“É ka pamodi nu ka sabia di prigu di pornografia, pamodi nu staba sienti di kel-li. Má nu ka da kónta di modi ki éra fásil nos fidju-fémia odja pornografia.” — Nicole.

Na kel artigu li

•  Kuzê ki bu debe sabe

•  Modi ki bu ta proteje bu fidju di pornografia

•  Si bu fidju dja odja pornografia

 Kuzê ki bu debe sabe

 Ku poku idadi, kriansas pode odja pornografia. Studus ta mostra ma kriansas ta odja pornografia pa primeru bês, más ô ménus ku 11 anu di idadi.

 Kriansas pode odja pornografia sikrê es ka sta ta djobe-l. Pur izénplu, es pode odja pornografia timenti es sta faze algun piskiza na internet ô timenti es sta uza redi sosial. Avizus di pornografia pode txiga parse timenti es sta ta djuga na internet. Ten diferentis tipu di pornografia. Kes ki más ta uzadu é fotus i vídius. Má é fásil atxa stórias ki ten pornografia na internet, ki un algen pode lé ô obi na un gravason.

 Pai ku mai tanbê debe sta atentu pamodi pesoas pode manda ses fidjus mensajen di pornografia na ses telemóvel. Na un studu ki fazedu ku más di 900 jóven, kuazi 90 pursentu di mininas i kuazi 50 pursentu di rapazis fla ma ses kolégas di skóla sénpri ta manda-s fotus i vídius di pesoas nu.

 Kel pornografia ki más ta odjadu, kuazi sénpri ten violénsia. Kel tipu di pornografia ki ta odjadu más txeu i ki é fásil di atxa, normalmenti ta mostra algun tipu di violénsia i kuazi sénpri é kóntra mudjer.

 Pornografia ta prujudika kriansas. Studus ta mostra ma é más fásil pa kes kriansa ki ta odja pornografia ten kes prubléma li:

•   xinti difikuldadi na faze ses trabadju di skóla;

•   xinti ansiedadi, dipreson ô atxa ma es ka ten valor;

•   pensa ma é normal forsa ô presiona un algen pa faze séksu ku es.

 Konkluzon: Si kriansas odja pornografia, es ta fika prujudikadu i pai ku mai é kes midjór algen ki pode proteje-s.

 Prinsípiu di Bíblia: ‘Kes palavra ki N sta fla-u oji, debe sta na bu korason, i bu debe inxina bus fidju es i pâpia di es xintadu na bu kaza, óras ki bu sta anda na strada, na óra di deta i na óra di labanta.’ — Deuteronómio 6:6, 7.

 Modi ki bu ta proteje bu fidju di pornografia

 Sabe más sobri es asuntu. Pensa na ki óra i na undi ki é más fásil pa bu fidju odja pornografia. Pur izénplu, na intervalu di skóla el ta pode uza internet ki ka ten ninhun kontrolu?

 Konxe ki feraméntas ki se a telemóvel ten ki bu pode uza pa ka dexa-l odja tudu informason ki el ta resebe i konxe dretu kes aplikativu ki el ta uza i kes jogu ki el ta djuga. Pur izénplu, alguns aplikativu di manda mensajen ten un funson ki ta poi mensajens, fotus ô vídius ta “dizaparse” dipôs di poku ténpu. Txeu jogu na internet ten pornografia i ti es ta dexa kes algen ki sta ta djuga poi kes personájen di jogu ta faze konportamentu seksual mariadu.

 “N ta fla kel-li pamodi kuzê ki dja N pasa pa el. Si bu fidju ten un telemóvel, sabe ki funson ki el ten pa skodje ki site ki bu fidju pode odja na internet i sabe modi ki bu ta pode kontrola kuzê ki bu fidju ta faze ku kel telemóvel.” — David.

 Faze tudu kel ki bu pode pa bu fidju ka odja, lé ô obi pornografia. Faze kel ki bu ta pode pa bu fidju ten ménus risku di odja pornografia. Uza kes funson ki ten na telemóvel di bu fidju i tanbê na kes otu aparelhu iletróniku na bu kaza pa blokia kes site ô otus prugrama ki ten pornografia. Instala kes aplikativu ki ta djuda-u kontrola bu fidju. I konxe tudu kes kódigu ki bu fidju ta uza.

 “Djuda-m txeu instala na nos aparelhu iletróniku kes aplikativu ki ta djuda pai ku mai kontrola ses fidjus, blokia alguns prugrama ki nos fidju pode odja na nos tilivizon ki ta panha internet i sabe kódigu di se telemóvel.” — Maurizio.

 “N ka ta dexa nhas fidju odja vídiu na ses kuartu ku pórta fitxadu. Óras ki es ta ba deta, N ka ta dexa-s leba ses aparelhu iletróniku pa kuartu.” — Gianluca.

