1. Pamodi ki Jizus konpara se disiplus ku ovelhas?

JIZUS konpara amizadi ki el tinha ku se disiplus ku amizadi fórti di un pastor ku se ovelhas. (João 10:14) Kel-li é un bon konparason pamodi ovelhas konxe ses pastor i es ta obi ku se vós. Un turista ki odja kel-li ta kontise, fla: “Nu staba ta filma alguns ovelha i nu tenta pô-s ta txiga más pértu di nos. Má nu ka konsigi pamodi es ka konxe nos vós. Dipôs ben un mininu ki éra ses pastor. Lógu ki el txoma-s, es bai se tras.”

2-3. (a) Modi ki nu ta obi ku vós di Jizus? (b) Kuzê ki nu sta ben odja na kel studu li i na kel otu?

² Kuza ki kontise ku kel turista ta lenbra-nu di kuzê ki Jizus flaba sobri se disiplus. El fla: ‘Es ta obi ku nha vós’. (João 10:16) Má si Jizus sta la na Séu, modi ki nu ta obi ku se vós? Nu ta obi ku vós di nos pastor, Jizus, óras ki nu ta faze kes kuza ki el inxina-nu. — Mat. 7:24, 25.

³ Na kel studu li i na kel otu, nu sta ben pâpia di alguns kuza ki Jizus inxina. El pâpia di kuzas ki nu debe para di faze i di kuzas ki nu debe faze. Primeru, nu sta ben odja dôs kuza ki Jizus fla pa nu para di faze.

4. Sima sta na Lucas 12:29, kuzê ki pode dexa-nu ‘preokupadu dimás’?

⁴ Lé Lucas 12:29. Jizus insentiva se sigidoris pa ‘para di fika preokupadu dimás’ ku kuzas material. Nu sabe ma konsedjus di Jizus é sénpri bon pa nos i nu krê aplika-s.  Má alvês nu pode atxa difísil faze kel-li. Pamodi?

5. Pamodi ki alguns algen ta fika preokupadu dimás ku kuzas material?

 ⁵ Txeu algen ta fika preokupadu ku kuzas di dia-dia sima kumida, ropa i un lugar di mora. Alguns di kes algen li, ta vive na país ki ten txeu pobréza i é difísil atxa trabadju. Na un situason sima kel-li, pode ser difísil konsigi sustenta família. Ô pode ser ki un algen ki ta sustentaba família móre i kel família pode fika sen dinheru pa kunpra kuzas ki es ta meste. Tanbê pamodi duénsa di COVID-19, txeu algen dja perde trabadju i es tene falta di dinheru. (Ecl. 9:11) Si bu sta ta pasa pa alguns di kes situason li, kuzê ki pode djuda-u sigi konsedju di Jizus i para di fika preokupadu dimás?

6. Un bês, kuzê ki kontise ku apóstlu Pedru?

⁶ Un bês, apóstlu Pedru i kes otu apóstlu staba na meiu di un tenporal, na Mar di Galilea. Dipôs es odja Jizus ta anda riba di mar. Nton Pedru fla: ‘Sinhor, si é bo, fla-m pa N anda riba di agu pa N ba atxa-u.’ Jizus fla-l: ‘Ben!’ ‘Pedru sai di barku i el anda riba di agu, ta bai pa Jizus.’ Má repara kuzê ki kontise dipôs. ‘Kantu el odja pa kel béntu fórti, el fika ku medu. I kantu el kumesa ta bai pa fundu, el grita: “Sinhor salva-m!”’ Nton, Jizus pega-l na mô i el ka dexa-l bai fundu. Repara ma Pedru konsigi anda riba di kel mar brabu timenti el staba ta odja pa Jizus. Má kantu el odja pa kel tenporal, medu toma kónta di el i el kumesa ta ba fundu. — Mat. 14:24-31.

