bu spéra ti ki bu faze planu di tudu kuza pa bu kumesa. Pergunta bu kabésa: ‘Kal ki é kel primeru kuza ki N pode faze pa N kunpri ku nha méta?’ I dipôs faze-l. Presta atenson na prugrésu ki bu ta faze timenti bu sta ta kunpri ku bu planu.

KONSEDJU DI BÍBLIA: ‘Planus di un algen ki ta sforsa, di sertéza ta ten bons rezultadu’. — Provérbios 21:5.