Duránti 2023, kuzas ki kontise oji na mundu interu ta mostra klaru ma nu sta vive na ténpu ki Bíblia ta txoma di “ténpu di fin”. (2 Timótiu 3:1) Odja modi ki kuzas ki sta ta kontise gósi é kes ki Bíblia dja flaba ma ta kontiseba na nos ténpu.

Bíblia i kuzas ki sta kontise oji na mundu

 “Géra i. . . notísias di géra”. — Mateus 24:6.

•   “Géra sta ta omenta na txeu párti di mundu.” a

 “Tremor di téra na un lugar tras di kel otu”. — Markus 13:8.

•   “Désdi komésu di 2023, kontise 13 tremor di téra ku forsa di más di 7 na mundu interu, i kel-li é nunbru di tremor di téra más altu i más fórti ki dja kontise, désdi ki kes kuza li kumesa ta rejistadu.” b

 ‘Kuzas ki ta da medu’. — Lukas 21:11.

•   “Dja finda kel ténpu ki nu ta flaba ma klima staba ta kenta; gósi nu sta xinti sima si klima sta ta ferbe própi.” — António Guterres, sekretáriu jeral di Nasons Unidu. c

 “Falta di kumida”. — Mateus 24:7.

•   “Anu di 2023 éra más un anu difísil pa kes ki sta sforsa pa da ses família kumida.” d

 “Situason ta fika konplikadu i difísil di aguenta.” — 2 Timótiu 3:1.

•   “Un na kada 8 algen na mundu sta ta vive ku prublémas di saúdi mental.” e

Kuzê ki nu pode spéra na anu di 2024?

 Ningen ka pode fla ku serteza kuzê ki ta ben kontise na 2024. Má kuzas ki sta kontise na mundu ta mostra ma ka ta dura Reinu di Deus, ô govérnu di Deus na séu, ta ben toma lugar di govérnus di ómi, i el ta ben kaba ku tudu kuza ki ta pô-nu ta sufri i ta fika txeu preokupadu. — Daniel 2:44; Apokalipse 21:4.

 Timenti kel-li ka kontise, óras ki nu ta xinti preokupadu dimás nu pode pidi Deus pa djuda-nu. Bíblia ta fla:

 ‘Óras ki N xinti medu, N ta poi nha kunfiansa na bo.’ — Salmo 56:3.

 Modi ki nu pode mostra ma nu ta kunfia na Deus? Nu ta konvida-u pa bu prende más sobri kel promésa di Bíblia di un futuru sen sufrimentu. Sprimenta nos prugrama di studu di Bíblia di grasa pa bu odja modi ki bo ku bu família pode tra pruvetu di kes promésa ki sta na Bíblia.