1. Modi ki nu debe nkara fé na Deus?

FÉ é un kualidadi ki ten txeu valor. Má é ka tudu algen ki ten kel kualidadi li. (2 Tes. 3:2) É Jeová ki ta da tudu se sérvus fé. (Rom. 12:3; Gál. 5:22) Tudu kes ki ten kel kualidadi li debe mostra txeu gratidon pa Jeová.

2, 3. (a) Ki bensons nu ta resebe si nu mostra fé? (b) Ki perguntas nu ta ben responde na kel artigu li?

² Jeová ta atrai kes algen ki ten bon korason pa el através di se Fidju. (João 6:44, 65) I óras ki kes algen ta pasa ta ten fé na Jizus, ses pekadu ta purduadu. I kel-li ta djuda-s ser amigu di Deus pa tudu ténpu. (Rom. 6:23) Kuzê ki nu faze pa nu merese kes benson sábi li? Dja ki nos é pekador úniku kuza ki nu merese é mórti. (Sal. 103:10) Má Jeová ta odja bons kuza na nos. Pamodi se bondadi ki nu ka merese el toka nos korason ku notísias sábi. Dipôs nu pasa ta ten fé na Jizus i kel-li da-nu speransa di vive pa tudu ténpu. — Lé 1 João 4:9, 10.

³ Má kuzê ki é fé? Fé é sô sabe kal ki é kes promésa di Deus pa nos? I más inportanti inda, modi ki nu ta mostra ma nu ten fé?

4. Splika kuzê ki siginifika mostra fé.

⁴ Ten fé é ka sô kridita na kuzê ki Deus ta ben faze na futuru. Fé é un forsa déntu di un algen ki ta pô-l ta krê obi ku Deus. Fé na Jizus i na Jeová tanbê ta pô-nu ta krê pâpia ku otus algen sobri kes notísia sábi. Apóstlu Polu fla: ‘Pamodi, si bu fla pa tudu algen ku bu bóka ma Jizus é Sinhor, i na bu korason bu ten fé ma Deus labanta-l di meiu di kes ki sta mortu, bu ta ser salvu. Pamodi ku korason ta mostradu fé pa ten justisa, má ku bóka ta papiadu na públiku pa ten salvason.’ — Rom. 10:9, 10; 2 Cor. 4:13.

5. Pamodi ki fé é rei di inportanti, i modi ki nu pode mante nos fé fórti? Da un izénplu.

⁵ Kel-li ta mostra klaru ma pa nu ten vida pa tudu ténpu na mundu novu di Deus, nu meste ten un fé fórti. Fé é sima un planta. Un planta meste di agu i ta dipende di manera ki nu kuida di el, el pode morutxa ô fika bunitu i fórti. Má si el ka regadu dretu, un planta ki antis staba bunitu pode kaba pa móre. Di mésmu manera si nu ka kuida di nos fé, el ta bira fraku i el ta móre. (Luc. 22:32; Heb. 3:12) Nu meste faze nos párti pa nos fé kontinua ta ‘kria’ i ta bira ‘fórti.’ — 2 Tes. 1:3; Tito 2:2.

6. Di ki dôs manera Hebreus 11:1 ta pâpia di fé?

⁶ Bíblia ta splika kuzê ki é fé na Hebreus 11:1. (Lé.) Fé ten aver ku dôs kuza ki nu ka ta konsigi odja: (1) ‘Kel ki nu sta ta spéra’. Kel-li pode inklui promésas pa futuru ki inda ka kontise, sima fin di kel mundu mau ki nu sta ta vive na el i promésa di mundu novu. (2) ‘Kuzas ki nu ka ta odja má ki é rial.’ Kes-li é kes kuza ô algen ki nu ka ta odja má ki ta izisti sima Jeová, Jizus, anjus i Reinu na Séu. Nbóra nu ka ta pode odja-s, má nu ten ‘próvas klaru’ ma es izisti. Kel palavra gregu ki traduzidu pa ‘próva klaru’ na Hebreus 11:1 tanbê pode ser traduzidu pa ‘próvas ki ta konvense algen’. (Heb. 11:3) Modi ki nu pode ten fé na kes promésa ki Jeová ta faze pa futuru, i na kes kuza ki nu ka ta odja ki Bíblia ta pâpia di es? Nu ta mostra nos fé através di kuzas ki nu ta fla i ki nu ta faze. Sen kel-li nos fé ka ta ser konplétu.

