Oji txeu jóvens i kriansas ten un telemóvel, a i txeu di es ta uza-s pa entra na internet óras ki es sta es sô na ses kuartu. Kal ki é alguns prigu di bu fidju ten un telemóvel? Kal ki é alguns vantaji? Kantu ténpu pur dia el debe uza telemóvel?

•  Kuzê ki bu meste sabe

•  Perguntas ki bu debe faze

•  Pensa dretu si bu sta priparadu

 Alguns vantaji

•   Fidjus suguru, pai ku mai trankilu. Bethany mai di dôs adulesenti fla: “Nu sta vive na un mundu prigozu, nton é txeu inportanti pa fidjus ten un telemóvel pa es pode txoma ses mai ku ses pai.”

   Un mai ki txoma Catherine fla ma ten otu vantaji. “Ku ajuda di alguns aplikativu, bu ta konsigi sabe undi ki bu fidju sta, através di se telemóvel.”

•   Ajuda pa faze trabadjus di skóla. Un mai ki txoma Marie fla: “Nhas minís ta resebe trabadju di skóla i tanbê es pode pâpia ku ses profesor através di email ô mensájen.”

 Alguns prigu

•   Gasta ténpu dimás. Jóvens normalmenti ta pasa txeu óra ta uza ses telemóvel tudu dia. É verdadi ki pai ku mai tanbê ta gasta txeu ténpu ta uza telemóvel, kuazi kel mésmu ténpu ki es ta gasta pa pâpia ku ses fidju. Un spesialista fla ma alguns família é sima “un grupu di stranhu ki ta sta djuntu tudu dia, má kada un di es ta fika pegadu na ses telemóvel.” b

•   Pornografia. Di akordu ku un studu ki fazedu, más di metadi di jóvens ta djobe pornografia tudu mês. Kel-li ka ta dexa-nu dimiradu, dja ki oji é fásil odja kes kuza li na telemóvel. William, ki é pai di dôs adulesenti, fla: “Si bu da bu fidju un telemóvel, sen bu krê bu sta ta abri pórta pa el odja tudu tipu di pornografia, óra ki el krê.”

•   Fika visiadu. Txeu algen dja sta tantu kustumadu ku ses telemóvel, ki es ka ta konsigi fika sen el. Óras ki es ka konsigi atxa-l, es ta fika preokupadu dimás sen sabe kuzê ki es ta faze i ti es ta fika duenti. Alguns pai ku mai repara ma ses fidju ta fika mal idukadu óras ki es sta uza telemóvel. Un mai ki txoma Carmen, fla: “Alvês óras ki N ta pâpia ku nha fidju, el ta rabida odju el ta fla algun kuza ki ta mostra falta di ruspetu, pamodi el ka gosta pa algen nkomoda-l.”

•   Otus prigu. Un telemóvel pode poi bu fidju ta kóre otus risku. Algen pode fika ta manda-l mensájen pa trosa ku el ô pa amiasa-l. Tanbê es pode manda-l mensájen ô vídiu sobri séksu. Uza telemóvel tanbê pode pô-l ta panha prublémas di saúdi, si el pasa txeu ténpu na un puzison mariadu i si el fika ta durmi poku. Alguns jóven ta uza aplikativus ki ta parse ma ka ten nada mariadu. Pur izénplu alguns ta parse sima un mákina di faze kónta, asi es ta sukundi kuzê ki es ka krê pa ses pai ku ses mai odja.

   Daniel, ki ten un fidju-fémia adulesenti, rezumi es asuntu di kel manera li: “Un telemóvel ta djuda bu fidju odja tudu kuza ki ten na internet: kuzas dretu i kuzas mariadu.”

•   ‘Nha fidju meste un telemóvel?’

   Bíblia ta fla: ‘Ken ki é prudenti ta pensa antis di el da kada pasu.’ (Provérbios 14:15) Ku kel versíklu li na menti, faze kes pergunta li:

   ‘N debe da nha fidju un telemóvel pa proteje-l ô pamodi otus kuza? Dja N pensa na kes vantaji i prigus ki ten? Ten otu kuza ki N pode faze envês di da-l un telemóvel?’

   Un pai ki txoma Todd fla: “Inda bu ta konsigi kunpra un telemóvel más sinplis. Es ta djuda-u pâpia ku bu fidju pa xamada ô pa mensájen. Inda bu ta popa txeu dinheru.”

•   ‘Nha fidju sta priparadu pa es responsabilidadi?’

   Bíblia ta fla: ‘Korason di un algen ki ten sabedoria ta gia-l na kaminhu sértu’. (Eclesiastes 10:2) Ku kel versíklu li na menti, faze kes pergunta li:

   ‘Nha fidju dja mostra ma N pode kunfia na el? El ta pâpia ku mi sobri tudu kuza? Pur izénplu, el ta pâpia ku mi sobri ses amigu? El ta konsigi kontrola ténpu ki el ta gasta ku otus aparelhu sima tilivizon, tablet ô konputador?’ Un mai ki txoma Serena fla: “Un telemóvel é un feraménta spetakular, má tanbê el pode ser txeu prigozu. Pensa dretu na responsabilidadi ki bu sta da bu fidju timenti inda el é pikinoti.”

•   ‘Ami N sta priparadu pa es responsabilidadi?’

   Bíblia ta fla: ‘Iduka mininu na kaminhu ki el debe anda’. (Provérbios 22:6) Ku kel versíklu li na menti, faze kes pergunta li:

   ‘N konxe telemóvel dretu pa N pode djuda nha fidju ntende i ivita kes prigu ki pode parse? N sabe modi ki N ta instala i uza kes aplikativu ki ta djuda-m kontrola nha fidju? Modi ki N pode djuda nha fidju uza telemóvel di manera ikilibradu i sabe ivita prigus?’ Daniel, ki nu pâpia di el antis, fla: “Dja N odja txeu pai ku mai ta da ses fidju un telemóvel i nen es ka ta preokupa modi ki ses fidju ta ba uza-l.”

 Konkluzon: Pa fidjus konsigi uza un telemóvel ku responsabilidadi, es meste inxinadu. Un livru ki ta pâpia sobri modi ki algen ta lida ku ténpu di tekinolojia, c fla: “Nu ka pode spéra ma mininus ta sabe lida es sô ku tentason di gasta txeu ténpu na telemóvel, inda más si ses pai ku mai ka sabe kuzê ki es sta ta faze ô si es ka dadu ninhun orientason.”