7. Kuzê ki nu pode prende ku izénplu di Pedru?

 ⁷ Nu pode prende un kuza inportanti ku izénplu di Pedru. Kantu el sai di barku i el kumesa ta anda riba di agu, el ka staba ta spéra ma el ta distraíba i ma el ta kumesaba ta bai pa fundu. El krê andaba riba di agu ti txiga na Jizus, má el fika preokupadu dimás pamodi tenporal. Sima Pedru meste tinha fé pa el andaba riba di agu, oji tanbê nu meste ten fé pa nu lida ku nos prublémas. Si nu dexa di kunfia na Jeová i na se promésas, nos fé pode bira fraku i nu ta kóre risku di funda na nos prublémas. Pur isu, ka ta nporta si nu sta pasa pa prublémas difísil sima tenporal, nu meste kontinua ta konsentra na Jeová i ta kunfia ma el ta djuda-nu. Modi ki nu pode faze kel-li?

8. Pamodi ki nu ka meste fika preokupadu dimás ku kuzas material?

⁸ Envês di nu fika preokupadu dimás ku nos prublémas, nu meste kunfia na Jeová. Lenbra ma nos Pai, Jeová, promete ma el ta kuida di tudu nos nisisidadi si nu poi kuzas spritual na primeru lugar. (Mat. 6:32, 33) Sénpri el kunpri se promésa. (Deut. 8:4, 15, 16; Sal. 37:25) Si Jeová ta kuida di pasus i di floris, nu pode ten sertéza ma el ta kuida di nos i ma el ta da-nu kumida i ropa! Nu ka meste fika preokupadu dimás ku kes kuza li. (Mat. 6:26-30; Fil. 4:6, 7) Sima amor ta poi un pai ku mai ta da ses fidjus kes kuza ki es meste, tanbê pamodi amor, Jeová ta da-nu kes kuza ki nu ta meste. Nu ka meste ten ninhun dúvida ma el ta kuida di nos!

9. Kuzê ki bu prende ku spiriénsa di un kazal pioneru?

⁹ Odja un spiriénsa ki ta mostra ma Jeová pode kuida di nos nisisidadi. Un kazal ki é pioneru, tevi kuazi un óra ta konduzi ses karu bédju pa bai toma alguns irman ki ta viveba na un lugar di rafujiadu, pa lebaba es pa runion. Kel irmon fla: “Dipôs di runion, nu konvida kes irman pa bai kume algun kuza ku nos. Dipôs nu lenbra ma nu ka tinha nada pa da-s.” Nton, kuzê ki kel kazal ta fazeba? Kel irmon fla: “Kantu nu txiga na kaza, staba dôs bólsa grandi xeiu di kumida frenti nos pórta. Nu ka sabe ken ki poi kes bólsa la. Jeová staba ta kuida di nos.” Un ténpu dipôs, ses karu straga. Es staba ta meste di un karu pa sai na pregason, má es ka tinha dinheru pa konpoba el. Nton es leba karu pa ofisina pa odja kantu ki ta kustaba pa konpo-l. Timenti es staba la, un ómi txiga i el pergunta: “Kel karu li é di kenha?” Kel irmon fla ma karu éra di sel i ma el staba ta meste konpo alguns kuza. Dipôs kel ómi fla: “Ka ten prubléma. É kel karu li ki nha mudjer krê i di kel kor li. Kantu ki bu krê pa el?” Kel irmon sai di la ku dinheru ki ta txigaba pa kunpra otu karu. El fla: “N ka meste nen fla modi ki nu fika kontenti na fin di kel dia. Tudu kel-li ka kontise atoa. Di sertéza é Jeová ki poi tudu kel-li ta kontise.”

