Alguns pai ku mai ki ta trabadja ta disidi poi ses fidju na jardin ô na un lugar ki ta tomadu kónta di mininu, sima un skóla. Bu debe poi bu fidju na kes lugar la?

•  Perguntas ki bu debe faze

•  Kuzê ki bu pode faze

 Si nha fidju bai jardin, kel-li ta prujudika nos amizadi? Kel-li pode kontise. Óras ki un mininu sta pikinoti, se sérbru ta dizenvolve faxi i kel-li ta afeta se amizadi ku otus algen. Duránti kel ténpu inportanti li, tenta pasa más ténpu ki bu ta pode ku bu fidju pamodi kel-li pode influensia bu fidju pa réstu di se vida. — Deuteronómio 6:6, 7.

•    Pai ku mai ki sta pensa na poi un mininu na jardin, debe pensa na kuzê ki es ta faze pa kontinua ku un amizadi fórti ku ses fidju.

 Bu ta ten ménus influénsia sobri bu fidju si el bai jardin? Pode kontise. Un livru ki ta pâpia sobri kria fidjus a ta fla: “Sima mininus ta pasa más ténpu ku ses kolégas, es ta influensia kunpanheru más txeu.”

•    Pai ku mai ki sta pensa na poi un mininu na jardin debe pensa na kuzê ki es ta faze pa es kontinua ta ser kel algen ki más ta influensia ses fidju.

 Jardin ta djuda bu fidju prende más faxi óras ki el bai skóla? Alguns algen ta fla ma sin. Otus ta fla ma poi mininu na jardin ta djuda poku ô ka ta djuda un mininu dizenvolve se kapasidadi di prende. Ka ta nporta kal di kes opinion ki sta sértu, un dotora ki txoma Penelope Leach fla: “Ka bu atxa ma kel ki mininu ta prende na skóla é kel ki ta djuda-l más txeu na se vida. I ka bu atxa ma poi un mininu más sédu na skóla é midjór pa el. Si bu sta pensa si, nton bu ka sta ta da valor pa idukason ki bu da bu fidju désdi ki el nase.”

•   Pai ku mai ki sta pensa na poi mininu na jardin debe pensa si kel-li é bon pa se fidju i si el meste-l própi.

 Ta da pa bo ô bu mudjer fika na kaza i pasa más ténpu ku nhos fidju? Na alguns situason pai ku mai ta trabadja sô pa pode ten más dinheru. Má bale péna faze kel-li?

•   Pai ku mai ki sta pensa na poi ses fidju na jardin debe analiza si es pode bira ses vida más sinplis asi pa un di es fika na kaza.

 Nhos debe toma disizon di poi mininu na jardin sô dipôs di djobe dretu kuzê ki nhos ta ganha i kuzê ki nhos ta perde. Má, i si dipôs ki nhos faze kel-li nhos odja ma jardin ta djuda nhos família?

 Bíblia ta fla ma algen ‘prudenti ta pensa antis di el da kada pasu.’ (Provérbios 14:15) Ta pensa na kel prinsípiu li, djobe dretu kenha ki ta toma kónta di nhos fidju.

 Pensa na kuzê ki bu pode faze

•   Alguns pai ku mai skodje un jardin más pikinoti ki ten un ô poku algen pa toma kónta di kes mininu i ki ten poku mininu.

•   Otus pai ku mai ten un algen di ses família ô otu algen pa toma kónta di ses fidju.

 Na tudu kes situason li, bu pode perde algun kuza ô ganha algun kuza. Talvês bu pode pâpia ku otus pai ku mai ki tevi ki ranja un manera pa toma kónta di ses fidjus. Bíblia ta fla: ‘É kes ki ta djobe konsedju ki ten sabedoria.’ — Provérbios 13:10.

 Má, i si bu skodje poi mininu na jardin? Nton. . .

 Sabe más sobri kel jardin

•   Ki fama ki kel jardin ten?

•   El ta sta linpu i el é suguru?

•   Ki atividadis ki es ta faze ku mininus? b

 Sabe más sobri kes algen ki ta toma kónta di mininu

•   Es faze algun formason? Kel-li ta inklui algun formason sobri modi ki ta tomadu kónta di mininu, ô djuda mininu si el da pankada ô si el pasa mal.

•   Kal ki é fama di kes algen ki ta trabadja na kel jardin?

•   Es ta troka kes algen ki ta toma kónta di mininu txeu bês? Kes mudansa li krê fla ma bu fidju ten ki sta sénpri ta kustuma ku kes algen ki ta ba trabadja la.

•   Na kel jardin, kantu mininu ki un algen ta toma kónta? Si un algen ta toma kónta di txeu mininu, kel-li krê fla ma bu fidju pode ka resebe kel atenson ki el meste. É klaru ki atenson ki bu fidju ta meste ta dipende di kantu anu ki el ten i di se kapasidadi.

•   Kes algen ki ta toma kónta di mininu ta krê pâpia ku bo sobri kes kuza ki ta preokupa-u ô ki ta preokupa-s?