IOMARA i se irmons, Marselu i Iver, ta mora na un vila pikinoti na Guatemala. Iomara kumesa ta studa Bíblia ku Tistimunhas di Jeová i dipôs se irmons kumesa ta studa tanbê. Má tinha un prubléma. Es tudu três é ségu i es ka sabia lé na braili. Pur isu, kel irmon ki ta fazeba es studu ta leba kes parágrafu i kes testu di Bíblia pa es.

Tanbê éra difísil pa es sisti runion. Salon di Reinu más pértu ta fikaba 40 minutu di ses kaza i es ka ta konsigi baba es sô. Má irmons na kongregason ta lebaba es tudu runion. I kantu es kumesa ta faze diziginason na runion di meiu di simana, irmons djuda-s dikora ses diziginason.

Na maiu di 2019, runion kumesa ta fazedu na ses zóna. Na kel ténpu, un kazal di pioneru fíksu muda pa kel zóna. Méta di kel kazal li éra djuda kes três irmon prende lé i skrebe na braili. Má kel kazal ka sabia nada sobri braili. Nton es bai un bibliotéka pa prende sobri braili i es studa alguns manera ki es ta uzaba na braili pa pode inxina kes irmon.

Na poku mês, kes três irmon dja ta leba braili sen ninhun prubléma i kel-la djuda-s bira ses amizadi ku Jeová más fórti. a Gósi Iomara, Marselu i Iver é pioneru fíksu. I Marselu é ajudanti di kongregason. Es ta sta txeu okupadu ta sirbi Jeová duránti simana interu. Ses zelu na sirbi Jeová ta poi otus algen na ses vólta ta bira zelozu tanbê.

Kes três irmon ten txeu gratidon pa tudu ajuda ki irmons na kongregason ta da-s ku amor. Iomara fla: “Désdi primeru bês ki nu konxe Tistimunhas di Jeová, es mostra-nu kel amor ki kristons di verdadi ta mostra.” Marselu fla: “Nu ten bons amigu na nos kongregason i nu ta faze párti di un família na mundu interu ki é unidu ku amor.” Iomara i ses irmon tene gana pa txiga kel dia ki es ta ben odja téra interu ta bira un paraízu. — Sal. 37:10, 11; Isa. 35:5.