Na kel artigu, nu prende ma ten sô un asuntu inportanti ki ta afeta tudu algen i anjus, ki é santifikason di nómi di Jeová. Direitu ki Jeová ten di governa ô si se manera di governa é midjór ô nau, sta ligadu ku santifikason di se nómi. Di mésmu manera, nos lialdadi pa Deus tanbê sta ligadu ku kel asuntu más inportanti di santifikason di nómi di Jeová.

Má pamodi ki gósi nu sta distaka ma kel asuntu más inportanti é nómi di Jeová i santifikason di se nómi? Nu ben odja três motivu.

Primeru, na jardin di Éden Satanás ataka nómi di Jeová ô se fama. Kel pergunta ki Satanás faze Eva, ta da ideia ma Jeová ka gosta di da i ma kes instruson ki el da Adon ku Eva ka éra justu. Dipôs, Satanás fla un kuza diferenti di kel ki Jeová dja flaba. Na verdadi, el staba ta fla ma Deus é mintirozu. Asi, el kalúnia nómi di Jeová. El bira “Diabu,” ki krê fla “kaluniador”. (Juan 8:44) Dja ki Eva kridita na mintira di Satanás, el ka obi ku Deus i el rabela kóntra direitu ki Jeová ten di governa. (Gén. 3:1-6) Ti gósi, Satanás ta kontinua ta konta mintira sobri nómi di Deus i ta spadja mintiras sobri ki tipu di algen ki Jeová é. Kes algen ki ta kridita na kes mintira li, ten más xansi di ka obi ku Jeová. Pur isu, pa povu di Deus, mintiras kóntra nómi santu di Jeová é un injustisa grandi. Kel-li é kel motivu prinsipal di pamodi ki ten txeu mizéria i maldadi na mundu.

Sugundu, pa djuda tudu se kriason, Jeová sta disididu na santifika se nómi i linpa-l di tudu mintira. Kel-li é kel kuza más inportanti pa Jeová. É pur isu ki el fla: ‘Di serteza N ta ben santifika nha nómi’. (Eze. 36:23) I Jizus dexa klaru kuzê ki debe ser más inportanti na orason di un sérvu fiel di Jeová, kantu el fla: “Pa bu nómi ser santifikadu.” (Mat. 6:9) Txeu bês, Bíblia ta mostra ma é inportanti da glória pa nómi di Jeová. Odja alguns izénplu: ‘Nhos da Jeová kel glória ki se nómi merese’. (1 Cró. 16:29; Sal. 96:8) ‘Nhos kanta lovor pa se nómi ki é xeiu di glória.’ (Sal. 66:2) ‘N ta glorifika bu nómi pa tudu ténpu’. (Sal. 86:12) Un di kes bês ki Jeová pâpia la di séu, kontise na ténplu na Jiruzalen, kantu Jizus fla: “Nha Pai, da bu nómi glória.” I Jeová responde: “Dja N da-l glória i N ta torna da-l glória.” — Juan 12:28. a

Tirseru, vontadi di Jeová ta sta sénpri ligadu ku se nómi ô se fama. Pensa na kel-li: Kuzê ki ta kontise dipôs di kel próva final na fin di Govérnu di mil anu di Jizus? Kes anju na séu i algen na téra, ta ben kontinua  divididu sobri kel asuntu inportanti, ki é santifikason di nómi di Jeová? Pa responde kel pergunta li, nu ben lenbra di dôs asuntu ki sta ligadu ku santifikason di nómi di Jeová ki é, nos lialdadi pa Deus i direitu ki el ten di governa. Lialdadi di kes algen ki dja prova ma es é fiel ta kontinua ta podu na próva? Nau. Es ta sta perfeitu, dja es pasa pa próva i es ta ben resebe vida pa tudu ténpu. Tanbê, ka ta ben ten nisisidadi di prova ma manera di Jeová governa é midjór. Na kel ténpu, tudu anju na séu i algen na téra ta sta unidu i ta seta govérnu di Jeová. Má i nómi di Jeová?

Na kel ténpu, tudu algen ta ben konxe verdadi sobri Jeová, se nómi ta santifikadu i ta fika livri di tudu mintira. Má, nómi di Jeová ta kontinua ta ser kel kuza más inportanti pa tudu se sérvus na séu i na téra. Pamodi? Pamodi es ta odja Jeová ta kontinua ta faze kuzas sábi. Pensa na kel-li: Dja ki Jizus ta ben intrega govérnu pa Jeová, ku umildadi, “Deus ta ser tudu kuza pa tudu algen.” (1 Kor. 15:28) Dipôs di kel-li, tudu algen na téra “ta ben ten kel liberdadi ku glória di fidjus di Deus.” (Rom. 8:21) I Jeová ta ben kunpri se vontadi di poi tudu kriatura na séu i na téra unidu, sima un família. — Efé. 1:10.

Dipôs ki tudu kel-li kontise, modi ki família di Jeová na séu i na téra ta ben xinti? Di serteza nu ta ben ten un dizeju fórti pa lova nómi di Jeová. Ku ajuda di spritu santu, salmista Davidi skrebe: ‘Pa Jeová lovadu. Pa se nómi, ki é xeiu di glória, lovadu pa tudu ténpu’. (Sal. 72:18, 19) Pa tudu ténpu, nu ta kontinua ta atxa otus motivu pa lova Jeová.

Nómi di Jeová ta reprizenta tudu kuza sobri el. Óras ki nu ta pensa na se nómi, nu ta lenbra prinsipalmenti di se amor. (1 Juan 4:8) Nu ta kontinua ta lenbra sénpri ma Jeová kria-nu pamodi amor, ma el da sakrifisiu di resgati pamodi amor i ma el ta governa di manera justu pamodi amor. Má nu ta kontinua ta xinti amor di Jeová pa tudu ténpu. Pa tudu ténpu, nu ta ten txeu motivu pa kontinua ta bira nos amizadi más fórti ku Jeová i pa kanta lovor pa se nómi ki ten txeu glória. — Sal. 73:28.