10. Sima Salmo 37:5 ta mostra, ki sertéza nu pode ten?

¹⁰ Jizus fla pa nu para di fika preokupadu dimás ku kuzas material. I óras ki nu ta sforsa pa obi ku kes palavra li, nu pode ten sertéza ma Jeová ta da-nu tudu kel ki nu meste. (Lé Salmo 37:5; 1 Ped. 5:7) Pensa na kes difikuldadi ki nu pâpia di es na  parágrafu 5. Talvês ti gósi, Jeová sta ta uza un algen di bu família  pa sustenta kaza ô talvês bu ten un trabadju i bu ta konsigi sustenta bu família. Má sikrê bu perde bu trabadju ô si kel algen ki ta sustenta família ka sta konsigi faze kel-li más, bu pode ten sertéza ma Jeová ta kontinua ta kuida di nhos di un manera ô di otu. Agó nu ben odja otu kuza ki Jizus fla pa nu para di faze.

11. Sima sta na Mateus 7:1, 2, kuzê ki Jizus fla pa nu para di faze, i pamodi ki pode ser difísil faze kel-li?

¹¹ Lé Mateus 7:1, 2. Jizus sabe ma nos é inperfetu i el sabe ma nu ten tendénsia di konsentra sô na fadjas di otus algen. É pur isu ki el fla: ‘Nhos para di julga’. Nu ta sforsa txeu pa nu ka julga nos irmons, má nen sénpri nu ka ta konsigi faze kel-li pamodi nos é inperfetu. Kuzê ki nu pode faze si nu da kónta ma sénpri nu ta kritika otus algen? Nu meste obi ku vós di Jizus i sforsa pa nu para di julga.

12-13. Modi ki izénplu di Jeová pode djuda-nu para di julga otus?

¹² Nu pode prende txeu sobri Jeová, si nu para pa nu pensa modi ki el ta trata algen. Sénpri el ta konsentra na kes bon kualidadi ki es ten. Nu pode odja kel-li na manera ki el trata Davidi kantu el faze alguns pekadu grávi. Pur izénplu, el faze adultériu ku Batiseba i dipôs el manda mata se maridu. (2 Sam. 11:2-4, 14, 15, 24) Pamodi kel-li, Davidi ku se família interu sufri txeu, ti mésmu kes otu mudjer ki el tinha. (2 Sam. 12:10, 11) Tanbê Davidi faze un otu kuza ki Jeová ka krê pa el fazeba. El manda konta kantu ómi ki tinha na izérsitu di Israel i kel-li mostra falta di kunfiansa na Jeová. Bíblia ka ta fla-nu pamodi ki Davidi faze kel-li. Má talvês el tinha txeu orgulhu di se izérsitu ki éra grandi i el ta kunfiaba na ses proteson. Kal ki foi rezultadu? Jeová manda un duénsa ki mata uns 70 mil israelita! — 2 Sam. 24:1-4, 10-15.

¹³ Si bu staba na Israel kantu tudu kel-li kontise, kuzê ki bu ta pensaba di Davidi? Bu ta atxaba ma Jeová ka debe purduaba el? Jeová ka ta pensaba si. El konsentra na kes kuza dretu ki Davidi dja fazeba na se vida i el odja modi ki Davidi rapende di verdadi. Pur isu, Jeová disidi púrdua kes pekadu gravi di Davidi. Jeová sabia ma Davidi ta amaba el txeu i ma el krê fazeba kel ki éra dretu. Nu ta fika kontenti pamodi Jeová ta konsentra na kes bon kualidadi ki nu ten. — 1 Reis 9:4; 1 Cró. 29:10, 17.

14. Kuzê ki ta djuda-nu para di julga otus algen?

¹⁴ Si Jeová ka ta spéra pa nu ser perfetu, tanbê nu ka debe iziji pa otus algen ser perfetu. É fásil odja fadjas di otus algen i kritika-s. Má ken ki ta imita Jeová ta sforsa pa da dretu ku tudu algen, sikrê el ta odja ses fadja. Un diamanti ki inda ka trabadjadu ka ta parse bunitu i el pode ka txoma txeu atenson. Má un algen ki konxe diamanti, sabe ma dipôs ki el trabadjadu el ta ten txeu valor. Anos tanbê, nu debe ser sima Jeová ku Jizus. Nu ka debe konsentra na fadjas di otus, má na kes bon kualidadi ki es ten.