 Pripara bus fidju pa ivita pornografia. Un mai ki txoma Flávia fla: “Alguns pai ku mai ta ivita pâpia ku ses fidju sobri pornografia pamodi es ta kridita ma ses fidju nunka ka ta pasa pa kel prubléma la.” Otus pai ku mai pode fika preokupadu i pensa si: ‘Si N pâpia di pornografia, nha fidju pode fika tentadu na djobe-l.’ Kel manera di pensa li é prigozu. Pai ku mai ki ten sabedoria ta inxina ses fidju sobri kes prigu di pornografia antis di el pasa pa kel prubléma li. Modi ki bu pode faze kel-la?

 Inxina bus fidju pikinoti kuzê ki es debe faze si es odja pornografia sen krê. Pur izénplu, es pode fitxa odju ô fitxa ses dispozitivu i insentiva-s pa es pâpia ku bo sobri kuzê ki es odja ô obi. b

 “Nu kumesa ta pâpia ku nos fidju sobri kes prigu di pornografia kantu el staba inda pikinoti. Kantu el tinha uns 11 anu, avizus di pornografia kumesa ta parse na un jogu ki el baxaba na se telemóvel. Kes imajen tanbê tinha mensajens ki ta konvidaba el pa manda se fotus. Pamodi dja nu papiaba sobri kuzê ki el debe faze, el ben lógu pa mi i el fla-m kuzê ki kontise.” — Maurizio.

 Djuda kes kriansa ki sta más grandi nega tentason di lé, obi ô odja pornografia. Pur izénplu, djuda bu fidju pripara un dokumentu, sima ki é un kontratu, undi el ta skrebe tudu kes régra di família sobri kuzê ki el ta faze si el mostradu pornografia i pamodi ki el krê faze kel-la. Tanbê, fla-l pa el skrebe na kel kontratu kes kuza mariadu ki pode kontise ku el si el odja pornografia di propózitu, sima perde ruspetu pa se kabésa, perde kunfiansa di se pai ku se mai i prujudika se amizadi ku Deus. c

 “Sima bus fidju ta ba ta kria, djuda-s pensa na kes kuza mariadu ki ta kontise si es odja pornografia.” — Lauretta.

 “Si nos fidju ta intende kes prigu di pornografia i tanbê modi ki Jeová ta xinti sobri kel-li, es ta fika más protejedu.” — David.

 Nhos pâpia sénpri. Pode ser difísil di kridita má mininus ta krê pâpia ku ses pai i ses mai sobri asuntus ki ten aver ku séksu i kel-li ta inklui pornografia. Dame Rachel de Souza, ki ta trabadja pa un organizason ki ta difende direitus di kriansas na Inglatéra, fla si: “Nu prende ma kriansas ta krê pâpia sobri asuntus ki ten aver ku séksu ku ses pai ku ses mai mésmu óras ki es é pikinoti. Es ta krê pâpia sobri kes asuntu la sénpri. Kriansas ta krê pâpia sobri kes asuntu li di akordu ku ses idadi. Sima es ta ba ta kria, es ta meste pâpia di kuzas diferenti sobri kel asuntu li.”

 “Kantu N staba ta kria, tinha alguns asuntu ki nha pai ku nha mai nunka ka pâpia ku mi. N ta krê pa nu papiaba más avontádi. Gósi ki mi é mai, N ta faze nha midjór pa N pâpia ku nhas fidju sénpri sobri séksu di un manera ki es ta xinti avontádi.” — Flavia.

 Si bu fidju dja odja pornografia

 Fika kalmu. Si bu diskubri ma bu fidju lé, obi ô odja pornografia tenta kontrola manera ki bu ta reaji. Talvês el pode sta ta xinti xatiadu, spantadu ô kulpadu pamodi kuzê ki kontise. Si bu reaji ku raiba bu ta pô-l ta xinti más mariadu inda i talvês el ka ta pâpia ku bo sobri kel asuntu la otu bês.

 Intende modi ki kel-la kontise. Envês di tra konkluzon faxi faze perguntas pa bu sabe modi ki bu fidju odja pornografia. Pur izénplu, é un algen ki manda-l kel imajen ô el atxa-l di el pa el? Kel-la kontise sô un bês ô dja el odjaba pornografia antis? Kel aparelhu ki el staba ta uza tinha kes aplikativu ki ta blokia alguns site ô kes aplikativu ki pai ku mai ta pode kontrola ses fidju? Si el ten kes aplikativu, el tenta faze algun kuza pa el konsigi odja pornografia? Lenbra ma bu obijetivu é ka faze bu fidju pergunta, má insentiva-l pa el pâpia.

 Faze algun kuza. Pur izénplu, si el odja pornografia sen krê, talvês bu meste torna djobe kes aplikativu ki pai ku mai ta kontrola ses fidju i kes di blokia alguns site na se aparelhu.

 Si bu diskubri ma é el ki djobe pornografia, da-l un disiplina ku amor, má ku firméza. Pa bu djuda bu fidju ten dizeju di nega pornografia, rasusina ku el ku bazi na testus di Bíblia, sima Jó 31:1, Salmo 97:10 i Salmo 101:3. d I dexa-l sabe ma bu ta pâpia ku el tudu simana sobri kel asuntu la pa bu sabe modi ki dja el midjora i pa bu odja otus kuza ki bu pode faze ki é pa djuda-l.