7. Modi ki izénplu di Nué ta djuda-nu ntende kuzê ki é fé? (Odja dizenhu na komésu di studu.)

⁷ Hebreus 11:7 ta pâpia sobri fé ki Nué mostra. El ta fla: ‘Dipôs ki el resebe avizu di Deus di kuzas ki inda ka odjada, el mostra ruspetu pa Deus i el faze un arka pa salvason di se família’. Nué mostra fé pamodi el faze un arka uma grandi. Di sertéza, se vizinhus pergunta-l pamodi ki el staba ta faze kel arka la. Nué ka fika kaladu nen el ka fla kes algen pa es mete na ses própi asuntu. Se fé djuda-l pâpia ku koraji pa el aviza kes algen di se ténpu ma julgamentu di Deus staba ta binha. Talvês el fla kes algen sima Jeová fla-l: ‘Dja N disidi kaba ku tudu algen na Téra, pamodi Téra sta xeiu di violénsia pamodi es. . . N ta traze un dilúviu di agu pa Téra, pa distrui tudu kriatura ki ten folgu di vida dibaxu di séu. Tudu ki sta na Téra ta móre.’ Tanbê di sertéza Nué splika kes algen kuzê ki es tinha ki faze pa es salva i talvês el fika ta ripiti kel órdi di Deus: ‘Nhos debe entra na arka’. Nton, otu manera ki Nué mostra fé é pamodi el bira ‘pregador di justisa’. — Gén. 6:13, 17, 18; 2 Ped. 2:5.

8. Kuzê ki disiplu Tiagu fla sobri fé di verdadi?

⁸ Talvês Tiagu skrebe se karta poku ténpu dipôs ki apóstlu Polu skrebe sobri kuzê ki é fé na livru di Hebreus. Sima Polu, Tiagu tanbê splika ma fé é ka sô kridita ma Deus izisti. Nu meste mostra ma nu ten fé através di kuzas ki nu ta faze. Tiagu skrebe: ‘Mostra-m bu fé sen óbra i N ta mostra-u nha fé através di nhas óbra.’ (Tia. 2:18) Dipôs el kontinua ta mostra ma ten un diferénsa entri kridita sô kridita i mostra fé. Dimónis ta kridita ma Deus izisti, má es ka ten fé di verdadi. Envês di kel-li, es ta faze di tudu pa promésas di Deus ka kunpri. (Tia. 2:19, 20) Tiagu uza izénplu di un ómi ki éra diferenti i el pergunta: ‘Abraon, nos Pai, ka txomadu justu pamodi óbras dipôs ki el oferese se fidju, Izaki, na altar? Odja ma se fé staba di akordu ku se óbras i ma se fé bira perfetu através di se óbras’. Dipôs, pa distaka ma nu ta mostra nos fé através di kel ki nu ta faze, Tiagu fla: ‘Sima korpu sen spritu sta mortu, asi tanbê fé sen óbras sta mortu.’ — Tia. 2:21-23, 26.

9, 10. Modi ki apóstlu Juan ta djuda-nu ntende ma é inportanti nu mostra fé?

⁹ Más di 30 anu dipôs, apóstlu Juan skrebe se Ivanjélhu i más três karta. Sima kes otu skritor di Bíblia, el ta ntendeba dretu kuzê ki é fé. Apóstlu Juan é kel skritor di Bíblia ki uza más txeu kel vérbu gregu ki traduzidu pa ‘mostra fé’.

¹⁰ Pur izénplu Juan splika: ‘Ken ki mostra ma el ten fé na Fidju, ta ten vida pa tudu ténpu; ken ki ka obi ku Fidju ka ta odja vida, má raiba di Deus ta kontinua riba di el.’ (João 3:36) Nu ta mostra fé di verdadi óras ki nu ta obi ku Jizus. Txeu bês Juan uza kes palavra di Jizus ki ta mostra ma nu ten ki kontinua ta mostra fé. — João 3:16; 6:29, 40; 11:25, 26; 14:1, 12.

11. Modi ki nu pode mostra gratidon pamodi nu sabe verdadi?

¹¹ Nu debe mostra gratidon pamodi Jeová ta uza se spritu santu pa inxina-nu verdadi i pa nu mostra fé na kes notísia sábi! (Lé Lucas 10:21.) Sénpri nu debe agradese Jeová pamodi el atrai-nu através di se Fidju Jizus, ki é ‘Líder Prinsipal i Kel ki ta konpleta nos fé.’ (Heb. 12:2) Nu ta mostra gratidon pa kel bondadi ki nu ka merese, si nu kontinua ta bira nos fé más fórti através di orason i studu di Palavra di Deus. — Efé. 6:18; 1 Ped. 2:2.

12. Modi ki nu ta mostra ma nu ten fé?

¹² Nu debe kontinua ta mostra fé na kes promésa di Jeová. Tudu algen debe odja klaru ma nu ten fé. Pur izénplu, nu ta kontinua ta prega sobri Reinu di Deus i partisipa na óbra di faze disiplu. Tanbê nu ta kontinua ta ‘faze ben pa tudu algen, má prinsipalmenti pa kes ki ta faze párti di nos família na fé.’ (Gál. 6:10) I nu ta sforsa txeu pa nu ‘duspi di kel manera di ser bédju ku se ábitus’ i ivita kalker kuza ki pode poi nos amizadi ku Jeová ta fria. — Col. 3:5, 8-10.