15. Pamodi ki ntende kuzê ki sta kontise na vida di un algen pode djuda-nu ka julga-l?

¹⁵ Kuzê más ki pode djuda-nu ka julga i kritika otus algen? Tenta imajina kuzê ki sta kontise na vida di kel algen. Pur izénplu, un bês Jizus odja un viúva póbri ta poi na kófri di ténplu, dôs  muéda ki tinha poku valor. Jizus ka fika ta pergunta: “Pamodi ki el ka poi más txeu?” Envês di fika preokupadu ku kantu dinheru ki kel viúva da, Jizus konsentra na kuzê ki el tinha na korason. El pensa na situason di kel mudjer i razon ki pô-l ta faze kel kontribuison. Dipôs Jizus ilojia-l pa kuzê ki el faze. — Lucas 21:1-4.

16. Kuzê ki nu ta prende ku spiriénsa di Verónika?

¹⁶ Spiriénsa di un irman ki txoma Verónika, ta djuda-nu ntende ma é inportanti nu pensa na kuzê ki sta kontise na vida di un algen. El ta staba na un kongregason ki tinha un irman ki ta kriaba se fidju el sô. Verónika fla: “Ta parse ma es ka ta baba runion i pregason sénpri. Kel-li pô-m ta pensa kuzas mariadu sobri es. Má un bês, N sai na pregason ku kel irman i el konta-m modi ki éra difísil kria se fidju ki tinha un prubléma di saúdi. El staba ta faze se midjór pa kuida di ses nisisidadi i pa es kontinuaba ta ten un amizadi fórti ku Jeová. I alvês, pamodi prubléma di saúdi di se fidju, el ta ba sistiba runion na otu kongregason.” Verónika fla: “Nen N ka ta imajinaba modi ki se vida éra difísil. Gósi N ten más ruspetu i N ta da más valor pa kel irman i pa tudu kuza ki el ta faze pa sirbi Jeová.”

17. Kuzê ki Tiago 2:8 ta fla pa nu faze, i modi ki nu pode faze kel-li?

 ¹⁷ Kuzê ki bu pode faze si bu da kónta ma bu julga un algen? Lenbra ma nu meste ama nos irmons. (Lé Tiago 2:8.) Tanbê nu pode faze orason di korason pa Jeová i pidi-l pa el djuda-nu para di faze kel-li. É inportanti nu lenbra ma nos tanbê nu meste faze nos párti i sforsa pa nu pasa más ténpu ku kel algen ki nu ta kritika. Asi, nu ta konsigi konxe kel algen más dretu. Nu pode konvida-l pa el sai ku nos na pregason ô pa nu kume algun kuza djuntu. Timenti nu ta ba ta konxe se situason, nu ta konsigi imita izénplu di Jeová i di Jizus i nu ta konsentra na kualidadis di kel algen. Asi nu ta obi ku vós di nos pastor, Jizus, ki fla pa nu para di julga.

18. Modi ki nu ta mostra ma nu sta obi ku vós di nos pastor, Jizus?

¹⁸ Sima ovelhas ta obi ku vós di ses pastor, anos tanbê, nu ta obi ku vós di Jizus. Si nu faze tudu kel ki nu pode pa nu ka preokupa txeu ku kuzas material i nu para di julga otus, Jeová ku Jizus ta abênsua sforsu ki nu ta faze. Ka ta nporta si nu ta faze párti di ‘ribanhu pikinoti’ ô di ‘otus ovelha’, nu meste kontinua ta obi ku vós di nos pastor i ta faze kes kuza ki el ta manda. (Lucas 12:32; João 10:11, 14, 16) Na kel otu studu, nu ta ben odja dôs kuza ki Jizus fla pa nu faze.