13. Pamodi ki ‘fé na Deus’ é inportanti, i ku kuzê ki nu pode konpara-l?

¹³ Bíblia ta fla: ‘Sen fé nu ka ta pode agrada Deus, pamodi ken ki ta txiga na Deus ten ki ta kridita ma el ta izisti i ma el ta rekonpensa kes ki ta djobe-l asériu.’ (Heb. 11:6) Palavra di Deus ta fla ma ‘fé na Deus’ ta faze párti di kel ‘lisérsi’ ki nu meste pa nu bira sérvus di Deus i kontinua ta sirbi-l. (Heb. 6:1) Alén di fé, nu debe kontinua ta dizenvolve otus kualidadi asi pa nu ‘pode kontinua na amor di Deus.’ — Lé 2 Pedro 1:5-7; Judas 20, 21.

14, 15. Pamodi ki é más inportanti ten amor di ki ten sô fé?

¹⁴ Bíblia ta mostra ma fé é inportanti pamodi el ta pâpia di kel kualidadi li txeu bês. El é kel kualidadi ki Deus gosta ki Bíblia ta pâpia más txeu di el. Kel-li krê fla ma fé é kel kualidadi más inportanti pa Deus?

¹⁵ Polu konpara fé ku amor i el splika: ‘Si N ten tudu fé, ti pa muda montanhas di lugar, má N ka ten amor, ami é ka nada.’ (1 Cor. 13:2) Jizus mostra ma amor é inportanti kantu el responde kel pergunta li: ‘Kal ki é mandamentu más inportanti di Lei?’ (Mat. 22:35-40) Amor ta inklui txeu kualidadi ki Deus gosta, i fé é un di kes kualidadi. Bíblia ta fla: ‘Amor ta kridita na tudu kuza’. Kel-li krê fla ma si nu ten amor pa Deus, nu ta kridita na kuzê ki el fla na se Palavra, Bíblia. — 1 Cor. 13:4, 7.

16, 17. Pamodi ki txeu bês Bíblia ta pâpia di fé i amor omésmu ténpu, má kal di es ki é más inportanti i pamodi?

¹⁶ Dja ki fé i amor é txeu inportanti, txeu bês Bíblia ta pâpia di es tudu dôs na mésmu versíklu. Apóstlu Polu fla se irmons pa es uza ‘koleti di fé i di amor’. (1 Tes. 5:8) Pedru skrebe: ‘Nbóra nunka nhos ka odja-l [Jizus], nhos ta ama-l. Nbóra nhos ka sta odja-l gósi, nhos mostra fé na el’. (1 Ped. 1:8) Tiagu pergunta se irmons skodjedu ku spritu santu: ‘Deus ka skodje kes ki mundu ta atxa ma é póbri pa ser riku na fé i pa es erda kel Reinu ki el promete pa kes ki ta ama-l?’ (Tia. 2:5) Juan skrebe: ‘Kel-li ki é mandamentu di Deus: pa nu ten fé na nómi di se Fidju, Jizus Kristu, i pa nu ama kunpanheru’. — 1 João 3:23.

¹⁷ Sikrê fé na kes promésa di Deus é inportanti, dipôs ki el kunpri kes promésa li nu ka meste ten fé na es más. Má sénpri nu ta ben meste omenta nos amor pa Deus i pa otus algen. É pur isu ki Polu fla: ‘Má gósi, é kes três kuza li ki ta kontinua: fé, speransa i amor. Má kel más grandi di es tudu é amor.’ — 1 Cor. 13:13.

18, 19. Modi ki sérvus di Deus ta mostra ses fé oji, i kenha ki merese glória pa kel-li?

¹⁸ Na nos ténpu sérvus di Jeová ta mostra fé na se Reinu. Pamodi kel-li, gósi ten más di 8 milhon di sérvus di Deus ki ta sirbi-l na pas i union. Es ta mostra kes kualidadi di frutu di spritu di Deus. (Gál. 5:22, 23) Nu ta fika dimiradu di odja fé i amor ki es ta mostra!

¹⁹ Má, ninhun ómi ka merese glória pa kel-li, pamodi é nos Deus ki ta pô-l ta kontise. Pur isu, kel óbra li ta traze ‘glória pa Jeová, el ta ser un sinal pa tudu ténpu, ki nunka ka ta kaba.’ (Isa. 55:13) Na verdadi, ‘ser salvu através di fé é un prezenti di Deus.’ (Efé. 2:8) Kel union i pas ki nu ten ku kunpanheru pamodi kel amizadi ki nu ten ku Jeová ta ben kontinua ta omenta ti ki tudu algen bira perfetu, justu i filís ta lova Jeová pa tudu ténpu. Nu kontinua ta mostra nos fé na kes promésa di Jeová!